Бірден айтайық, биылғы жаһандық біріншілік Қазақстан үшін сәтсіз болды. Себебі Таиландқа барған «толағайларымыз» бір ғана медаль иеленді. Жалпы, Қазақстан құрамасынан әлем біріншілігіне тоғыз атлетіміз барған-ды. Жаһандық дода алдында құрама бас бапкері Юрий Мельников ерлер арасында Денис Улановтан, қыздар бәсекесінде Зүлфия Чиншанлодан жүлде күтеміз деген болатын. Бірақ екеуі де жүлдеге іліге алмады. «Олимпиадаға іріктеу кезеңдерінің жаңа ережесі бойынша біздің басты мақсатымыз – жекелей сында мейлінше көбірек ұпай жинау. Дегенмен, қыздар бәсекесінде әлем чемпионатының жүлдесінен басты үміткерлердің бір – Зүлфия Чиншанло. Ол қазіргі таңда қазақстандық ауыр атлеттер арасында рейтингте көш бастап тұр. Ал ерлер арасында Денис Улановқа көп үміт артамыз. Қалған спортшыларымыздан да жақсы нәтиже күтетінімізді жасырмаймын», деген болатын.
Жиырма жастағы қаһарман
Бірақ екі спортшы да бас бапкердің сенімін ақтай алмай, жүлдеден құр қалды. Десе де, 20 жастағы Игорь Сон бүкіл құраманы әлем чемпионатынан жүлдесіз оралудан құтқарып, бір күнде қаһарман атанды. Отандасымыз әлем біріншілігіне алғаш рет қатысып тұрса да, күміс медаль олжалады. 55 килода сынға түскен ол серпе көтеруде 120 кило зілтемірді көтерсе, жұлқа көтеру бағдарламасында 146 килоны еңсерді. Екі жаттығу қорытындысы бойынша, 266 кило салмақты бағындырып, әлем чемпионатының күміс жүлдегері атанды. Естеріңізде болса, Игорь тамыз айында Талдықорғанда өткен Қазақстан Спартакиадасында екі жаттығу қорытындысы бойынша 260 кило зілтемірді көтеріп, Қазақстан рекордын жаңартқан болатын. Екі айдың ішінде өз нәтижесін 6 килоға жақсартқан отандасымыздың болашағынан зор үміт күтуге болады.
Бұл салмақта топ жарған Солтүстік Корея спортшысы Ом Юн Чхоль екі бірдей әлем рекордын орнатты. 294 (128+166) килоны еңсерген ол жұлқа көтеруде және жалпы есепте әлем рекордын жаңартты. Бұған дейінгі жұлқа көтерудегі рекорд 162, жалпы есепте 293 кило болатын. Сондай-ақ отандасымыздан бір кило кем көтерген (265 кило, 118+147) Сауд Арабиясы өкілі Мансур Абдулрахим 265 кило салмақпен үздік үштікті түйіндеді.
Сонымен қатар осы салмақта өнер көрсеткен тағы бір қазақстандық спортшы, былтырғы әлем чемпионатының күміс жүлдегері Арли Чонтей 263 киломен (118 +145) бесінші орын иеленді. 2008 жылы Қытайдан Қырғызстанға қоныс аударып, 2012 жылы Лондон Олимпиадасының қарсаңында Қазақстан азаматтығын алған Арли Чонтей 7 жылдың ішінде төрт рет қана бізді жүлдесімен қуантты. 2017 жылы Тайпэйдегі Универсиада ойындарында қола медальға ие болса, былтыр Ашғабатта өткен әлемдік додада күміс алды. Ал биылғы Азия чемпионатында қола медаль еншілеген болатын.
Олимпиада жүлдегерлері жүлдесіз қайтты
Паттайядағы әлем чемпионатына бұған дейін Олимпия ойындарында жүлде алған (Илья Ильин мен Зүлфия Чиншанлоны қоспағанда) екі спортшымыз барған еді. Бірақ екеуі де Таиланд астанасынан құралақан қайтты. Рио-де-Жанейро Олимпиадасының чемпионы Ниджат Рагимов 17-орынды қанағат тұтты. Осыдан 4 жыл бұрын АҚШ-та өткен әлем чемпионатында, 3 жыл бұрын Рио төрінде 77 килода қарсылас шақ келтірмеген Ниджат ПаттаЙяда жаңа салмақта яғни 81 килода өнер көрсетті. Былтыр Ашғабатта өткен дүниежүзілік біріншілікте 77 килода сынға түсіп, сегізінші орын алған болатын.
Биылғы әлем чемпионатында С тобында сынға түскен спортшының алғашқы сайыста жолы болған жоқ. Жұлқа көтеруде 145 киломен шектелді. Мысалы, ол Олимпия ойындарында бұл сайыста 165 килоны көтерген болатын. Серпе көтеруде 189 киломен шектелді. Жалпы есепте 334 киломен 17-орынды місе тұтты.
Бұл салмақта бірінші орынды 77 килода Рио Олимпиадасының күміс жүлдегері атанған қытайлық Люй Сяоцзюнь жеңіп алды. Ол жаңа салмақта екі бірдей әлем рекордын орнатты. Екінші орынға тағы бір қытайлық Ли Даинь (377 кг) тұрақтаса, үздік үштікті колумбиялық Брайан Родальега (363 кг) қорытындылады.
Денис Уланов та (89 кг) ел сенімін ақтай алған жоқ. Қоссайыс қорытындысы бойынша 358 кило зілтемірді өзіне бағындырған ол 10-орынға табан тіреді. Айта кетейік, Уланов Рио Олимпиадасының қола жүлдері.
«Допингсіз чемпиондар»
Допингпен ұсталып, Олимпия ойындарының алтынынан айырылған Зүльфия Чиншанло мен Илья Ильин үшін әлем чемпионаты сәтті бола қойған жоқ. 55 килода сынға түскен Чиншанло қоссайыс қорытындысы бойынша 213 (93+120) килоны бағындырып, төртінші орын иеленді. Бұл бәсекеде қытайлық Цуньюнь Ляо (227 кг) топ жарды. Екінші орынды тағы бір қытайлық спортшы Ваньцунь Чжан иеленсе, үздіктер үштігін филиппиндік атлет қорытындылады. Зульфия Чиншанло соңғы 4 жыл көлемінде халықаралық аренадағы жарыстарға қатысқан жоқ. Былтыр 10 маусымда екі жылға созылған «шеттетілу» мерзімі аяқталып, спортқа қайта оралған болатын.
Допингке байланысты біраз жылдық үзілістен кейін үлкен спортқа қайта оралған Илья Ильин биылдан бастап бірнеше жарысқа қатыса бастады. Сәуір айында Қытайда өткен құрлықтық жарыста 345 (160+185) кило салмақты көтеріп, жалпы есепте бесінші орын иеленген болатын. Сондай-ақ маусым айында British International Open турниріне қатысып, 350 (165+185) киломен қола жүлде алған-ды. Ал тамыз айында Қазақстан Спартакиадасында топ жарды.
Әлем біріншілігінде 96 килода сынға түскен отандасымыз қоссайыста 363 килоны бағындырып, (168+195) бар болғаны 13-ші орынға табан тіреді. Бәсекеден кейін Илья Ильин өзінің нәтижесі туралы пікір білдірді. «Жалпы алғанда, әлем чемпионаты жоғары деңгейде өтті. Өзімнің нәтижеме көңілім толады. Бәрін жоспар бойынша орындадым. Менің басты мақсатым – 10-14 орыннан көріну керек болды. Нәтижесінде 13-і орын иелендім. Менің жасыма бұл жаман нәтиже емес деп ойлаймын. Мен қазір ұлттық құрамада бірінші нөмір емеспін. Бұл нәтижеден кейін екінші орынға көтерілетін шығармын. Ал бірінші орында Денис Уланов тұр», дейді ол. Сондай-ақ Ильин желтоқсан айында Қатарда өтетін додаға қатысуды жоспарлап отыр.
Жалпы есептегі жағдай
Қазақстан әлем біріншілігінде 1 күміс медальмен жалпы командалық есепте 12-орынға тұрақтады. Бізбен бірге допинг дауына тап болып, 2017 жылы дисквалификацияға ұшыраған Қытай мен Солтүстік Корея құрамаларының нәтижесі тәп-тәуір. Қытай 10 алтын еншілеп, жалпы командалық есепте топ жарды. Екі алтыны бар Солтүстік Корея екінші орында. Үздік үштікті 2 алтынмен Армения құрамасы қорытындылады.
Тағы бір айта кетерлік жайт, Қазақстан құрамасы осымен үшінші әлем чемпионатынан алтын медальсыз оралып отыр. Ең алғаш 2013 жылы Польшадағы чемпионатта алтын бұйырмаса, екінші рет былтыр Ашғабатта өткен біріншілікте атлеттеріміз топ жара алмады. Міне, биыл да «толағайларымыз» тау қопара алмады. Екі жыл қатарынан алтын ала алмай, сәтсіздікке ұшыраған спортшыларымыз бен ауыр атлетика федерациясының басшылығы қалай ақталар екен?
