Экономика • 11 Қараша, 2019

17,5 мың құйма алтын сатылды

14 реткөрсетілді

2017 жылдың мамыр айында елімізде тазартылған алтын құймаларын сату мен сатып алу бағдарламасы іске қосылғаны мәлім. Содан бергі аралықта екінші деңгейлі банктерден ел азаматтары барлығы 17,5 мыңға тарта құйма алтын сатып алды. Бұл туралы Ұлттық банкке сілтеме жасай отырып LS хабарлады.

– 2017 жылғы 31 мамырдан 2019 жылғы 25 қазанға дейін­гі аралықта екінші деңгейлі банк­­тер жалпы салмағы 523,3 кило тартатын 13,2 мың алтын құй­масын сатты. Оған қоса валюта айырбастау пункттері арқылы жалпы салмағы 118,1 кило болатын 4,2 мың құйма алтын өткізілді. Осылайша ел азаматтары сатып алған таза алтынның салмағы 641,2 килоны құрады, – делінген LS таратқан ақпаратта.

Таяуда World Cold Council әр елдегі алтын қоры мен оны халық санына шаққандағы көрсеткіш туралы да хабар­лаға­нын айта кетейік. Бұл тізімге көз жүгіртсек, алтын қоры 377,3 тон­наға жеткен Қазақстан дүние жүзі бойынша 13-орынға көтерілді. Яғни, елімізде 18,6 мил­­лион­нан астам халықтың жан ба­сы­на шаққанда әр азамат­қа 20,2 грамм алтыннан келеді деген сөз.

Дүние жүзі бойынша бағалы металл қоры ең көп елдердің көшін Швейцария бастап тұр. Швейцарияның 1040 тонна алтын қорын жан басына шаққанда 120,7 грамнан асады. Одан кейінгі орында Италия, Германия, Португалия сынды елдер орналасқан.

Әлем бойынша алтын қоры жан басына шаққанда ең аз көлемнен келетін елдердің тізімін Жапония (6,03 грамм), Қытай (1,35 грамм), Үндістан (0,45 грамм) түйіндейді.

Қазақстанда алтын құйма­сын сату бағдарламасы бойынша құйманың 5 түрі ұсынылған болатын. 5, 10, 20, 50 және 100 грамм тартатын құймалардың ішінде саны бойынша ең көп сатылғаны 10 грамдық құйма – 33 пайыз. Ал салмағына келер болсақ, сатылған барлық алтынның 59 пайызы 100 грамдық құйма.

Банктер мен айырбастау пункт­терінде сатылатын әр­бір құйма алтынның беті сырт­қы соққылардан қорғайтын қорғаныш элементпен жабыл­ған. Бетінде бұғының суреті, құйманың тазалығын білдіретін 999,9 деген цифр, Ұлттық банк­тің логотипі бейнеленген.

 

Соңғы жаңалықтар

Тәуелсіздік – тұғырым

Аймақтар • Кеше

Күлкі керуені № 25

Руханият • Кеше

Ұқсас жаңалықтар