Елбасы тапсырмасына сәйкес, жуырда Қарағанды қаласындағы маңызды білім ошақтарының бірі «Болашақ» академиясы аталған заң жобасын талқылауға арналған дөңгелек үстел өткізді.
Жиында білім саласына бірегей бетбұрыс әкелетін заң жобасы жан-жақты сараланып, қордаланған мәселелер қоғамның әділ талқысына түсті. Басқосуда айтылғандай, соңғы жылдары білім беру саласында бірқатар реформа жасалса да, білім беру үдерісін ұйымдастыруда тек құрылымдық өзгерістердің ғана енгізілуіне байланысты, білім саласының тынысы толық ашылмай келеді. Осы ретте жаңа заң жобасы білім беру тәжірибесіне енгізілмеген мәселелерді тізбелеп, жетілмеген тетіктерге жан бітіруді көздейді. Елбасының арнайы тапсырмасымен мұғалім мәртебесі жеке заң ретінде өз алдына бөлек бой көтеруі уақыт талабынан туындап отыр.
«Қазақстан Республикасындағы педагог мәртебесінің мәселелері мен оның болашақтағы дамуы» тақырыбында өткізілген дөңгелек үстелді академия ректоры Құралбай Меңлібаев жүргізіп отырды. Жиынға сонымен қатар «Болашақ» академиясының оқытушы-профессорлық құрамы, «Қазақстандық салалық білім және ғылым қызметкерлерінің кәсіптік одағының өкілдері қатысты.
– Жобаның көптеген баптары бүгінде ой-талқыға түсіп жатыр. Білім саласында жыл сайын жүргізіліп жатқан реформалармен қатар білікті мамандарды даярлаудағы педагогтардың жағдайын түпкілікті жақсартуды мақсат тұтатын педагог мәртебесінің қажеттілігі шынымен артып отыр. Аталған заң тұжырымдамасы осы тұрғыдан өте үлкен маңызға ие, – деді ректор Қ.Меңлібаев. Дөңгелек үстелге көтерілген ең өзекті мәселе – облыс көлемінде барлық мектепті, білім беру ошақтарын білікті мұғалім мамандармен қамтамасыз ететін өз алдына жеке-дара Педагогикалық жоғары оқу орны ашылу керек деген орынды ой болды. Шынымен де облыс орталығының жоғары оқу орындарында даярлап жатқан заңгерлер, химиктер мен биологтер, физиктер мен математиктер әсте педагог мамандар емес, өз саласының ғана мамандары болып табылады. Қатысушылар атап өткендей, бұл мәселе Алматы, Шымкент, Павлодар қалаларында баяғыда шешімін тапқан.
Жиынның басқа басқосулардан тағы бір ерекшелігі – маңызды мәслихатта айтылған салмақты ойлар мен ұтымды ұсыныстар толымды жинақ болып жұртқа таратылуында. Аталған оқу ордасының баспасында қатталған жүйелі жинаққа 40 шақты ғалымның екі тілде еңбектері енген. Кейде осындай құрылтайлардың құрғақ әңгімемен аяқталмай, іс-шара соңында игілікті із қалғаны дұрыс.
Айта кетуіміз керек, іс-шараның ұйымдастырылып өтілуіне Парламент Мәжілісінің депутаты, Қазақстан Республикасының Ұлттық ғылым академиясының корреспондент-мүшесі, заң ғылымдарының докторы, профессор Нұрлан Дулатбеков бастамашы болған.
Мирас АСАН,
«Egemen Qazaqstan»
