Университеттің ұстаздық құрамы мен студенттерінің атсалысуымен қолға алынған айтулы жоба «Жастар жылының» аясында жүзеге аспақ. Фильм-альманахтың продюсері әрі жетекшісі – Қазақ ұлттық өнер университетінің ректоры Айман Мұсақожаева.
– Бүгін ерекше толқынысты сәт. Өйткені біз «Махаббат күндері» деп аталатын үлкен шығармашылық жобаның түсірілім жұмыстарын бастағалы отырмыз. Дәл бүгін сіздер, сондай-ақ аталған фильмнің алғашқы кадрының түсіру сәтіне де куә боласыздар. Сөзсіз, бұл университетіміз үшін тарихи сәт. «Махаббат күндері» ұжымның алғашқы жұмысы емес. 2016 жылы «Кино және ТД» кафедрасының атсалысуымен «Ұрланған сахна» атты алғашқы көркем фильміміздің тұсауын кескен болатынбыз. Енді, міне, екінші толықметрлі жобамыз да «Жастар жылының» аясында өндіріске еніп отыр. Бұл да болса университетіміздің ұстаздық құрамының студенттерге тек теориялық білім беріп қана қоймай, тәжірибе тұрғысынан да шыңдап, үнемі шығармашылық ізденісте жүретіндігін көрсетеді», – деді Айман Қожабекқызы.
«Махаббат күндері» толықметрлі көркем фильм-альманахы «Кино және ТД» кафедрасының 3-курс студенттерінің жазған 8 бөлімнен тұратын новелласы негізінде түсіріледі. Әр новелланың жанры мен қатысатын кейіпкерлері сан түрлі болғанымен, оларды ортақтастыратын ортақ тін – оқиғаның барлығы университет өмірімен байланысты өрбитіндігі. Драмадан комедия, мистикадан романтикаға дейін қамтылған жанр алуандығы айтулы жобаның қызықты әрі сантарапты өрбуіне кең жол ашады деп күтілуде.
– Кино теориясын оқып, меңгеріп шығу бір бөлек. Ал кино алаңын сезініп, түсірілім жұмыстарына араласу деген – студенттеріміз үшін үлкен мектеп, тәжірибе алаңы. Бұл – ерекше кәсіби сезім. Себебі режиссерлердің тыныстайтын жері – кино түсіру алаңы. Университет қабырғасында осындай кәсіби оқу киностудиясының ашылуы шынымен-ақ студенттер өміріндегі айтулы оқиға, қуанышты жағдай. Енді олар оқып жүріп-ақ өзін кәсіби маман сезіне бастайды. Өз-өздеріне деген ішкі сенім мен тәжірибе қалыптастырады», – деді Қазақ ұлттық өнер университетінің профессоры, кинорежиссер Сламбек Тәуекел.
Айта кетейік, «Махаббат күндері» жобасы 1968 жылы кино кеңістігінде үлкен өнер оқиғасына айналған Франсуа Трюффо, Ренцо Росселлини, Шинтаро Ишихара бастаған әлемдік деңгейдегі айтулы режиссерлер жұмысы арнайы цикл бойынша топтастырылған «Жиырма жастағы махаббат» атты 5 бөлімді кино-альманахтың жалғасы іспетті. Осы негізде жүзеге асырылуы жоспарланған фильмнің алдыңғы жобадан ерекшелігі де сол – мұнда кәсіби режиссерлер емес, тек студенттік жұмыстар көрсетіледі. Ал мұндай жобаның болашақ киномамандар үшін тәжірибе мектебі ғана емес, өзін кәсіби тұрғыдан шыңдауына және маман ретінде көрсетуіне зор мүмкіндік сыйлары сөзсіз.
Назерке ЖҰМАБАЙ,
«Egemen Qazaqstan»
