Саясат • 18 Ақпан, 2019

Қ.Тоқаев Мюнхен конференциясына қатысты

42 реткөрсетілді

Қазақстан Парламенті Сенатының Төрағасы Қасым-Жомарт Тоқаев Мемлекет басшысының тапсырмасы бойынша 15-17 ақпанда Мюнхен қауіпсіздік конференциясына қатысты.

Танымал әлемдік саясаткерлер, сарапшылар мен қоғам қайраткерлері бас қосатын беделді форум дәстүр бойынша жаһандық және аймақтық қауіпсіздіктің ең маңызды мәселелерін талқылады. Конференцияға қатысушылар Таяу Шығыс, Балкан мен Кавказда бейбітшілікті қамтамасыз етудің келешегі пікірсайыстың басты назарында болды. Жекелеген сессиялар халықаралық сауда, қару-жарақты бақылау, климат өзгерістері мен кибертехнологияның қауіпсіздік жағдайына әсеріне арналды.

Конференцияда мемлекеттер мен үкіметтердің басшылары, парламенттер төрағалары, халықаралық ұйымдардың көшбасшылары, ықпалды сарапшылар сөз сөйледі. Сенат Төрағасы бірқатар панельдік сессияларға және «Трансұлттық қауіпсіздік» тақырыбына арналған дөңгелек үстелге қатысты.

17 ақпанда Қ.Тоқаев Мюнхен конференциясымен орайлас өткен жоғары деңгейдегі халықаралық инвесторлар қатысқан дөңгелек үстелге қатысты. Сенат Төрағасы трансұлттық 20-дан астам ірі қаржы компанияларының басшылары қатысқан шарада Қазақстанның инвестициялық мүмкіндіктері туралы айтып берді.

Оның сөзінде бизнес ахуалды одан әрі жақсартудағы Қазақстанның бағыт-бағдарына баса назар аударылды. Қ.Тоқаев біздің еліміз 300 миллиард долларға жуық сомаға шетелдік тікелей инвестиция тартқанын хабаралады. Кәсіпкерлікті қолдауға бағытталған заңнамалық шаралар дәйекті түрде жүзеге асып келеді. Ірі инвестициялық жобаларды іске асыруға мақсатында Тікелей инвестициялар қоры құрылады. Дүниежүзілік Doing Business банкінің рейтингі бойынша Қазақстан 190 елдің ішінде 28-ші орынға шықты.

Қ.Тоқаев тау-кен, металлургия, мұнайгаз, энергетика, көлік және ұлттық экономиканың алдыңғы қатардағы басқа да кәсіпорындар активтерін жаппай жекешелендіру жоспары туралы хабарлады. Төраға инвесторларды Еуразиялық экономикалық одақ, Қытай, Орталық Азияның ауқымды нарықтарына бағдарланған өнімдер өндіруге арналған алаң ретінде Қазақстанның мүмкіндіктерін қарастыруға шақырды.

Қ.Тоқаев атап өткендей, Қазақстан экономиканы жедел жаңғырту, жаңа технологиялар мен инновацияларды енгізу бағытына бет алды. Кездесуге қатысушылар «Нұрлы жол» стратегиясын іске асырудың арқасында біздің еліміздің көлік-транзит әлеуеті елеулі түрде ұлғайғанына, трансқұрлықтық жаңа теміржолдың, халықаралық автомобиль және теңіз жолдарының іске қосылуына ерекше назар аударды.

Төраға жасыл, исламдық және инновациялық қаржы құралдарын дамытудың аймақтық орталығы болуға барлық мүмкіндіктері бар «Астана» халықаралық қаржы орталығының жұмысына тоқталды. Бұл кездесуге «Астана» халықаралық қаржы орталығының басқарушысы Қайрат Келімбетов қатысты.

Баннер
Соңғы жаңалықтар

Ұқсас жаңалықтар