Руханият • 30 Наурыз, 2020

Ел әңгімелерін екшеген

463 рет
көрсетілді
2 мин
оқу үшін

Азамат Қасым – «Егеменнің» елдегі елгезек тілшілерінің бірі. Шұғылалы шығыстан жолдаған шұрайлы мақалалары газетімізде жиі жарияланып тұрады. Кейбір кесек дүниелері тіпті, жоғары жақтың назарына ілігіп, көтерген көкейкесті мәселесі бойынша іле-шала тиісті шешімдер қабылданған кездер де болды.

Ел әңгімелерін екшеген

Қазақ Ұлттық универ­сит­етінде журна­лис­тік оқу тауысқан талапты оғлан жастайынан танылып, «Алматы ақшамы», «Алаш айнасы», «Дала мен қала», «Заң», «Жас қазақ үні», сондай-ақ Шығыс Қа­зақ­­стан облыстық «Дидар»газеттерінде же­міс­ті жұмыс істеді. Соның нəтижесінде Прези­денттің Алғыс хатын алып, «Жыл­дың жас журналисі» атан­ған. Бұйырса, бұл əріп­те­сі­міздің алар асулары əлі алда деп білеміз.

Осы жуырда ғана оның «Ел – əңгі­ме­ші» атты кітабы жарық көріп, оқырманға жол тартты. Иə, ұлы Мұхтар Əуезов айт­қан­дай, «Жер əңгімеші, жер əңгімеші бол­ған соң ел – əңгімеші». Жалпы ұлан-ғайыр қазақ даласының қай пұш­па­ғы да қасиетті. Тарихи-танымдық тағы­лым­дарға тұнып тұр. Әйтсе де, Абай, Шəкəрім, Мұхтар сынды даналарды бер­ген Шыңғыстау өңірінің әрине жөні бөлек. Сол кие­­лі топырақта туып-өскен Азамат іні­міз­дің сана саңы­лауы ертерек ашылып, ел ішіндегі есті сөздерге құ­марлана құлақ түр­гені анық.

Жып-жылы жинаққа ен­ген ой-тол­­ғамдар, очерктер, сұхбаттар көзі ашық, кө­кі­регі ояу көпшіліктің көңі­­лі­нен шығарына шек кел­тірмейміз. Бір бай­қа­ға­нымыз, орда бұзар отызды енді ғана орта­ла­ған қа­лам­гер ұлттық құн­ды­лық­тарымызды ұлықтауға қал-қадерінше құлаш ұрады. Этнографиялық этюдтерге толы «Аюды арқандаған Шой­та­бан», «Тарпаңдарды тырп еткізбейтін Тəттімбет» жəне басқа мақа­лалары оқыр­­манды ерік­сіз баурай­ды. Қазір саят­шы­лық, атбегілік сияқ­ты мынау қазақтар қала­­лан­ған заманда таңсық тақы­рыпқа айнал­ған «ескі­лік қалдықтарынан арыла алмай» жүрген этно-журналистер онша көп емес. Сондықтан Азамат Қа­сым­ның қан сонарға түскен аңшыдай қанжығасын май­лау­ға асыққан ізгі ізде­ністеріне сəттілік тілей­міз.

Кітапта сіз бен бізді бей­жай қалдыр­май­тын басқа да мəйекті мақалалар бар­шы­лық. Оларды өздеріңіз оқығандарыңыз дұрыс болар.