Нақтырақ айтсақ, Қырғыз елінің Баткен облысындағы Ақ-Сай ауылы мен Тәжікстанның Ворух анклавының шекарасында кикілжің шықты. Қырғыз шекарашыларының мәліметінше, Ворух тұрғындары ауылға кіре берісте флагшток орнатқан кезде жанжал шыққан, соңы қарулы қақтығысқа жалғасқан. Шекарашылар ауыл тұрғындары аңшы мылтығынан оқ атқан деп отыр.
Ал Тәжікстан тарабының мәліметі басқа. Олардың сөзіне сенсек, жанжал барысында қырғыз ауылының азаматтары оқ атқан. Тәжікстан Ішкі істер министрлігінің ақпаратынша, тәжікстандық бір азамат қаза болып, тәжік милициясының подполковнигі жараланған. Зардап шеккен он адамның үшеуіне оқ тиген, жеті азамат тиген тастан жарақат алған. Қырғыз жағынан 15 адам жараланған, оның 12-сіне оқ тиген, үш адам тастан зардап шеккен. Жараланғандар арасында милиция қызметкері мен шекарашы бар көрінеді.
Ал 23 шілде күні тағы да атыс болып, бір шекарашы жараланды. Аймақта шекара қызметі күшейтілген тәртіпке көшті. Қазір Исфара – Ворух жолы жабылды. Тәжік жағы Лейлек ауданына апаратын Исфана-Баткен жолындағы қозғалысты да тоқтатты. Қырғыз еліне қарасты Баткен ауданындағы Ақ-Сай ауылынан 315 адам басқа жерге көшірілді.
Жалпы қос елдің арасындағы шекарада мұндай қақтығыстар жиі тіркеліп тұрады. Биыл наурыз, маусым айларында да осындай оқыс оқиғалар болған еді. Оның себептері де бар: екі тараптың халқы су, жер, жайлауды бөлісе алмай қалады. Қантөгіске дейін жеткен кездер де баршылық. Әлі анық шекара сызылмаған әрі даулы жер деп Тәжікстанның Бободжон-Гафуров және Исфарин аудандары мен Қырғыз Республикасының Лейлек және Баткен аудандары шектескен территория есептеледі. Екі ел арасындағы шекараның жалпы ұзындығы 970 шақырым, оның тек 519 шақырымы бойынша екі ел арасында келісім жасалған.
Шекарадағы жанжал Қырғыз елінің президенті Сооронбай Жээнбековтің Тәжікстанға сапары қарсаңында шықты. Осы кездесуде қос тарап шекараның әлі белгіленбеген бөлігін, жоғарыда аталған жанжалдарды талқылауы мүмкін.
