Суретте: байқау жеңімпазы Юрий ТКАЧЕВСКИЙ
Оған Қазақстан Республикасы Білім және ғылым министрлігінің Ғылым комитеті, А.Байтұрсынов атындағы Тіл білімі институты қолдау көрсетті. Бұл қанатқақты жобаға қандастарымыз Ресейдің Орынбор, Саратов, Омбы, Астрахань, Алтай, Мәскеу, Екатеринбург, Челябі, Ярославль секілді әр шалғайынан қатысып, Абай өлеңдерін оқыды. Байқаудың шарты бойынша, олар Абай өлеңдерін бейнетаспаға жазып, көпшілікке ұсынып отырды.
– Бұл байқауға қатысқан әр қазақты «Абайды оқымай қазақпын деме...» деген намыс жетеледі. Мұндай жарыс Ресей қазақтары арасында бұрын-соңды болған емес. Оның екі ерекшелігін атап айтқым келеді. Алдымен, біз бұрынғыдай қаржы, уақыт шығындап, бір қалаға жиналған жоқпыз, өркениеттің жетістігін пайдаландық. Кең байтақ Ресейдің түкпір-түкпірінде тұрып жатқан ағайындар Абайдың өлеңдерін бейнетаспаға жазып, жіберді. Оны ресейлік және одан тыс жердегі қазақтар интернет арқылы көріп отырды. Екіншіден, қандастарымыз көптеп шоғырланған Орынбор, Саратов, Омбы секілді облыстардан қазақтар белсене қатысты, әркім әр жаққа тартпай, ауызбіршілік танытты. Жастардың, балалардың көп қатысуы көңілді демдеді. Қазылар алқасы да қорытынды шығарарда телефон байланысы арқылы көпшіліктің пікірін біліп, оларды ескере отырып, жеңімпазды анықтады, – дейді Сәуле Совхозқызы.
Ярославль облысындағы Пошехонье селосына Қазақстаннан қоныс аударған Юрий Ткачевский деген жігіт Абай өлеңін оқығанда ұлы ақынның қандастарынан асып түсті. «Бала кезімде Абайдың өлеңдерін атам ерекше ұнататын еді. Мен ұйқыға жатарда Абай өлеңдерімен көз ілетін едім», деп ол ақынның өлеңдерін мүлтіксіз оқи жөнелді. Байқау қорытындысында Мәскеу қаласында тұратын ақын Жарқын Өтешева бас болған қазылар алқасы Юрийді үздік деп таныды.
– Ресей қазақтары үшін бұл өнер жарысының маңызы ерекше болды. Бұл бәріміздің жеңісіміз! Осылай, бір кісінің баласындай әр істі бірге тындырсақ, біз алмайтын қамал жоқ. Бауырларым, біз мықтымыз! Біз ана тілімізді сүйеміз! Осылай алға ұмтыла берейік! Абайдың тіліне құрмет көрсеткен, Абай өлеңдерін сүйіп оқыған Юрий, сен де қазағымның бірісің, бауырымсың! – деп ақын ағайынға ақжарма қуанышын жазып жатты.
Орынбор облысы қазақтарының көшбасшысы Сәуле Тәйкешеваның айтуынша, алдағы уақытта бұл жоба жалғасын табатын болады. Ендігі кезек «Батырлар жыры» эпостарына беріледі. Халқымыздың ауыз әдебиеті маржандарынан үзінді жаттап, оны бейнетаспаға жазу, оны көрерменге ұсыну бір ай бойы жүреді.
Нәзира ЖӘРІМБЕТ,
«Егемен Қазақстан»
ҚОСТАНАЙ
