21 Ақпан, 2019

Омыртқа қарсаңындағы оғаш әңгіме

195 реткөрсетілді

Қай шаруасын болсын кешеуілдетіп қаузайтын ағайын­ның қысқы соғымнан дәм татыруы наурызға дейін созылып кететіні бар. Таяуда ел ақсақалы санатындағы сыйлы ағамыздың бірі телефон шалған. Шаруасы – қазақтың дәстүрлі әндерін нәшіне келтіре орындайтын әрі сол әндердің тарихынан әріден қаузап сыр шерте алатын өнерпаз болса дейді. Үл­кен кісінің өтінішін аяқсыз тастау ұят. Қабыл алғанбыз. Іздедік. Іздегенімізді таптық та. Қазір өнер адамдарының осындай жиын-тойда аз-мұз тиын-тебен табатынын елдің бәрі біледі ғой. Үлкен қалалардағыдай атақ-даң­қы жер жарған айтулы ән­шілердей емес, біздегі өнер­паздардың бәсі белгілі. Іле хабарласып едік, Ақан сері, Біржан сал, Үкілі Ыбы­рай әндерін нәшіне келтіре орындайтын жігіт ағасы ке­лісімін берді. Ән айтып қана қоймай, үй иесінің жөн сілтеуіне орай кезек-кезек сөз беріп, омыртқаның өңін кіргізіп басқарып та бермек.

Сол еңбегіне сұрайтыны 25 мың теңге. 

Шаруасын тындыр­ға­ным­ды ағама жеткіз­генмін. Қуа­нудың орнына күмілжіп қал­ды. Қым­бат екен деді. 

– Арзаны табылмай ма?! – деп сұрады ағам құтты бір хан базардың ортасында жүр­гендей, – тағы да із­деп көр­сең қайтеді. Әлде үйге бар­ған соң қабырғаммен кеңе­сейін бе? Жасыратын еш­теңе жоқ, әне бір дөкей бас­тық болып істейтін іні­шекті де ша­қыр­ғанмын. Ол өзі қымбат арақ ішеді. Бөтелкесі 250 мың теңге. 

– Ондай да арақ бола ма? – деп сұраппын мен.

– Болғанда қандай, – деді ағам, – сен өзі түк білмейді екен­­сің ғой. Әлгі әншінің қыз­­меті қымбат деп тұрғаным сол ғой. 

Иә, ағам айтса айтқандай. Төл өнерімізді бағалай алмай жүргеніміз де осыдан-ау.

Байқал БАЙӘДІЛ,

«Egemen Qazaqstan»

Баннер
Соңғы жаңалықтар

Ашық аспан астында - пианинолар

Аймақтар • Бүгін, 15:52

Ұқсас жаңалықтар