Жас ұландар жас қайраты елімнің
Сенбі, 19 мамыр 2012 8:38
Осыдан 17 жыл бұрынғы өзен флоты училищесінің бастығы Құрмаш Оқасовтың бастамасымен Семейде интернаттық үлгідегі әскери мамандыққа бейімделген Шоқан Уәлиханов атындағы «Жас Ұлан» ерлер лицейі ашылды. Ал аталған училищеге бұл азамат 25 жасында комсомол ұйымының хатшысы болып келіп, 14 жыл еңбек еткен. Қызметі біртіндеп жоғарылап, бастыққа дейін көтерілген. Ал өзен флотының мұндай училищесі мен техникумы бүкіл еліміз бойынша Семейде ғана болатын. Сондықтан тоқсаныншы жылдардың ортасындағы оңтайландыру саясаты негізінде бұл училище жабылып тынған.
Сенбі, 19 мамыр 2012 8:38
Осыдан 17 жыл бұрынғы өзен флоты училищесінің бастығы Құрмаш Оқасовтың бастамасымен Семейде интернаттық үлгідегі әскери мамандыққа бейімделген Шоқан Уәлиханов атындағы «Жас Ұлан» ерлер лицейі ашылды. Ал аталған училищеге бұл азамат 25 жасында комсомол ұйымының хатшысы болып келіп, 14 жыл еңбек еткен. Қызметі біртіндеп жоғарылап, бастыққа дейін көтерілген. Ал өзен флотының мұндай училищесі мен техникумы бүкіл еліміз бойынша Семейде ғана болатын. Сондықтан тоқсаныншы жылдардың ортасындағы оңтайландыру саясаты негізінде бұл училище жабылып тынған.
Енді еліміздегі осындай мазмұндағы алғашқы лицейді ашу туралы идея бұған қалай келді дейсіз ғой? Айтайық. Тегінде өзен флотына қатысты арнаулы оқу орнында сабақ жартылай әскери тәртіппен жүргізілетін. Соған орай, училище курсанттары форма киетін. Мұны бір десек, екіншіден, бұған дейін республика білім ісінің үздігі атанып үлгерген Құрмаш Бабағұмарұлы педагогика саласында біршама тәжірибе жинақтап қалған білікті маман еді. Ендеше, осы кезге дейінгі жинақтаған білімі мен білігін енді жас ұрпақты патриоттық рухта тәрбиелеуге бағыттап, өз мүмкіндігін тың салада іске асыруға кіріскен.
Осындай ойға бекінген ол ең алдымен облыстық білім департаменті мен облыстық әкімдіктің игілікті шаруаға көзін жеткізген соң, ғимарат мәселесі де оңды шешімін тапты. Яғни, жоғарыда айтқанымыздай, себепті жағдаймен жабылып қалған өзен флоты училищесінің корпусы жаңа лицейге берілді. Солайша бұрынғы ғимарат та аман сақталып қалды, бұрынғы ұжым мүшелерінің біразы да осында қызметін жалғастыра берді. Бірақ бәрі тыңнан басталған соң оқу-тәрбие жұмыстарын ұйымдастыру да көп ізденісті қажет етті. Сол мақсатпен жаңа лицей басшысы Новосібірдегі кадет корпусының тәжірибесіне жүгінгенді жөн көрген. Оларда кадет корпусына қабылдау 1 сыныптан жүргізілсе, бұлар жас ұландарды он жастан, яғни 5 сыныптан ғана бастап қабылдады.
Сол кездегі қаржы тапшылығы көп нәрседе қол байлай бергені де рас. Әйтеуір, демеушілердің арқасында ондай қиыншылықтар да артта қалған. Осы кезде басқаны айтпағанда Семейде жас ұландарға күнделікті және парад формаларын тігетін шеберлер табылмай, оларды Барнаул мен Қостанайға апарып тіккізгендері де шындық. Ал көршілес екі облыс қосылған кезде далада қалғандай күй кешкен. Сол кездегі Республикалық ұланның қолбасшысы, генерал-лейтенант Сәт Тоқпақбаевтың қамқорлығымен бұл мәселе де сәтімен шешілген. Одан кейініректе сол кездегі Қорғаныс министрі, генерал-полковник Мұхтар Алтынбаевтың жас ұландар лицейіне үш бірдей әскери техника бөлгізгенін ұмытуға болмас.
Сонымен, аталған оқу орны арада тоғыз жылдан соң облыстық әкімдіктің шешімімен «Шоқан Уәлиханов атындағы «Жас Ұлан» арнайы ерлер мектеп-лицей интернаты» мемлекеттік мекемесі болып қайта құрылған. Соған орай лицейдің негізгі міндеттері болашақ Отан қорғаушыларға жоғары деңгейде білім мен тәрбие алуларына қолайлы жағдай жасау, ұландарға әскери іс негіздерін оқыту, белсенді денешынықтыру даярлығы және мақсатты оқыту, оларды Қарулы Күштер сапына даярлау, жоғары адамгершілік, рухани жігерлілік пен психологиялық әзірлікті қалыптастыру арқылы жас ұландарды халқымыздың ежелгі ерлік дәстүрлері мен өнегесін жалғастыратын патриоттар етіп тәрбиелеу, сонымен бірге, болашақ офицерлердің этикалық, эстетикалық талғамдарын қалыптастыру екендігі атап көрсетілді.
Лицей дарынды балаларға арналғандықтан, оған қабылдау талаптары да күшейе түсті. Яғни, оқуға денсаулығы жарамды, емтихандар мен психологиялық тестен жақсы көрсеткіштерді иеленген ұлдар ғана қабылдануда. «Жас Ұлан» ерлер мектеп-лицей-интернатының өз туы, әнұраны мен таңбасы бар. Лицейде ішкі қызмет жарғысы, киім үлгісі, айырма белгілері және аумағында атақ пен дәреже беру ережесі енгізілген.Негізгі сабақтар түске дейін өткізілсе, ұландар түскі асын ішіп демалған соң қосымша сабақтар, үйірме жұмыстары, түрлі олимпиадаларға үміткерлерді дайындау жұмыстары жүргізіледі. Ал одан кейінгі жерде спортпен, өнермен айналысамын деген ұландарға мейлінше мүмкіндік жасалған.
Бүгінде лицейде сабақ негізінен екі тілде – қазақ және орыс тілдерінде жүргізілуде. Мұның сыртында ағылшын тілі де оқытылады. Қазірде мұнда 350 ұлан оқып жатса, соның басым бөлігі, нақтылап айтсақ, 90 пайызы өзіміздің қаракөз жеткіншектер. Олардың арасында ауылдан, басқа облыстан келгендер де, жетім балалар да баршылық. Оқу үлгерімі мен тәртібі дұрыс ұландар сенбі күні түстен жексенбі күні кешке дейін қаладағы туыс-туғандарының үйлеріне жіберіледі.
Осы уақытқа дейін лицейді 600-ден астам ұлан бітірсе, соның алтауы «Алтын белгі» иегері атанып, он екісі үздік деп танылыпты. Лицей бастығы бізбен әңгімесінде 300-ге жуық ұланның осындағы оқуды бітірген соң республика Қорғаныс, Ішкі істер министрліктерінің, Ұлттық қауіпсіздік комитеті мен Қаржы полициясының, Қазақстан Республикасы мен Ресей Федерациясының Төтенше жағдайлар министрліктерінің түрлі оқу орындарына курсант болып қабылданғанын тілге тиек еткен. Оның сыртында 150-ден астам ұлан Алматыдағы КИМЭП, Қазақстан-Британ техникалық университетінің, Астанадағы Л.Н.Гумилев атындағы Еуразия университетінің, Америкадағы Гарвард университетінің және басқа беделді жоғары оқу орындарының студенті атанған. Соның бірі Ерназар Тұрғазытегі Еуразия университетінде, екіншісі Андрей Филиппов Ресейдің Тверь қаласындағы ғарыштық байланыс академиясында оқиды. Жуырда аталған оқу орындарының басшылары атынан өздеріне осындай үздік студенттерді дайындап бергеніміз үшін алғыс хат алдық дейді лицей басшысы зор мақтанышпен.
Одан әрі де Құрмаш Бабағұмарұлы бүгінде жоғары оқу орындарын бітіріп, егемен елге қалтқысыз қызмет етіп жатқан түлектер туралы да бізге ақпарат беруді ұмытпаған. Лицейдің алғашқы түлектері болып саналатын Данияр Сәрсеков – Ұлттық қауіпсіздік комитетінің Шемонайха ауданы бойынша бөлімінің бастығы, Әділхан Оразғұлов – десантшы, ал Дәулет Байқұлақов танк бригадалары командирлерінің орынбасары болып Отанға қалтқысыз қызмет етуде. Сол үш азаматтың үшеуі де майор шеніндегі офицер. Мұның үшеуі де подполковник атағын жуық арада алып қалуы әбден мүмкін, дейді Құрекең. Баласы атқа шапса, анасы үйде отырып тақымын қысады деген осы. Расында, Құрмаш – оларға сонау жылдары әке орнына әке, шеше орнына шеше бола білген азамат. Күні бүгінге дейін кешегі шәкірттерімен ұялы телефон арқылы байланысын үзбей келе жатқаны соның айқын айғағы болса керек.
– Арқалы ақындарымыздың бірінің мектепке тарыдай болып кіресің, таудай болып шығасың деген қанатты сөзі бар емес пе,– дейді Құрмаш Бабағұмарұлы. – Мен сол сөзді өзімше түрлендіріп, біздің лицейге ұлан болып қабылданып, қыран болып қанаттанып шығасың деймін. Соның бәрі осы жылдар ішінде әбден қалыптасып үлгерген ұжымның арқасы. Тағы да мақтанғандай болмайық, бізде оқу, тәрбие жұмысында кемшін жоқ. Оқу корпусы, жатақханамыз, асхана, шеберханамыз, спорт алаңдары бүгінгі күннің талабына сай.
Әскери дайындық, тәрбие жұмысы демекші, «Шығыс» өңірлік қолбасшылығының Семейге орнығуы да бұларға үлкен сеп болғаны байқалады. Соның бір дәлеліндей, жас ұландар әскери парадтар мен басқа да мерекелік шаралардан тыс қалған емес. Сондай-ақ, өңірлік қолбасшылыққа келген ірі шенді офицерлердің лицейге соқпай, немесе жас ұландармен кездеспей кететіндері жоққа тән. Айталық, Семейге келген Кеңес Одағының Батыры, республикамыздың алғашқы Қорғаныс министрі, тұңғыш Халық Қаһарманы Сағадат Нұрмағамбетов жасұландықтардың бір тобын өзіне шақырып алып кездессе, ал кісінің абыройлы жолын жалғастырған екінші министр, екінші Халық Қаһарманы, екінші армия генералы Мұхтар Алтынбаевтың лицейге атбасын тіреп, өздерімен кездесуге уақыт таба білгендерін бұлар қалай ұмытсын! Кейінде Халық Қаһарманы атанған генерал-лейтенант Бақытжан Ертаев та «Шығыс» өңірлік әскери қолбасшылығының қолбасшысы болып тұрғанда лицейге қамқорлық танытудан танбаған. КСРО Халық әртісі Ермек Серкебаевтың лицейде болуы да ұландар үшін есте қаларлық оқиғаға айналған.
Лицейде, сонымен бірге, Үкімет басшысы да, басқа сала министрлері де болғанын білеміз. Республикалық «Бөбек» қорының президенті Сара Назарбаева да Семейге келген сапарында жасұландықтар өмірімен танысып, оларға салтанатты жағдайда Елбасы атынан әсем безендірілген қылыш сыйлап кеткенін де көргенбіз. Қазірде сол бағалы сый жергілікті өлкетану мұражайында тұр.
Дарынды балаларға арналған «Жас Ұлан» лицейі тәуелсіздігіміздің, елдігіміздің, Елбасымыздың дана саясатының арқасында ашылған оқу орындарының біреуі ғана емес, бірегейі болып табылады. Лицеймен бірге оның басшысының абыройы да уақыт өткен сайын көтеріле түсіп келе жатқаны көп нәрсені аңғартса керек. Соның айғағындай, ол бүгінде полковник шенін иеленген бірінші қатардағы офицер, салалық министрлік бойынша «Ең үздік ұстаз», «Қазақстан Республикасы білім беру ісінің құрметті қызметкері» атанған білікті маман. Оның ел Конституциясының – 10, ел Тәуелсіздігінің 20 жылдықтарына орай алған мерекелік медальдері мұның сыртында. Жиырма жыл демекші, енді үш жылдан соң бұл лицей де өзінің жиырма жылдығын атап өтпек. Және жасұландықтардың өз мерекесін лайықты атап өтетіндігіне еш күмән жоқ. Еркін елдің ертеңіне айналар ұландарды тәрбиелеп жатқан бір оқу орнының бүгінгі тыныс-тіршілігі, міне, осындай!
Дәулет СЕЙСЕНҰЛЫ,
журналист.
Семей.
Суретте: дарынды балаларға арналған Ш.Уәлиханов атындағы «Жас Ұлан» лицейінің бастығы, полковник Қ.Оқасов ұландармен бірге.