Сонда, шамамен 1948-1964 жылдар аралығында түсірілген сурет болуы мүмкін. Олай дейтініміз, кітаптың дәл осы бөлімінде 1948 жылы Адай жылқысын мінген бірнеше салтатты бір тәулікте 298 шақырымды жүріп өткені туралы да дерек келтіріліпті.
«Қазақ жылқысы мініске де, жүк артуға да қажымайтын айрықша төзімді болып келеді. Жайылымдық азықты ғана қорек ете жүріп, күніне 80-90 шақырым басып өтуге қауқарлы. Жақын қашықтыққа шапқанда аса жылдам болмағанымен, алысқа шапқанда керемет нәтиже көрсетеді. Мәселен, 1948 жылы адай жылқысын мінген бірнеше салтатты бір тәулікте 298 шақырымды еңсерді. Қазақ жылқысы қосарлап және үшеулеп жеккенде де 4,5-5 сағатта 60-70 шақырымды артқа тастай алады. 1948 жылы қосарлап жеккен қазақ аттары бір тәулікте 292 шақырымды жүріп өтті. Аттар тағаланбаған еді, бұл да дала жылқысының тұяғы мықты екенін көрсетеді», деп тамсана жазады авторлар.
