Дос
Сәрсенбі, 12 желтоқсан 2012 7:16
Эссе
Ғұмырдың жарты ғасырлық негізгі бөлігін бірге өткізген достарының аяулы Ақантайының, барша қазағының арысы Ақаңы, Ақселеу Сейдімбегінің өмірден озғанына үш жыл толғанда елі болып 70-ке келген мерейтойын атап өтіп жатыр. Ұлтын ұлықтаумен өткен ұлды енді ұлты ұлықтауда. Ердің еңбегі еліне сіңбесе, елі де оның рухын төбесіне көтеріп, есімін қастер тұтпас еді. Қыркүйек айында кіндік қаны тамып, соңғы жер бесігі де болған Жаңаарқасында басталған мерейтойы Астана, Алматысында жалғасып жатыр.
Сәрсенбі, 12 желтоқсан 2012 7:16
Эссе
Ғұмырдың жарты ғасырлық негізгі бөлігін бірге өткізген достарының аяулы Ақантайының, барша қазағының арысы Ақаңы, Ақселеу Сейдімбегінің өмірден озғанына үш жыл толғанда елі болып 70-ке келген мерейтойын атап өтіп жатыр. Ұлтын ұлықтаумен өткен ұлды енді ұлты ұлықтауда. Ердің еңбегі еліне сіңбесе, елі де оның рухын төбесіне көтеріп, есімін қастер тұтпас еді. Қыркүйек айында кіндік қаны тамып, соңғы жер бесігі де болған Жаңаарқасында басталған мерейтойы Астана, Алматысында жалғасып жатыр.
Астанадағы №54 қазақ орта мектебіне, Астанада және Жаңаарқада көшелерге есімі беріліп, өзі соңғы жылдары қызмет істеген Лев Гумилев атындағы Еуразия университетінде Ақселеу аудиториясы ашылып, өз атындағы мектепте музейі ұйымдастырылды. Оның еңбегін қалың оқырманына жеткізу мақсатында іс басындағы інілерінің қамқорлығы арқасында Ақселеу Сейдімбектің әдеби, ғылыми шығармаларының әрқайсысы 60-70 баспа табақтық 6 томдық толық жинағы жарық көрді… Уақыт керуені жылжыған сайын азаматтың есімін қастерлеу жалғаса берері сөзсіз.
Ақселеу Сланұлы Сейдімбек кім еді? Ол ең алдымен этнограф-тарихшы, тарихшы болғанда да халқының өзге жұрттан өзгеше қасиет-қадірінің қалтарыс-бұлтарысын қалдырмауға бар ғұмырын сарқа пайдаланған тарихшы-ғалым. Бәлкім, содан соң оның қазақы қара сөз өнерінің өзгеше үні, өзіне тән ерекшелігі бар прозашы жазушы екенін айтқан дұрыс болар. Он саусағынан өнер тамған шебер, өзі жиі айтатын дәулескер күйші, дәмелі әнші. Біржан, Ақандардың әуендерін тағы бір еске салатын, нағыз күміс көмейлер болмаса, микрофонның көмегінсіз әу деген даусы әудем жерге жетпейтін кез келген орындаушылар айтқанды қойып, маңынан жүре алмайтындай тым-тым күрделі, тым-тым аспани ән шығаратын сазгер, музыка зерттеуші, шежіреші, үңгіртанушы, ауыз әдебиетінің маржандарын теңіз түбінен тергендей жинаушы, аудармашы… Құдай-ау, қайсыбірін айтайын, нағыз сегіз қырлының өзі еді-ау, Ақантай.
* * *
Ақселеудің қазақтың салт-дәстүрін, ұлттық болмыс-бітімін түбегейлі зерттеуге ден қойғанын оның «Ақиық», «Тауға біткен жалбыз», «Күзеуде», «Қыз ұзатқан», «Аққыз», «Бір атым насыбай» сияқты т.б. прозалық шығармаларынан-ақ байқауға болар еді. Басқасын айтпағанда, Ршыман, Уәкилә, Құдайменде, Торғын («Күзеуде»), Майда Нүркей, айда Нүркей, Қайда Нүркейлер, Боздақ, Сахи («Қыз ұзатқан»), Түнқатар («Бір атым насыбай»), Наймантай, Аққыз, Сырға, Аламан, Сырға («Аққыз»), Оңғар, Рақыш («Ақиық») т.б. сияқты кейіпкерлердің есімдеріне қарап-ақ оқиғаның қазіргі уақыттан мүлде басқаша, ертерек кезеңдердегі ғасырлар бойы қалыптасқан қазақы ортада өткенін аңғаруға болар еді. Ол кейіпкерлердің бүгінгі күннің Қайрат, Болат, Мараты немесе Эльмира, Жанара, Гүлнәрәсі емес екені және Ршыманның орнына Қайрат деп, Уәкиләнің орнына Гүлнәр деп есім берсе, оқиғаның сол кезеңде өткеніне күмән туар еді. Екіншіден, әр шығармадан олардың әр бетінен сөзге тоқтау, істің байыбына бармай байлам жасамау, мәрттік, үлкенге құрмет, кішіге ізет сияқты Құдай тек қана қазақтың қанымен, жанымен бірге жаратқан мінездері көрініп отырады. Мысалы, Майда Нүркейдің жалғыз ұлы Аманды Мұстафа дейтін қойшы ат бауырына алып сабап жүргенде Аманның шешесі Айша: «Мұсеке-ау, мұныңыз не сұмдық?» деп шаужайына жармасқанда ұлдың әкесі: «Ұрса, баласымен ұялас шығар» деп орнында отыра береді. Мәселе Мұстафаның ұлды қай ісі үшін сабағанында емес, мәселе Майда Нүркейдің шектен тыс сабырлылығында. Істің ақ-қарасын біліп алмай қызбалық танытпауында. Қазір ұлын әлдебіреу келіп сабап жүрсе, орнында тапжылмай отыратын Ақселеудің Майда Нүркейіндей кісіні таба алар ма екенбіз.
Бүркітші Сыздықтың құдасы Файзоллаға балапанынан бауырына басып, он бес жыл бойы қызығын көрген бүркітін оның бір ауыз сөзін қимай беріп кетуін («Ақиық») мәрттік демей не дерміз. Бұл да қазақы қасиет.
Үшіншіден, әр шығарма қазақы жол-жоралғының, салт-дәстүрдің, әдет-ғұрыптың барлығын әдемі оқиғамен, айшықты тілмен көркемдеп ұсынған нұсқасы десе болар.
Ал енді «Ақиық» хикаясын ықтияттап оқыған адам құсбегілік, саятшылық мектебінен дәріс алғандай болар еді деген ой келеді. Немесе бұл еңбекті құсбегілік пен бүркіт баптау жөніндегі оқулық деп бағалаған жөн. Демек, Ақселеу Сланұлының көркем шығармалары ел тарихына, үлкен ғылымға барар жолындағы даярлығы, үлкен баспалдағы іспетті. Оның шығармашылығы сырттай қарағанда, көркем әдебиет пен ғылыми еңбектер атты екі бөлімнен тұрғандай көрінгенмен, ол бөліп-жаруға келмейтін тұтас дүние. Бұл пікірді Кембридж университетінің этнограф ғалымы Э.Личтің: «Этнографическая монография имеет много общего с историческим романом, чем, каким бы то ни было научным трактатом» (Купер А. Постмодернизм. Кембридж «Великая Калахарская дискуссия»//Этнографическое обозрение, 2003. №3) деген сөзі бекіте түскендей. Ақаңның өзі жиі айтатын, «Көркем шығарма тұспалдап, ғалым турасын айтады». А.Сейдімбекті қазақ этносы этнографиясының қазіргі жай-күйін кешегі ахуалымен салыстыра отырып, зерттеген ірі ғалым деп таныр болсақ, оның ең соңғы «Қазақтың ауызша тарихы» атты еңбегі ұлттық этнологиямыздың зор табысы. Этнография – зерттеу жинақтау болғанда, этнология қалыпқа түсіріліп синтезделген іргелі сала болғандықтан, бұл – ондаған қызметкері бар бір институттың айлап-жылдап бітірер еңбегі, бұл Ақаңның туған халқы алдында өтеп үлгерген перзенттік парызы. Жоғарыдағы сөзіміздің дәлелі ретінде тағы да айтарымыз, оның шығармашылығы біртұтас дүние. Көркем шығармалары да, ғылыми еңбектері де ұлттық этнографияны айтып, баяндап берудегі екі түрлі тәсілдер ғана.
Ақселеу Сейдімбектің ғалымдығы, жазушылығы, тіпті журналистігі туралы ол осынау жарық дүниеден көшкен үш жылдың мәулетінде аз айтылып, аз жазылып жүрген жоқ. Оған ғалым, жазушы ағалары, замандас, құрбы-достарының көбі-ақ үн қосты. Оның тірлігі тұйықталғанмен, рухани ғұмыры уақытпен бірге жалғаса берер, мол мұрасы туралы зерттеулер, ғылыми еңбек, мақалалар алдағы уақытта да жазыла берер.
Мен ол соқпаққа соқпай-ақ, жарты ғасырға жуық өмірдің қызық-шыжығын бірге көріп, тіршілік теңізін бірге кешкен жанның басқа қырына тоқталсам деймін. Халқымызда азамат пен азаматтың өзара қарым-қатынасын көрсететін ұғымдар аз емес. Көзтаныс, таныс, жора-жолдас, дос, тағы басқа. Осылардың ішіндегі ең биік ұғым – дос. Ал достан да жақын жандарды қалай атайтыны белгісіз. Мүмкін, «бауырдай болған дос», «жан аямас дос» деген ұғымдар келіңкірер. Бәлкім, біз екеуіміздің қарым-қатынасымыз осы ұғымға саятын шығар. Бауырлардың да бір-бірін түсінбей қалатын, араларында өкпе-наздың да жүретін кездері болады, ал біздің түсініспей қалған, арамызда өкпе-наз жүрген кез болмапты. Көріспей жүрсек сағынысып, табысар едік, жарастықты әзіліміз әңгімеміздің тұздығы болушы еді. Содан да ол білмей кеткен менің сырым, мен білмей қалған оның сыры болмайтын. Көпшілік біле бермейтін өмір жолының кей тұсын, өзі жиі айтатындай, «көктей шолып» көрсем деймін.
* * *
Ол – сәби. Арқаның ақ бораны үш-төрт күн тынбай соғып, сәл тыныстаған сәтінде Сейдімбектен тараған арыстандай алты ұлдың кенжесі Слан да бес ағасының соңынан соғысқа аттанатын болды. Ол бармай кешігіп қалса, ентелеген жауды ешкім тоқтата алмайтындай әскери комиссариаттың адамдары оның екі күннен бері толғатып жатқан келіншегіне де қаратпай, Байдалы би ауылының төрт-бес жігітімен бірге қуалап, ат шанаға отырғызған. Олар ауылдан қозыкөш ұзамай-ақ соңдарынан қуалап, шауып келе жатқан салт атты көрінді. Ол арқанбойы жақындай бере-ақ айғайға басқан.
– Слан, а Сла-а-ан! Сүйінші, келіншегің аман-есен босанып, ұл тапты.
Ат-шанадан домалай түскен Слан да келген жігітті шанаға мінгізді де, өзі атқа қарғып мініп, ақ шаңыттың арасында мұнартып жатқан ауылға қарай шаба жөнелген. Әскери екі жігіттің «Тоқта! Бармайсың!» дегендеріне де қараған жоқ.
Ол үйге кіргенде есік алдында тұрған қарттардың бірі: «Апыр-ай, қатерлі сапарға бара жатып, қайтып оралғанды ырымға жаман деуші еді. Бекер оралды-ау», депті. Айтып-айтпай арада бірер жыл өтер-өтпесте талайды зар қақсатып кеткен «қара қағаз» одан да келген. Алайда әке шіркіннің жарық дүние есігін жаңа ашқан сәбиінің бір шөкім бетін иіскеп тұрып, шешесіне:
– Апа-ау, мына немереңіздің шашы даламыздың ақ селеуі сияқты үлпілдеп тұр екен, – деген сөзі ұлына есім болып қаларын және өзінің аяулы жары Кәтепті, сондай-ақ, тұңғыш ұлын алғаш рет… соңғы рет көрерін ол сәтте білген жоқ еді.
* * *
Ол – бала. «Ақадыр» станциясына бір жетіп алса, әрі қарай Қарағандысына ма, Ақмоласына ма біраздан бері жүріп үйренген вагонның үстіне шығып алып, бұл маңнан ізін суытар еді. Әрі қарай вокзалда біреудің жүгін тасыса да өлмейтін тиын-тебенін тауып алар еді.
Осы ойға біржола бекінген ол Ақадырды бетке алған бір жүк машинасына қол көтерген. Жүргізуші бір түрлі таныс сияқты көрінді.
– Өй, сен әлгі Қамзаның үйіндегі бала емессің бе? Бала бұлтара алмай: «Иә» деген. – Иә, қайда тартып барасың?
– Ақадырға, аға. Сонда бір туысқанның үйіне. – Бұл жолы амалсыз өтірікке басқан. Жүргізуші мұның жай-күйінен хабардар болса керек, көп тергеп-тексермей кабинасына отырғызып алып, жүріп кетті. Жігіт әр нені сұрамасын деген оймен ол бірден «ұйықтап» кеткен.
Ой теңізі шексіз. «Өзі бір жастан асар-аспаста әкеден келген қара қағаздан хабары жоқ. «Жеңгесінің» жылап-еңіреп Қамза деген бір мүгедек майдангерге ұзатылып кеткені ғана еміс-еміс есінде. Тағы да соғыстан жаралы боп қайтқан алты ағайындыдан қалған жалғыз сарқыт, әкесінің ағасы Аманбек пен оның зайыбы Ағлипаны әкем мен шешем екен деп, ешкімнен кем-қор болмай өсіп жатқан. Әбден ес тоқтатып қалған тұсында, осыдан бірер жыл бұрын ойда жоқта туған әкесі Аманбек емес, Слан екенін, туған шешесі Ағлипа емес Кәтеп екенін әлде бір жеңіл ауыздан естіп білген. «Адамды сор айдаса, аттай желдіреді» деген ғой, азғырған сөзге еріп, өгей емес, туған анасының қолына кетпек болып түлен түрткен. Алайда, жарым жанды, жарты санды дегендей өгей әке мұны сыртқа теуіп, өгейсітпесе де оның бойынан Аманбек әкесінің қайырымы байқала бермейтін. Оның әр қатқыл сөзі шаншудай қадала беретін. Ол аздай құдай қосқан қосағынан бір жылға жетер-жетпесте айырылып, жарым көңіл болып жүрген, балалы-шағалы етекбасты күйкі тірлік қажытқан анасының бұған деген мейірімі жоқтай көрінетін. Ақыры отбасының бір ренжіскен сәтінен кейін үйден қашып шыққан. Аманбек ағасының отбасына оралуға бет жоқ. Туған анасын іздеп кетерде Аманбек ағасының үйінен әбден қорлық көріп жүргендей, «Туған шешеме кеттім» деп біреуден хабар айтып аттанған болатын.
– Бала, келдік. Түнімен ұйықтамағансың ба? – деген жүргізушінің сөзінен кейін: «Рақмет, аға» деп жерге түскен.
– Үйің қай жақта еді? – деген жүргізушіге «Вокзалдың жанында» деген.
Бейтаныс мекенге осыған дейін де қаңғып жүріп, бір-екі рет келгені бар. Ол вокзалды оңай тауып алды. Енді кешелі-бері нәр сызбағандықтан, ас тілеп тұрған шұрқыраған ішегін алдарқататын бірдеме табылса. Бірақ, кімнен сұрап, кімге жалынар. Дорбаларынан бірдемелерін алып, тамақтанып отырғандарға көзін сатып тұруға да арланады. Сөйтіп жүргенде азапты тағы да жарты тәулік өтіпті. Түнде қисайған орындығынан біреу түртіп оятқандай атып тұрған. Айнала жап-жарық. Ұйқыға алданып жатып байқамапты. Ас тілеген ішкі дүниесі әрі қарай шыдатар емес. Тым болмағанда су ішіп, жалаңдаған асқазанын алдандырмақ болып, бұрышта тұрған шүмекті ыдысқа қарай бұрыла бергені сол еді… Өз көзіне өзі сенбей есік жаққа қайта қараған. Есіктен бұл жарық дүниедегі жалғыз жанашыры Ағлипа апасы мен шешесі Кәтеп кіріп келе жатты. Ойланып жатуға шамасы келмеді. Апатайлап соларға қарай ұмтылған. Апасы болса, бір сәт есін жия алмай орнында тұрып қалған. Үні де шықпайды, тек құшағын айқара аша берген. Бала апасының құшағына келіп құлағанда көзінің жасы бетін жуып кеткен апасы айнала тұрған жұртты көзіне де ілмей аңырасын-ай.
– Беу, арманда кеткен арысымның артында қалған жетім құлыншағы-ау, сенің осылай шырқыраған үніңді естіртіп қойғанша, Құдай мені неге ала қоймайды? Барар жер, басар тауың жоқ, осылайша қаңғып кетер деп пе едім мен бейбақ, үй-бай! – Тас қып құшақтап алып, бүкіл станцияны басына көтеріп аңырады.
– Қойшы енді, апатай! Бәріне де мен сорлы ғой кінәлі, – деп екеуін құшақтап тұрған шешесі де еңірейді. Жұрт жиналып қалды. Бұл жыластың тегін еместігін сезген әлдекімдер мүсіркеп сөйлейді.
Ол сол күні тумаса да туғандай болған екінші апасы Ағлипа мен өмірден өткенше бетіне тіктеп қарамай өсіріп жеткізген, оқытып, азамат еткен екінші әкесі Аманбектің құшақтарына біржола еніп еді.
* * *
Ол – студент. Азғантай шәкіртақыны барынша үнемдеп ұстағанның өзінде бірде аш, бірде тоқ жүретін, қара нанның өзін де шақтап сататын кезең еді. Әйтеуір, бір бөлмеде жатқан бес жігіт шәкіртақыларының соқыр тиынын шығармай ортасындағы тұрақты «кассирлеріне» тапсырып қояды. Әйтеуір, бір тойып бермейтін Мәскеу, Ленинград сияқты қалаларға еттерін аттандырып, дүкендерден жүні жидітілген қойдың басы үзілмейтін. Үлкен кастрюльге кейде екеуін, кейде біреуін тоғытып жіберіп, ең арзан макарон салып, соғып алады.
Ауылдан үзілмей қаржы мен почта жәшігімен сәлемдеме көбіне екі-үш жігітке келіп тұрады. Олар отбастарының қоңыртөбел тіршіліктері бар Талас өңірінен келген Жұмағали, кентаулық Қожабек пен біздің кейіпкер. Сонда келген қаржы да түп-түгел «ортақ қазанға» өтер еді. Ол сондайды санау, маған келген қаржы еді-ау деп өзіне деп бір қол орамал алып көрмепті. Не алынса да бесеуіне бірдей алынар еді. Бірі жетім, бірінің отбасы жетімсіздікпен күн кешіп жатқан достарын асырап, қалайда университетті бітіруді өз міндетіне алғандай мінез көрсететін.
Бір күні Жаңаарқадан екі жәшік сәлемдеме келсін. Соғымның шиманды сыбағасы. Ол: «өле жегенше, бөле жейік» деп, екі кострюльге толтыра асып, біраз көршілерді қонақ етіп жіберген. Қалған етті тор дорбаларға толтырып, терезенің желдеткішінен сыртқа шығарып қойып, әңгіме соғып жатқан. Бесеудің алды ұйықтап, соңғылары қалғи бастаған түн ортасы ауа екінші қабаттағы терезе әйнегі тықырлайды ғой. «Не болып қалды?» деп шамды жаққан кезде ұзын сырыққа байланған пышақ екі дорбаның бірін кесіп түсіріп, екіншісінің де жібі қиылуға тақап қалыпты. «Ой, әкетті» деп бұлар терезеге жеткенше соңғы дорба да жерге түскен. Олар киініп, тысқа шыққанша ұрылар тосып тұрсын ба, аз уақыт қуаныш болған бар қазыналары да бірге кетті. Олар қайтадан қойдың басын алуға кіріскен тұста тағы да оның үйінен екі жәшік сәлемдеме жетсін. Сөйтсе ол ертеңіне-ақ әке-шешесіне телефон шалып, байлығын ұрыларға өзі алдырғандай жедел түрде сәлемдеме жолдауларын өтініпті.
Айтпағымыз: оның достарына деген қамқорлығын, сонымен бірге, әрі бейіште нұрлары шалқығыр, Аманбек пен Ағлипа қариялардың туғандай болған ұлдарына деген қалтқысыз пейілдерін тағы бір айта кету болатын. Өзі де ол кісілерді ешуақытта аузынан тастамайтын.
* * *
Күнделікті дәрісті тыңдап келіп, бөлмеде тамақтанып болған соң бесеуі де орталық кітапхананың оқу залына тартар еді. Көздері қарауытып, бастары айналған кезде трамвайлатып жатақханаларына оралатын. Бір күні ол кітапханаға бармай белгісіз бағытқа беталды. Қайда баратынын құпиялады. Кешкілік көңілді оралған.
– Әй, бір сұлумен танысып келген ғой, – десті бөлмелестері.
– Сұлу емес, біртуар сұңғыламен танысып келдім, – дейді ол. – Жай сұңғыла емес, қазақтың маңдайына біткен біртуар ғұлама ғалым, академик Әлкей Марғұланның өзімен таныстым. Ол кісі Арқаға жылда барып, археологиялық қазбалар жасап жүргенде іздеп барып, екі-үш дүркін сәлем беріп едім, ұмытпапты.
Сол жылдардан бастап, басқасының барып сәлем беруге батылдары бармайтын Ғабит Мүсірепов, Сәбит Мұқанов, Евгений Бөкетов, Серік Қирабаев, Ақжан Машанов сияқты әдебиет пен ғылымның біртуарларына тым жақын жүріп, ізетті іні, білуге ынтық шәкірт бола білді. Бәлкім, оның әдебиет пен ғылымға дендеп бет бұруына сол ағалардың батасы өткен болар…
* * *
Ол – журналист. «Лениншіл жас» (қазіргі «Жас Алаш») «Социалистік Қазақстан», («Егемен Қазақстан») газеттері редакцияларындағы жылдар оның қаламгер болып қалыптасуына, ел-жұртты көп аралап, халқының рухани жан-дүниесіне тереңірек үңілуіне бірден-бір себепші болды. Тек қана сол бір кезеңнің өз ерекшелігіне орай, «Лениншіл жас» газетінің басшылары Қарағандыдағы меншікті тілшісіне мал қыстату, егін орағы туралы, т.б. күн тәртібіндегі қажетті тақырыпқа мақала жаз десе оның орнына күмбездер туралы, үңгірлер туралы мақалаларын жолдап, басшылардан реніш те естіп жүретін. Бұрындары «Социалистік Қазақстан» газеті редакциясынан қызметкерлерінің жүрістері естілмейтін. Осынау Ор.Комның органы болып тұрған газеттің беделді бір бөліміне меңгерушілікке барған бетте оның кабинетінен домбыраның қоңыр үні естілетін болды. Тіпті Жәнібек марқұм мен Қайраттар ән шырқап, Қаршыға, Шәмілдер күмбірлетіп күй тартатынды шығарды. Расында да өмірі өзгеше еді-ау. Осының бәрі де сан-салалы өнерін жетілдіре түсу, білгенінің үстіне біле түсу дейтін құштарлықтан туындап жатса керек.
Ең бастысы, қайда жүрсе де, қай жерді мекендесе де шашылып-төгіліп дос жинар еді. «Лениншіл жастағы» жеті жетім ағайынды жетеудей еді. Егер, бір-біріне деген достыққа қылау түсірмесе, солардың ұйытқысындай болып ол жүрер еді. Өмірден Оралхан өткенде, Ахметбектің Кәрібайымен қоштасқанда бауырымыздан айырылғаннан әрмен бір-бірімізбен жылап көрісіп едік. «Дүние – жалған» деп еді ол жылап тұрып. Дүниенің жалғандығын өзі де еске салып, Әбдірайымның Серігін ертіп оралмайтын ортаға қапияда аттанып кетті… Менің олжам біреу ғана. Ол – достар қоныс аударған «о дүние» деген мекеннің үрейлілігі туралы түсініктің түбірімен өзгеруі.
* * *
«Ол» дегенімнің менің Ақантайым, Ақселеуім екенін біліп отырсыңдар ғой. Есімін қағазға түсірген сайын, түске еніп, ойға оралған сайын жүрек шіркін тулап қоя береді. Таусылмайтын бір сағыныш.
Дүниеден көшерден бір күн бұрын науқасты болып жатқан Әбдірайымның Серігіне, Бексұлтан Нұржекеге, Құрманғалиев Қуанышбайға және маған телефон шалып еді. «Сағындым ғой, неге келмейсіңдер?» деп еді. Қоштасқаны екен ғой. Әлде: «Қалған тіршіліктеріңде сендер де сағынып өтіңдер», дегені ме екен? Егделенген кезде дос табу қиын деседі. Енді дос іздеп әуре де болмаспыз. Өзіңе деген сағынышымызды медеу етерміз, Ақантай!
Кәдірбек СЕГІЗБАЙҰЛЫ,
жазушы, Қазақстанның еңбек сіңірген қайраткері.
АЛМАТЫ.