Мысалы, аға буын арасында Түркістан қаласының тұрғыны Тасболат Сүйінбаевты атайтындар көп. Оның қолынан шыққан ат әбзелдері ең мәртебелі деген қонақтарға ұсынылатынын, 1992 жылы Ордабасыда бас қосқан Қазақстан, Қырғызстан және Өзбекстан президенттері мінген ақбоз аттардағы ер-тұрмандар Тасболаттың қолымен жасалғанын еске салатындар да бар. Төлеби ауданының тұрғыны Құрбанәлі Арыстанбектің ер-тұрманын мақтайтындар да жетерлік. Ал Мақтаарал, Жетісай және Шардара аудандарының көкпаршылары мен шабандоздарына Атакентте тұратын шебер Бақыт Арапқұловтың есімі жақсы таныс. Оған еліміздің өзге өңірлерінен келіп тапсырыс берушілер аз емес екен. Шебер ат әбзелдерін үйінде жасайды. Аталған өнерді 25 жылдан бері кәсіп етіп келеді. «Республикалық «Көкпар» федерациясының президенті, даңқты боксшы Мұхтархан Ділдәбеков өмірге келген өңірде ғана емес, елімізде ат спорты, қазақтың көкпар өнері дамып келеді. Бәйгеге қосатын тұлпарлардың ат әбзелдерінің көз тойдырар көркемдігі де көп жайтты білдіреді. Яғни ат иелерінің тұлпарына деген қамқорлығы мен ықыласын көрсетеді. Сондықтан әр аттың тоқымы, желдігі, терлігі, тартпасы, тұяқтығына дейін өзіне жарасымды дизайнымен қонымды, шап-шақ етіп жасалады», дейді шебер.
Алғашында арқан өруден бастап, кейіннен ноқта, былғарыдан белдік, өзге де заттарды жасай бастаған шебер мініп жүрген жеңіл көлігін сатып заманауи тігін машинасын сатып алған. Содан бері жаңаша дизайндарды қолданып, тынымсыз ізденіс үстінде жүретін шебердің айтуынша, өрмеден жасалған таралғы, жүген, ноқтаға сұраныс көп. Таза былғарыны арнайы тапсырыспен Ресейден алады екен. «Бір атқа шамамен 300-400 мың теңгеге, тіпті барлық жабдығы түгел болсын десе 500-600 мың теңгеге дейін жабдық керек», дейді Бақыт Арапқұлов. Шебер алдағы уақытта кәсібін кеңейтіп, қолынан іс келетін 5-6 адамды тұрақты жұмыспен қамтуды жоспарлап отыр.
Түркістан облысы
