Жуырда осы ғимарат жанына жаңа мешіт тұрғызылатыны жөнінде жылы хабар тарады. Осыған орай, облыс имамы Қуаныш Сəбит мешіттің имамдары мен ақылдастар алқасын жинап, жаңа мешіт туралы пікірлесті. Басқосуға арнайы қатысқан тарихи ескерткіштерді қорғау мекемесінің өкілдері Жақия қажы мешіті «Рухани жаңғыру» бағдарламасы аясында жергілікті тарихи мұраларды қорғау тізіміне кіргенін айтты. Енді арнайы сараптама жүргізілгесін ғана бұл ғимараттың одан əрі пайдалану жағдайы анықталмақшы. Бірақ, жиынға қатысушылар мешіттің тарихи маңызын ескеріп, оны болашақта музей ретінде пайдалануға болады деген ұйғарымға келді. Ал, мешіт аумағындағы жердің кеңдігі ескеріліп, жаңа мешіт салуға шешім қабылданды. Көкшетау қаласындағы «Алуа строй» кəсіпорны салмақшы. Бұл бастаманы ел ақсақалдары мен зиялы қауым өкілдері қолдап отыр.
Байқал БАЙӘДІЛ,
«Egemen Qazaqstan»
Ақмола облысы.
