Осы жолы арнайы ат басын бұруымызға аудан әкімі Нұрлан Сейіловтің Мусиндердің отбасы жайлы риза көңіл әңгімесі себепкер болып еді. Осындағы жеті ағайынды жігіт астық кептіргіш кешенін шығарады. Жай ғана шығарып қоймайды, толық циклде, яғни еліміздің кез келген аймағынан тапсырыс берушілерге өз қолдарымен дайындаған күрделі жабдықтарды өздері барып, орнатып береді және шеберлік сыныбын өткізеді. Бұған әрине, селт етпейтін кісі болмас.
Бірақ журналистер қауымы «AZAM-КC» серіктестігінің тыныс-тіршілігінен мүлдем хабарсыз деуге келе қоймас. Жалтырдағы жақсы істер жайында бұрын да естігенбіз. Ұмтылысы ерекше ұжымды Аязбек Мусиннің құрғандығы, 2016 жылы өңірлік сында 1 орынды жеңіп алғандығы, «Алтын сапа», «Қазақстанның үздік тауары» байқауларына қатысқандығы, 2018 жылы республикалық байқауда жүлделі үштіктің қатарына қосылғандығы, ал 2019 жылы «Қазақстанның үздік тауары» облыстық байқауында жеңімпаз атанғаны туралы құлағдармыз. Әйткенмен, ауыл жастарымен жақын кездесіп, ашық әңгімелесудің сәті түспеп еді. Бүгінде Қарағанды университетінің түлегі Аязбек Сейілбекұлы ірі компания мәртебесіне көтерілген ұжым басшысы болса, інісі Заманбек Жалтырдағы кәсіпорынның директоры екен.
Аязбек інісін ертерек шыңдағаны байқалады. Заманбекті қара жұмыстың барлығына да салып, университетте үздіктер қатарында болуын қатаң қадағалағандай. Әсіресе Төңкеріс астық қабылдау кәсіпорнында атқарушы директор қызметін атқарғандығы тәжірибе қалыптастыру ғана емес, жаңа ізденістерге бастағаны деп ұқтық. Заманбектің сөздерінде техникалық терминдер көбейе бастаған шақта, аздап күлімсіреп, бізді алып ангардағы өндіріс құшағына бастады.
Мұндай кәсіпорында тарсыл-гүрсілсіз бола ма? Әйткенмен, кейбір зауыттардағыдай найзағай жарқылдап, жер сілкіндіргендей құлақ тұндырар қатерлі жағдай жоқ мұнда. Барлық жұмыс көп деңгейлі жүйемен автоматтандырылған. Жұмыс барысы әлемдік деңгейдегі «OVEN» компаниясының электроникалық жабдықтарымен басқарылады. «3D» деңгейіндегі 18 түрлі лазерлік станоктар конструктор Артем Леоновтың сызбаларына сәйкес пішіліп, кесіліп, әп-сәтте құрастыру жабдықтарына айналып жатыр. Бұл ақылды станоктарды Қытай мен Ресейдің өндіруші ұйымдарының өкілдері орнатып, жергілікті операторларды машықтандырып кетіпті. Ал шикізат өз елімізден.
Жалтырдағы зауыт әріптестеріне дәнді, майлы және бұршақ дақылдарын өңдейтін «КС» маркалы заманауи астық кептіргіштерінің үш түрін ұсынады. Мұндай кешендер бастапқы ылғалдылығы 35 пайыздық өнімді сағатына 25, 30 және 50 тоннаға дейін кептіреді және түпкі нәтиже 8 пайызға төмендейді екен. Яғни, қабылданған дақыл 1-2 кластық базалық кондицияға жеткізіледі. Жалпы, «Optim-Мus» кешенінің толық қамтылған құрамы «Бастау+» қауыз тазалағыштарынан, «Калибр» және аэродинамикалық «Колос» сұрыптау машиналарынан, кең алымды «Самұрық» елеуіштерінен, қуатты желдеткіштерден, металл шөмішті транспортерлерден, жылу өткізгіштерінен, өртке қарсы жабдықтардан, тағы басқа технологиялық көмекші құралдардан тұрады. Астық кептіргіш кешенінде табиғи және сұйық газ, дизель отыны пайдаланылады. Осы жерде экологиялық талаптар толық қамтамасыз етілетін кешендегі жылу генераторлары Қазақстан мен Ресей мамандары тарапынан жоғары бағаланып, осы елдердің 5 патентіне ие болғанын атап өткіміз келеді.
Ал сапа жағына келсек, «AZAM-КC» ЖШС бүкіл жұмыс ауқымына тұрақты мониторинг жасауды бірінші кезекте ұстайды. Мұнда «СТ РК ИСО 9001-2009» арнайы сертификатталған сапа менеджменті жүйесі енгізілген. Ұжым «Қазақстан машина жасаушылар одағы» бірлестігінің мүшесі, өнімдері «Агротехника» агроөнеркәсіптік кешені Мемлекеттік бағдарламасының несие реестріне және дайындалған жабдықтарын 25 пайыздық мөлшерде субсидиялаудың Мемлекеттік инвестициялық бағдарламасыне енгізілген. Барлық өнім сертификатталып, арнайы патенттелген. Осының өзі кең ауқымды өндірістегі біршама жағдайды аңғартса керек.
Қазіргі күннің талабымен қарасақ, кез келген кәсіпорынның бәсекеге қабілетті болуы – бизнестегі басты шарт. Жалтырлық жігіттердің өнімді шығарып қана қоймай, оның өндірісте қалтқысыз жұмыс істеуін қамтамасыз ететіндігі тәнті етеді. Мұнда мынадай жүйе қалыптасқан: «Жеткізу – іргетасын қалау – құрастыру – электр жүйелерін орнату – іске қосу – оқыту – бір жылдық кепілді қызмет – одан кейінгі сервистік қызмет». Бұл оңай шаруа емес. Дегенмен, «AZAM-КC» осынау басты ұстанымын үнемі биік ұстайтыны ғанибет. Бұл жұмысқа жүз бірдей кісі жұмылған. Вахталық әдіспен қызмет көрсететін жедел топтар арнайы техникалармен қамтамасыз етілген. Қоймада қажетті қосалқы бөлшектердің 3000 түрі тұрақты қорланған және бұл бөлшектер мен тиісті мамандар өздері орнатқан нысандарға бір тәуліктің ішінде жетіп барады.
Біз зауыт директоры Заманбек Мусинге бір сұрақ қойдық: «Осының бәрі қалай басталып еді?».
– Біз көп балалы отбасынанбыз. Әуелі мектептегі бауырларыммен бірге қара металл сынықтарын жинап, өткізумен айналыстық. Бәріміздің бірдей жоғары білім алуға мүмкіндігіміз болмады. Бірақ інілерімнің барлығында орта кәсіптік білім бар. Университет бітірген мен заңгермін. Аязбек ағамның қамшылауымен алға ұмтылуға тырыстық. Жиған-тергенімізді өндіріске салдық. Бастапқыда Астрахандағы бос тұрған ғимаратты жалға алғанбыз. Төңкерісте жүргендегі көрген-түйген ойларымды бауырларым қолдады. Жалтырда 2017 жылы жеке ангар тұрғызып, алғашқы астық кептіргіш қондырғысын сыннан өткіздік. Интернеттің көмегімен болашаққа негізделген озық технологияларды зерттедік, бизнес-жоспарларымыз мақұлданып, патенттерге ие болдық. Алғашқы қондырғымыз 2018 жылы Бұланды ауданындағы «Новобратское» ЖШС-де ойдағыдай нәтиже берді. Ең бастысы, бауырларым Аязбек, Арыстанбек, Әнуарбек, Мұратбек, Рүстембек, Айбектердің маған сенгеніне, бастамаларымды іліп алып кеткеніне, қиындықтарға төзгеніне, табандылығына ризамын.
– Соңғы екі жылда Ақмола, Ақтөбе, Шығыс Қазақстан, Қостанай, Солтүстік Қазақстан, Павлодар, Жамбыл облыстарында біздің 50 астық кептіру кешеніміз жұмыс істеп тұр. Биылға да тапсырыстарымыз бар. Біз әріптестік байланыстарды құрметтейміз және сенімнен шығуды өмірлік ұстанымымыз санаймыз, – дейді Заманбек бауырымыз.
Жалтырдағы жақсы істер жалпақ жұртқа өнеге.
Ақмола облысы,
Астрахан ауданы
