Қоғам • 08 Сәуір, 2020

Call-орталықтардың жұмысы қызу

22 рет көрсетілді

Кеше елордадағы Орталық коммуникациялар қызметінде төтенше жағдай кезіндегі интернет желісі мен электронды үкімет порталының жұмыс барысы туралы баспасөз мәслихаты өтті.

Цифрлық даму, инновациялар және аэроғарыш өнеркәсібі министрінің орынбасары Абылайхан Оспановтың айтуынша, Халыққа қызмет көр­сету орталықтары жабыл­ған­нан кейін азаматтарға бар­лық мәселе бойынша үздіксіз ке­ңес беріп отыру үшін call-орталықтардағы қыз­меткер­лердің қатары 200-ден 2 мыңға кө­бей­тіліпті. Төтенше жағдай жария­ланғанға дейін 1414 нөмері тәулігіне 25-30 мың қоңы­рау қабылдаса, қа­зір күн сайын 600 мыңнан ас­там қоңы­рау­ға жауап береді. Сөй­тіп бар­лы­ғы 4 млн-нан астам кеңес бе­рілген.

– Осыған дейін қашықтан 85 461 ЭЦҚ (Электронды цифрлы қолтаңба) берілді. Жақында заңды тұлғаларға да беруді іске қосып, 1 337 заңды тұлға ЭЦҚ-ны қашықтан алды. Мемлекет бас­шысының тапсырмасы шең­берінде мемлекеттік қыз­мет­керлердің 70 пайызы қашық­тан жұмыс істей бастады. 21 мемлекеттік орган «бұлтты» құ­жат айналымына көшті. Қазір осы жаңа жүйе бойынша 5,5 мың мемлекеттік қызмет­кер жұмыс істеп жатыр. Біз мем­ле­кеттік органдардың құжат айналымын және мемлекеттік қызмет көрсету ісін қағаздан толық арылту процесін жал­ғас­тырамыз, – деді вице-министр.

А.Оспанов 42 500 теңге әлеуметтік көмек eGov.kz порталы, 42500.enbek.kz сайты арқылы және 1414 нөмірінен SMS жіберумен берілетінін, сондай-ақ автоматты түрде тағайындалатынын айтты.
@Help42500Bot телеграм-бот та әлеуметтік көмекке өтініш беруді барынша оңайлату үшін ашылды.

– Өте маңызды бір мәселеге тоқталғым келеді. «Цифрлы Қазақстан» бағдарламасын жүзеге асыруға жүздеген млрд теңге бөлінді деген әлеуметтік желілердегі ақпарат шындыққа жанаспайды. Шын мәнісінде бұл бағдарламаға 2 жылда рес­публикалық бюджеттен 41 млрд теңге бөлінді. Оның тек 11,1 пайызы, яғни 4,6 млрд тең­гесі, Цифрлық даму, инновация­лар және аэроғарыш өнеркәсібі министрлігі жүзеге асырып жатқан бағдарламаларға жұм­салды. Министрлік бюджетінде «Цифрлы Қазақстан» бағдар­ламасынан бөлек, барлық мем­лекеттік органдардың ағым­дағы инфрақұрылымын қол­дауға бағытталған қаржы қарас­тырылған. Мысалы, мемле­кеттік органдардың барлық ақпараттық жүйелеріне канал ұсынуға 28,3 млрд теңге жұм­са­лады. ХҚО-ларды ұстап тұруға және қызметін ұйымдастыруға 19,5 млрд теңге бөлінеді, – деді вице-министр.

Баспасөз мәслихатында «Ұлттық ақпараттық техноло­гиялар» АҚ басқарма төр­ағасы Әсет Тұрысов eGov порталының әлеуметтік кө­мек­ті тағайындаудағы маңызына тоқталды.

– Бізге 18 сағат ішінде, яғни 27 наурыздың түнінен 28  наурызға дейінгі аралықта 42500 теңге әлеуметтік көмекті eGov порталы арқылы беруге мүмкіндік жасау міндеттелді. Портал арқылы жарты миллионнан астам азамат өтініш берді. Өтініштердің 101144-і электронды түрде түссе, 402 621 адам жаңа сервисті қолданды. Екі тәулік ішінде іске қосылған телеграм-ботты қолданушылар тым көп болғандықтан, белгілі бір шектеу қоюға тура келді. Осыған байланысты 3 сағат ішінде «Ұлттық ғылыми технологиялар» АҚ аймақтар үшін барлығы 18 телеграм-ботты іске қосты. Бүгінге дейін осы боттар арқылы 515 мың өтініш қабылданды, – деді ол.

Цифрлық даму, инновация­лар және аэроғарыш өнеркәсібі министрінің орынбасары Да­рын Тұяқов рес­публика бойын­ша интернет же­лілеріне түскен салмақ Жаңа жыл түнін­дегі жүктен де асып кеткенін айтты. 

– Сусын мен ас сияқты, интернет те басты қажеттілікке ай­налды. Дүние жүзі бойынша интер­нетке артық жүк түсіп жатыр. Мысалы, Еуропада ол 50 па­йызға жуықтады, Қазақ­станда Жаңа жыл түніндегі көр­сет­кіштен де 2 есе асып кетті, – деді ол.

Д.Тұяқовтың айтуынша, интернет байланысын сақтауға резерв қорының 25 пайызы жұ­м­салған. Министрлік интер­неттің жұмысын күшейту үшін жергілікті әкімдіктермен бірлесіп ірі қалаларда діңгекті антенна орнатып жатыр.

 

Соңғы жаңалықтар

Ұқсас жаңалықтар