– Қызым, – деген ол,– ең абзалы дәрігер болу. Қаншама адамға қуаныш сыйлайсың. Ал балалар дәрігері болсаң, тіпті жақсы. Баладан асқан бақыт жоқ қой.
Ана сөзі аманат іспетті. 1986 жылы Казгородок орта мектебін бітіргеннен кейін Целиноград мемлекеттік медицина институтында білім алды. Облыстық балалар ауруханасында табан аудармастан 18 жыл қызмет еткеннен кейін еңбек жолы қалалық емханада жалғасты. Осы жылдар ішінде мол тәжірибе жинақтады, білімін байытты.
Сол тәжірибесіне сүйенген балалар дәрігері Әлия Гайнутдинованың айтуына қарағанда, балалар бойындағы дерт жыл маусымына байланысты бірде азайып, бірде көбейіп тұрады екен. Мәселен, тыныс алу органдары, өкпенің қабынуы қақаған қыс айларында жиі кездеседі. Көктемнің де өз ерекшелігі бар. Кей жылдары белгіленген тәртіп бойынша жылу беру маусымы аяқталғанымен, жадыраған жаздың шуағын төгуі кешеуілдейді. Бұл енді солтүстік өңірге тән жайт. Қала пәтерлері қоңыржай салқын болған соң балалар ауруға жиі шалдығады. Ендігі бір мәселе осы жұқпалы дерт бой көтеріп, ауру белең алған тұста, онымен күресудегі қиындық. Маманның айтуына қарағанда, балалар дәрігері жетіспейді. Әрқайсысының жүктемесі екі-үш еседен келеді. Кадр тапшылығына негізгі себеп, жалақының жарытымсыздығы, баспананың жоқтығы, әлеуметтік-тұрмыстық жағдайдың нашарлығы.
Қазір балалар арасында ең жиі кездесетін ауру түрі – тыныс органдары екен. Күні-түні көк түтіннен арылмайтын қаланың ауасы да кесірін тигізіп жатқаны анық. Бір-біріне сабақтасып жатқан қиындық атаулыны кешенді түрде шеше алсақ, келер ұрпақ дерттен ада, тәні сау болып қалыптасады.
– Балғындар – ел болашағы, болашағымыз мықты болуы үшін де осы бастан ұзақ жыл бойы қордаланып қалған мәселелерді көп болып бірлесіп шешу керек,–дейді Әлия Гайнутдинова,–қазір мемлекет тарапынан жақсы қамқорлық жасалып отыр. Біздің емхананың жанында күндізгі стационар бар. Емделуі, дәрі-дәрмегі тегін. Ай сайын ондаған бала емделіп, құлан-таза жазылып шығады. Рас, кадр жетпеген соң уақытпен санаспай жұмыс істеуге тура келеді. Біз оған еш ренжімейміз. Өйткені баладан асқан бақыт жоқ қой.
Ақмола облысы
