Тәуелсіздіктің алғашқы жылдары, кеңестен кейінгі кеңістікте дағдарыс пен жұмыссыздық, белгісіздік пен берекесіздік жайлаған уақытта Президентіміздің даналығы мен саяси ерік-жігерінің арқасында мемлекетімізді дамытудың дұрыс бағыты таңдалды. Нәтижесінде ол Қазақстан халқын біріктіріп, біздің миллиондаған бұрынғы жерлестеріміз басынан өткерген ағайындық алауыздықтан алшақ болуға мүмкіндік берді. Бүгінде Қазақстан халқының Н.Ә. Назарбаевқа оның сонау бір ауыр сынақ жылдары адамдар бойында азаматтық пен Отанға деген сүйіспеншілік сезімін қалыптастырғаны үшін алғысы шексіз.
Елімізді дамытудың қай бағытын алып қарасақ та, біз Нұрсұлтан Назарбаевтың қомақты үлесінің куәгері боламыз. Тәуелсіздігіміздің алғашқы жылдарынан бастап бүгінгі күнге дейін Елбасымыздың бар күш-қайраты, қызметі Қазақстан мемлекеттілігін нығайтуға, ұлттарды ұйыстыруға және биік мақсаттарға қол жеткізуге бағытталған. Қазақстанның Тұңғыш Президентінің ойлау өресінің кеңдігі мен батылдығы, пәрменділігі мен көрегендігі әрдайым объективті прагматизммен үйлесіп отырады. Ал болашақты бағдарлап, оны көре білу саясатта да, экономикада да нық қадамдар жасауға себепші болған жағдайлар аз емес. Елбасы бастамашы болып, еліміздің айнасына айналған оқиғалар мен фактілер тізбесін көптеп келтіруге, олардың ішінде астанамызды көшіру туралы тарихи шешімді, Қазақстан халқы Ассамблеясын құруды, Әлемдік және дәстүрлі діндер съезін өткізуді атауға болады. Н.Ә.Назарбаевтың Семей ядролық полигонын жабу және еліміздің әлемдік ядролық державалар қатарынан ерікті түрде шығуы туралы батыл шешімі тарихта мәңгі қалады.
Тұңғыш Президент Қазақстанды қуатты әрі гүлденген мемлекетке айналдыру үшін барлығын жасады. Қоғам қайда бара жатқанын әрдайым түсінді және Елбасы бағдарын қолдады. Тұңғыш Президентіміздің «Алдымен экономика, одан кейін саясат» деген жетістікке жетудің негізгі формуласы бүгінгі күні де жұмыс істеуде.
Н.Ә.Назарбаевтың еліміздің басты арнаулы қызметін құру мен қалыптастырудағы үлесі де орасан зор. Бұл жерде де әмбебап формула қалыптасты: «Ұлттық қауіпсіздік жоқ жерде – мемлекет те жоқ». Бұл қатаң құрылым, бірақ оны қазіргі болмыс пен тарихи фактілер талап етуде.
Сол бір жылдары еліміздің геосаяси жағдайы ұлттық қауіпсіздікті қамтамасыз ету, жас егемен еліміздің мемлекеттілігі мен аумақтық тұтастығын сақтау саласындағы стратегиялық міндеттерді ұтымды шешу жолдарын іздеуді қажет етті. Ең алдымен, оны заңды түрде бекіту керек болды. Сонымен Президент Нұрсұлтан Назарбаев 1992 жылғы 20 маусымда «Қазақстан Республикасының Ұлттық қауіпсіздік органдары туралы» Заңға қол қойды, ол тәуелсіз мемлекеттің дербес арнаулы қызметі әрекетінің құқықтық негізін қалады. Заң ұлттық қауіпсіздік органдарының жүйесі, олардың құзыреттері мен қызмет қағидаттары туралы алғашқы ашық құқықтық акт болды. Осы құжат осыған дейін еліміздің жалпы қауіпсіздікті қамтамасыз ету жүйесінде қалыптасқан ҰҚК рөлі мен орнын, оның арналуын, міндеттері мен құзыретін нақты айқындап берді. Ал 1992 жылы 13 шілдеде ел Президентінің Жарлығымен МҚК Қазақстан Республикасының Ұлттық қауіпсіздік комитеті болып құрылды.
Бұдан кейін қабылданған «Жедел-іздестіру қызметі туралы», «Сыбайлас жемқорлыққа қарсы күрес туралы», «Терроризмге қарсы күрес туралы», «Мемлекеттік құпиялар туралы» және басқа да заңдар Ұлттық қауіпсіздік комитеті қызметінің құқықтық негізін кеңейте түсті.
Құжаттар жинағын қабылдау қажеттілігі Мемлекет басшысының кез келген қауіп-қатерге қарсы күрестің айқын құқықтық негізде жүргізілуі тиіс екендігіне көз жеткізгендігінен туындады. Жалпы тұрақты дамуға қарамастан, еліміз қауіпсіздікке қарсы ішкі және сыртқы қауіп-қатерлерге ұшырады. Ішкі оппозиция тарапынан конституцияға қарсы іс-қимылдар әрекеті, сырттан егемендік пен аумақтық тұтастыққа қолсұғушылықтар тіркелді. Дәл осы тұста Елбасы мүлтіксіз постулат – айқын құқықтық негіз екенін атады.
Бүгінде, Тұңғыш Президентіміздің көреген саясатының арқасында ел аумағында БҰҰ, ТМД, ҰҚШҰ, ШЫҰ-ның бірқатар халықаралық нормативтік құқықтық актілерін, сондай-ақ екіжақты келісімдер мен шарттарды ұлттық заңнамаға ратификациялау мен имплементациялаудың мемлекетішілік рәсімдері іске асырылды. Олардың одан әрі іске асырылуын қамтамасыз етуді ұлттық қауіпсіздік органдарына сеніп тапсырды.
Жеке алып қарағанда, Н. Назарбаев Қазақстан жастары мен өскелең ұрпаққа үлкен мән береді. Өзінің 2018 жылғы Жолдауында ол былай деп мәлімдеді: «Жастар – еліміздің бәсекеге қабілеттілігінің негізгі факторы. Біз бәсекеге қабілеттілік туралы айтып отырмыз және әлемнің осындай 50 мемлекетіне кірдік. Алайда ол аз. Бүгін тек мемлекеттер емес, сондай-ақ адам мен адам бәсекесі жүруде. Онда ғылым мен білімді көтеретін және қалыспайтын креативті буыны бар ел жеңеді. Мен оны бүгін көріп отырмын. Қазақстанның болашағы дәл сендерге, сендердің күш-қуаттарыңа, білімдеріңе байланысты. Мен мұны барлық қазақстандық жастарға айтып отырмын».
Ұлттық қауіпсіздік комитеті осы бағытта ауқымды жұмыс жүргізуде, егемен Қазақстанның негізгі құндылықтарын ілгерілетуге – ұрпақтар сабақтастығын дамытуға және бірлікті нығайтуға бағытталған қазақстандық қарсы барлаушы кадрларды даярлау жүйесі жаңғыртылуда. ҰҚО ардагерлері отансүйгіштік пен Отанға сүйіспеншілік сезімін сіңіру үшін жастармен белсенді жұмыс жүргізуде.
Мемлекеттің ұлттық қауіпсіздігі – бірінші кезектегі міндет. Оны іске асыру елдің саяси басшылығының, оның азаматтары мен қоғамының басты назарында. Отандық арнаулы қызмет – ұлттық қауіпсіздік органдарының қалыптасуы Қазақстан Республикасы Тұңғыш Президентінің ұдайы қолдауы мен назарында өтті. Сенім тек қанаттандырып қоймайды, сонымен қатар еліміздің ұлттық қауіпсіздігін жетілдіру және рухани егемендігін қамтамасыз ету үшін жаңа белестерге бастайды.
