- Электробустар қала тұрғындарының қозғалысын жайлы етіп қана қоймай, қоғамдық көлікті дамытудың жаңа драйверіне айналады. Электробустар қатты дыбыссыз жүреді әрі ауаға таралатын зиянды қалдықтар шығармайды,-дейді облыс әкімі Болат Бақауов.
Электробустардың бірін жүргізіп көрді. Ол рульге өзі отырып, қала ішімен жүрді. Бірақ, іші-сырты әбден тозған, жолаушыларға аса қауіпті шағын автобустарды да жүргізіп көрсе, өз көзімен «жайлы жағдайды» көрер еді.
Қаладағы «№1 автобус паркі» ЖШС-нің мәліметінше, 20 «Анкай» маркалы дизель отынымен жүретін автобустар жеткізілді. Сонымен бірге, сыйымдылығы үлкен электробустар келді. Нәтижесінде, қалалық автобус паркі 76 пайызға жаңарды.
Жаңа қоғамдық көліктер №5, 10, 21, 22 бағыттарындағы қалалық маршруттарда, сондай-ақ, облыс орталығының ауылдық аумақтарының арасындағы маршруттарға қызмет көрсетеді. Электробустар 2013-2020 жылдарға арналған еліміздің «Жасыл экономикаға» көшу Концепциясын жүзеге асыру шеңберінде сатып алыныпты.
- Автобустар мен электробустарда жолаушылардың жайлылығы үшін, әсіресе, мүмкіндігі шектеулі жандар үшін барлық жағдай жасалған, – деді «Бәйтерек» холдингінің басшысы Айдар Әріпханов. – Елімізде бірнеше кәсіпорын электробустарды жасап шығарумен айналысады.
Сонымен қатар, Павлодарға 4 жаңа трамвай жеткізілді. Трамвай басқармасының көліктерін жаңғырту шеңберінде қыркүйек айында белорустық «БелКоммунМаш» зауытында құрастырылған тағы да 5 вагон әкелінуі керек.
Павлодар
Суретті түсірген: Валерий Бугаев
