Аймақтар • 21 Ақпан, 2020

«Самұрық-Қазына» Солтүстікпен тығыз ынтымақтасады

25 реткөрсетілді

Кеше Петропавл қаласына «Самұрық-Қазына» ҰӘҚ» АҚ басқарма төрағасы Ахметжан Есімов жұмыс сапарымен келді. Облыс әкімі Құмар Ақсақаловтың алып жүруімен ол алдымен «ПЗТМ» АҚ және «Киров атындағы зауыт» АҚ жұмыстарымен танысты.

Содан кейін А.Есімов облыс әкімдігіне келіп, сала басшылары мен бизнес белсенділері, БАҚ өкілдерінің алдында  «Самұрық-Қазына» ҰӘҚ» АҚ мен Солтүстік Қазақстан облысының ынтымақтастығы туралы меморандумға облыс әкімі Қ.Ақсақаловпен қол қойды. Тараптар өңірде жаңа өндірістерді ашуды ынталандыруға және әлеуметтік-экономикалық ынтымақтастықты дамытуға келісті.

«Самұрық-Қазына» АҚ  басшысы Ахметжан Есімов Қор әсіресе, импорт алмастыру бағдарламасы мен «оффтейк-шарттар»  механизмі аясында жаңа өндірістер құруды қарастыратын жобаларға көмек көрсетуге дайын екенін атап өтті. «2018 жылы біз Қордың сатып алу жүйесін жетілдіру бойынша ауқымды жұмыстарды бастап, отандық тауар өндірушілерді қолдаудың басымдылығын атап өттік. Нәтижесінде холдинг ішіндегі сатып алу 25 есе қысқарды және 630 млрд теңгеден астам қаражат бәсекелес ортаға шығарылып, отандық кәсіпкерлерге берілді. Осы бәсекелестік ортаны құру арқылы 36 миллиардтан астам теңге үнемделді», - деді Ахметжан Есімов.

Айта кететін болсақ, «оффтейк-шарттар» өндірілуге жоспарланған өнімге алдын ала төлем жасау арқылы ұзақ мерзімді тапсырысқа кепілдік береді. Басты шарт – елімізде бұрын мұндай өнім өндірісінің болмауы және оған Қор компанияларына олардың қажеттілігі. 

Сондай-ақ А.Есімов қазіргі уақытта Қор импорт алмастыру бағдарламасы аясында елімізде жаңа өндірістер құру бойынша 27 жобаны мақұлдағанын және осы жобаларды іске асыруға салынған инвестицияның жалпы көлемі 215 млрд теңгеден асып, ол 1600-ден астам жаңа жұмыс орнын ашатынын жеткізді. Мақұлданған жобалардың қатарында Солтүстік Қазақстанның –  «ПЗТМ» АҚ және «С.Киров атындағы зауыт» АҚ сияқты екі кәсіпорының өнімдері бары айтылды. Қордың портфельдік компаниялары осы зауыттармен 8,5 млрд теңгеден астам соманың шарттарына қол қойған. Соның ішінде «ПЗТМ» АҚ-мен арнайы техниканы жеткізу үшін 2,3 млрд теңге, және «Киров атындағы зауыт» АҚ  6,2 млрд теңгенің келісіміне қол қойылды.

Солтүстік Қазақстан облысының әкімі Құмар Ақсақалов бұл екі зауытпен ғана емес өңірдегі ынтымақтастық бойынша Қормен қол қойылған барлық құжаттардың облыс экономикасын дамытудағы маңыздылығын атап өтті. «Бүгін біз «Самұрық-Қазына» АҚ өңірді дамыту бойынша бірқатар жүйелі шаралар белгіленген меморандумға қол қойып отырмыз. Қордың қолдауымен Уәлиханов сияқты шалғай аудандардың бірінде ұялы байланыс қызметі де кеңейтіледі»,- деді ол.

Меморандум аясында Қор Солтүстік Қазақстан облысының ТКШ-сын автоматтандыру, қала қауіпсіздігінің мониторингін қамтамасыз ету, 2020-2021 жылдары GSM және LTE стандарттарының 25 базалық станциясын іске қосу сияқты Петропавлды «ақылды» қалалар қатарына қосатын жобаларды дамытылатыны белгілі болды.  

Бұлардан басқа әлеуметтік салада да бірқатар бірлескен жобалар іске асырылады. Атап айтқанда олар – балаларды оңалту орталығын құрал-жарақтармен жабдықтау, медициналық поездың шалғай станцияларға тегін негізде қатынауы, әмбебап спорт ойыны алаңдарын салу және т.б.

Ал шағын және орта бизнесті дамыту бағытында 2020 жылға пошта желісі мен электрондық сауданы кеңейту бойынша 10 серіктестік пошта байланыс бөлімшесін ашу және ШОБ кәсіпкерлері үшін электрондық сауда негіздері бойынша семинарлар өткізу жоспарланған.  

Сөйтіп, «Самұрық-Қазына» ҰӘҚ Солтүстік Қазақстанның дамуына өзінің мол үлесін қоспақшы. Бұл облыс тұрғындарының көңіл-күйін арттырған шешімдер болды.

Анықтама үшін айта кететін болсақ,  «Самұрық-Қазына» ұлттық әл-ауқат қоры» АҚ Қазақстан Республикасының Үкіметі жалғыз акционері болып табылатын қор. Ол 2008 жылы Президент Жарлығымен құрылған және ол инвестициялық холдинг болып саналады. Оның миссиясы - Қазақстан Республикасының ұлттық әл-ауқатын көтеру және ұлттық экономиканы жаңғыртуға қолдау көрсету. Қордың активі 67 млрд АҚШ доллары шамасында. Оның компанияларының қатарына мұнай-газ, көлік-логистикалық секторлардың, химия және атом өнеркәсібі, тау-кен металлургиялық кешеннің, энергетика, машина жасау және жылжымайтын мүлік салаларының кәсіпорындары енеді.

Солтүстік Қазақстан облысы

Соңғы жаңалықтар

Бензин бағасы арзандады

Экономика • Кеше

14 отбасыға қол ұшын созды

Қазақстан • Кеше

Ұқсас жаңалықтар