1911 жылдың 13 маусымында жазылған «Қазақ елінің уставы» соның айқын айғағы. «Қазақ» газетінің 1914 жылғы №90 санында Ә.Бөкейханның «Барлыбекті ұмытпасқа» атты мүнаһиб-мақаласының жазылу сыры да осында жатыр.
Жақында қаламгер, жас ғалым Елдос Тоқтарбайдың тарихи толғамға негізделген «Барлыбек туралы бірер сөз...» атты кітабы жарық көрді. Кітапта саяси қайраткер, қазақ халқының құқығын қорғауға жан салған Б.Сырттановтың өмір жолы, қызметі және отбасы мен ұрпақтары жайында кеңірек қамтылған. Заңгер Барлыбек Сырттановтың есімін жаңғыртып, қазақ тарихындағы орынын анықтауда аталған кітаптың маңызы зор. Жаңашылдығы сол, кітапқа бұрын-соңды жарияланбаған тың ақпараттар мен архивтен табылған құжаттар енгізілген. Еңбекте Барлыбектің ғұмыр жолы мен қызметіне қатысты өзіндік болжамдары мен тұжырымдары да қамтылған. Тіпті, тарих тасасында қалған тарланның жан-жақты қабілетін анықтап, тілге тиек еткені де көрінеді. Мәселен, кітап кейіпкері білім-ғылымнан бөлек, дәрігерлік саланы да меңгергенге ұқсайды. Сондықтан оның «Дәрілік өсімдіктер» еңбегін жазуы тегін емес. Ең бастысы кітапты оқып шыққан оқырман өткен кезеңдерде қазақ қоғамының дерті болып жабысқан, өзекті мәселелерді сауатты түрде жеткізіп, күресе білген ерен тұлғаның тұтас ғұмырынан хабардар болады.
