«Әлеуметтік қамқорлық» бағдарламасы жаңа әлеуметтік тапсырмаларды ұсынып отыр. Осыған байланысты үш бағытта жұмыс істеп жатырмыз. Алғашқысы, күнкөріс деңгейі төмен отбасылар мен отбасы мүшелеріне көрсетілер көмек. Екіншісі, денсаулық сақтау саласындағы қызметтердің сапасын арттыру. Сонымен қатар тұрғындарды баспанамен қамту мәселесі басты назарға алынуда. Үшінші бағыт – өңірлерді дамыту. Биыл үлкен тарихи өзгерістердің куәсі болып отырмыз. Оң өзгерістердің барлығы халықтың игілігі үшін атқарылып жатыр. 20 жыл бұрын Шымкент қаласына іссапармен келгенімде жарық сағаттап ғана берілетін еді. Мүгедектер үйінде азаматтардың жылусыз, жарықсыз, аулада қазан асып жатқаны әлі көз алдымнан кетпейді. Қазір елімізде халықтың әл-ауқаты жақсарды. Шаһарда оңды өзгерістерді көріп, таныстық. Ендігі мақсат – әлеуметтік бағытта қарастырылған мемлекеттік көмекті шын мұқтаж жандарға жеткізуге бірлесіп жұмыс істеу», деді Г.Әбдіқалықова.
Еңбек және халықты әлеуметтік қорғау министрі Бердібек Сапарбаев ведомствоның халықтың табысын арттыру және аз қамтамасыз етілген отбасыларды қолдау бойынша қабылдаған шаралары туралы айтып өтті.
«Мен үшін оңтүстік өңірдің, оның ішінде Шымкенттің орны бөлек. Елбасының тәуелсіздік жылдарындағы елді дағдарыс жағдайынан қалай алып шыққаны барлығымыздың санамызда сайрап тұр. Тұңғыш Президентіміздің мемлекеттік деңгейдегі әр ісінің, бастамаларының артында елдің әлеуметтік жағдайын жақсарту тұрды. Уақыт тегершігін кейін шегеріп қарар болсаңыздар, сол тапсырмалардың қалай орындалып жатқанына көз жеткізесіздер. Міне, мұның дәлелі жақында ғана жетекші партияның кезекті съезіндегі Елбасының Үкіметке, жергілікті билік өкілдеріне берген тапсырмасы халықтың жағдайын жақсартып, көрсетілетін қызметтің сапасын арттыру болды. Бюджеттік сала қызметкерлерінің жалақысын 15-30 пайызға, мұғалімдердің еңбекақысы маусымға дейін 79 мың теңге болса, енді 96 мың теңгеге еселенбек. Тәрбиешілердің жалақысы 68 мыңнан 88 мыңға, дәрігерлердің айлығы 108 мыңнан 141 мыңға дейін өседі. Мұның барлығы қызмет өтілі мен біліктілік деңгейіне қарай есептеледі», деді Б.Сапарбаев.
Министр Шымкент қаласының 77725 тұрғыны аз қамтылған көп балалы отбасыларға арналған әлеуметтік көмекті алатынын айтты.
Аталған көмекке мұқтаж отбасыларды анықтау үшін жергілікті билікпен бірлесіп әлеуметтік карта әзірленіп жатыр. Осы орайда ол шымкенттік кәсіпкерлерге үйде отырған аналарға көмек қолын созып, кәсіп көзін ашуына ынталандыруға шақырды.
Шымкенттіктермен кездесуде жаңа дағдылар мен құзыреттілікті талап ететін заманауи жағдайларда сапалы білім беру мәселесі ерекше маңызға ие екеніне Білім және ғылым министрі Күләш Шәмшидинова білім беру саласындағы реформалар бойынша өз ойын ортаға салды.
«Елбасының партия съезіндегі тапсырмасына орай мұғалім мәртебесі көтеріліп, олардың әлеуметтік жағдайында да жақсы өзгерістер орын алды. Еңбекақыларына 30 пайыздық үстемеақы қосылды. Балалардың сапалы білім алуы ұстаздардың біліктілігіне байланысты. Осы бағытта 3 жылдың ішінде 104 мыңнан аса мұғалім біліктілігін арттыру бойынша арнайы курстан өтеді. Енді еліміздегі үш ауысымды мектептердің мәселесін шешуді қолға аламыз. Тәуелсіздік жылдарынан бері жергілікті және республикалық бюджет есебінен 1672 мектеп салынды. Соның 521-і оңтүстік өңірде, оның ішінде Шымкентте тұрғызылған. «100 мектеп, 100 аурухана» бағдарламасы бойынша 34 мектеп осы өңірде салынды. Неге бұл өңірде білім ұялары көптеп салынды? Себебі, бұл өңірде ұрпағым білімді, білікті азамат болсын деген алтын құрсақ көп балалы аналар бар. Енді тағы 190 мектеп саламыз деп жоспарлап отырмыз. Оның 89-ы үш ауысымды мектептердің мәселесін шешеді. 13-і апатты жағдайдағы мектептің орнына салынады», деді министр.
Жұмыс тобының қалалықтармен кездесуінде денсаулық сақтау жүйесінің басым бағыттары да сөз болды. Денсаулық сақтау вице-министрі Ләззат Ақтаева медициналық қамсыздандыру, тұрғындарға ыңғайлы медициналық көмек көрсету туралы әңгімелесе, Құрылыс және тұрғын үй-коммуналдық шаруашылық істері комитетінің төрағасы Мархабат Жайымбетовтің айтуынша, мұқтаж жандар үшін баспана мәселесі кезең-кезеңімен шешім таппақ.
Шымкент қаласы әкімінің орынбасары Гүлжан Құрманбекова Елбасының «Әлеуметтік қамқорлық» бастамасын жүзеге асыру аясында әзірленген әлеуметтік жобалар туралы хабардар етті.
«2019 жылы қалалық бюджетте бірнеше инвестициялық жобаларды іске асыру жоспарланған. Аталған жобаларды іске асыру арқылы 22 мыңнан астам жұмыс орындарын ашу күтілуде. Алдағы уақытта «Meyirim.kz» қайырымдылық және «Ел-көмек» электронды әлеуметтік порталы, «Белсенді ұзақ өмір сүру», «Шапағат» мүгедектерге арналған орталықтары ашылады. «Әйелдер және жастар кәсіпкерлігін дамытудың 2019-2021 жылдарға арналған «Мен кәсіпкер боламын» атты жол картасы әзірленді. Жобаны іске асыру үшін қалалық бюджет есебінен 600 млн теңге қаралды. Бүгінге 540 пәтерлі 10 тұрғын үйдің құрылысы дайын, мамыр айында беріледі. Оның ішінде 177 пәтер көп балалы аналарға беріледі. Нәтижесінде биыл 1368 әлеуметтік жағынан әлсіз санаттағы және жас отбасылар (342 пәтер) баспаналы болады. Қазір қалада 100 мыңнан астам азаматқа әлеуметтік көмек көрсетілуде. Оның ішінде 62 мыңнан астам адамға міндетті әлеуметтік көмек көрсетілуде», деді Г.Құрманбекова.
Кездесуді қорытындылай келе, Премьер-Министрдің орынбасары Г.Әбдіқалықова 11 көп балалы отбасына мемлекеттік тұрғын үй бағдарламасы аясында салынған жаңа пәтерлердің кілттерін тапсырды.
ШЫМКЕНТ
