Бұл сын өскелең ұрпаққа да қатысты. Өз өңірінің ғана тарихын білетін жас күні ертең тұтас елдің қамын қалай жейді, қалай білікті ұрпақ, болып қалыптасады?!
Енді осы олқылықтарды жекелеген оқу орындарының өзі толтырып жатқандығы қуантады. Қызылордаға Назарбаев Зияткерлік мектептерінің «Туған жерге тағзым» жобасы аясында Алматы мен Қостанай облысынан оқушылар экспедициясы келді. Олар бір апта бойы өңірдің тарихы мен мәдениетін және инновациялық нысандарды зерттемек. Өлкетану зерттеу экспедициясы алғашқы күні облыстық тарихи-өлкетану музейінде болып, өңірдің өткені мен бүгінгісін бедерлейтін экспонаттармен танысты. Сыр жағасында орын тепкен бұл аймақтың өз тарихында көрмеген құқайы жоқ. Айбалталары күнге жарқырап, қылыштары салақтап қоқаңдаған қоқандықтар Ақмешіт қалашығының негізін салды. Ресей патшасының оқпаны сорайған зеңбіректерін сүйреген орыс армиясы Перовск деп өзгертті. Сұлтанбек Қожанов бастаған алаш арыстары кемсіту мағынасын беретін «қырғыз-қайсақтан» қазақ атауын қайтарып, жаңа қалаға «Қызылорда» атауын бергенге дейінгі қилы тарихын білмекке құштар оқушылардың танымын жаңа деректермен толықтырды.
Оқушылар экспедициясы Қорқыт Ата атындағы университеттің археология және этнография орталығында Шірік-Рабат, Жанкент, Сығанақ, Ақмешіт атауын алған төрт астана орталығы болған көне қалалардың бай тарихымен танысты.
Облыстық әмбебап ғылым кітапханасында Сыр өңірінің мақтаныштары Әбділда Тәжібаев пен Қалтай Мұхамеджановтың шығармашылығына арналған көрмені аралады. Осында оқушылар Халықаралық Жазушылар одағының мүшесі, «Шабыт» шығармашылық фестивалінің жүлдегері, бірнеше жыр жинақтарының авторы Толқын Қабылшамен кездесіп, жеке шығармашылығымен танысты.
Оқушылар экспедициясы енді бір апта бойы Ақмешіт-Перовскінің тарихынан бөлек, Сығанақ қалашығының деректерімен, Қаратау бөктеріндегі қола дәуіріне жататын петроглифтермен және Сырдариясымен сұлу шаһардың ескерткіштерімен танысады. Туған жердің тарихын тану осындай ізгі ниеттерден басталады.
Қызылорда облысы
