БАТЭ – «Астана»: қай команда топтық кезеңге шығады?

Сейсенбі күні «Астана» коман­дасы­ның мүшелері «Нұрсұлтан Назарбаев халықаралық әуежайынан» ұшаққа отырды. Бағыт – Белоруссияның Минск қаласы. Жергілікті уақытпен 11:00-де әуеге көтерілген ұшақ бортында жиырмаға жуық футболшы мен жаттықтырушылар құрамы бар. Сондай-ақ еліміздің бірқатар БАҚ өкілдері де командамен Минскіге барғанын айта кетейік. Сөйтіп араға төрт сағат салып әуе көлігіміз Минск халықаралық әуежайына қонды. Ауа райы жылы, шамамен 25 градус.

«Астана» командасы Белоруссияға жоғары көңіл күймен келді. Себебі өткен аптада өз алаңында Еуропа лигасының БАТЭ-ге қарсы Нұр-Сұлтанда өткен алғашқы матчында 3:0 есебімен жеңсе, араға екі-үш күн салып ел чемпионатының кезекті турында «Тараз» командасын 5:0 нәтижесімен тас-талқанын шығарды. Сондықтан соңғы бес ойында тек ірі есеппен жеңіске жетіп келе жатқан «Астана» футболшыларының көңіл күйі нашар деп айта алмаймыз.

Дегенмен бас бапкер де, футболшылар да берген сұхбаттарында жеңістің эфория­сына берілмей, сырт алаңдағы матч 0:0 есебімен басталатынын ұмытпай, тек жеңіс үшін ойнайтындарын айтуда.

Сондай-ақ БАТЭ де өз біріншілігінің кезекті турында «Славия» командасынан 4:0 есебімен басым түсіп, өздеріне де, жан­­күйер­леріне де сенім отын жаққандай болды. Бірақ жергілікті жанкүйерлер «Аста­наға» қарсы өтетін қарымта матч­та өз командаларының жеңіске жетіп, топ­тық кезеңіне шығатынына сенбейтінін айтуда.

Жанкүйерлерді былай қойғанда, БАТЭ-нің бас бапкері Алексей Бага елор­дада өткен кездесуден кейін коман­д­асының топтық кезеңге шығуға мүмкін­діктері өте төмен екенін айтқан болатын. Дегенмен футбол 90 минут емес, төрешінің соңғы ысқырығына дейін жалғасатынын ескерсек, бүгін екі коман­даны да өте тартысты және қызыққа толы матч күтіп түр. Сондай-ақ жергілікті ко­манда өз алаңында барын салып, жан­күйерлерін қуантуға тырысатыны анық.

Хош, кеше БАТЭ мен «Астана» командалары ашық жаттығу жиынын өткізді. Артынша бас жаттықтырушылар баспасөз мәслихатында журналистердің сұрақтарына жауап берді.

Алдымен сөз алған БАТЭ коман­да­сының бас жаттықтырушысы Алексей Бага: «Менің командам ертеңгі ойынға дайын. Біз Қазақстанда деңгейімізді толықтай көрсете алмадық. Бірақ ертең кездесу басқаша жағдайда өрбиді. Кеткен есені қайтаруға мүмкіндігіміз толық жетеді», деді. «Бір апта бұрын ғана «Астанадан» 3:0 есебімен жеңілген команда аз уақыт ішінде өз қате-кем­шіліктерін түзеп, жеңіске жете ала ма?» деген сауалға белоруссиялық маманның берген жауабы мынадай болды: «Кез келген команда үшін өз жанкүйерлерінің алдында өнер көрсеткен әлдеқайда жеңіл. Қазақстанда өткен ойында «Астана» шабуылшылары қорғаушыларымызды әбден әбігерге түсірді. Бірақ ертең ондай проблема болмайтынына сенімдімін. Өйткені кеткен кемшіліктер осы жолы қайталанбас үшін жұмыс істедік. Ертең – соның жемісін көретін кез».

Осыдан кейін «Астана» командасының бас жаттықтырушысы Роман Григорчук журналистер сауалына жауап берді. «Ертең біз үшін ең қиын ойындардың бірі болмақ. Себебі БАТЭ ойыншылары Нұр-Сұлтанда кеткен есені қайткенде де қайтаруға білек сыбана кірісетіні белгілі, – деп бастады өз сөзін украин маманы. – Оның үстіне, БАТЭ – өз алаңында есе жібермейтін команда. Әйткенмен, біздің жігіттер топтық кезеңіне шығу үшін же­ңіске жету керектігін жақсы біледі. Сондықтан біз де шайқасқа дайынбыз».

Сондай-ақ бас бапкер бүгінгі ойынға шабуылшы Фирмин Мубеленің қатысу-қатыспауы беймәлім екенін айтты. Себебі конголық футболшы БАТЭ-ге қарсы өткен алғашқы ойында аздап жарақат алып қалған. Егер дәрігерлер рұқсат берсе, Мубелені жасыл алаңнан көріп қалуымыз да мүмкін.

БАТЭ – «Астана» матчына шотлан­дия­лық төрешілер бригадасы қазылық етеді. Алаңдағы бас төреші Бобби Мэдденге қапталдан отандастары Дуглас Росс пен Дэвид Рум көмектеседі. Төртінші төреші – Дональд Робертсон.

Екі команда арасындағы кездесу бүгін Белоруссияның Борисов қаласындағы «Борисов-Аренада» өтеді. Матчты отандық «Қазспорт» телеарнасы Нұр-Сұлтан уақыты бойынша түнгі 23:00-де тікелей эфирде көрсетеді.