Бизнес • 22 Мамыр, 2020

Кәсіпкер сүйікті ісін табыс көзіне айналдырған

690 рет
көрсетілді
6 мин
оқу үшін

Бүгінгі таңда тігіншілік еңбек нарығында ерекше сұранысқа ие кәсіптердің бірі. Маңғыстау облысы Шетпе кентінің тұрғыны Индира Бекенаева – мемлекет тарапынан жеңілдетілген па­­­йызбен берілген несие қаржы арқылы кәсібін дөңгелетіп, тігін цехының жұмысын жандандырып отырған кәсіпкер.

Кәсіпкер сүйікті ісін табыс көзіне айналдырған

Одан бөлек заманның талабына сай талғаммен киіну де Индираны тігіншілік кәсіпке жетелеген көрінеді. Жастайынан ті­гінмен айналысып, үйдің тұр­мы­сына қажетті көрпе, жастық, құрақ көрпешелерді өзі тігіп алып жүрген Индира жеке ісін бастау үшін жылдар бойы тәжірибе жи­наған. Жақын туыстарының киімдерін тігіп бергені үшін алғыс алып, бірте-бірте табыс та­ба бастаған.

– Маңғыстаудағы 15-бекет елді мекенінде қарапайым темір­жолшы отбасында дүниеге кел­дім. Әке-шешеміз жастайымыздан шаруашылыққа, еңбекке баулып өсірді. Он шақты ғана үйі бар шағын темір жол бекеті болған соң, балабақша, мектеп жоқ еді. Сондықтан Ақтау қаласына қатынап оқыдық. Алғаш тігіншілікті көршіміз Қыз­бала әжеден үйрендім. Қызы­ғу­шылығымды көрген әкем жа­пон­дық тігін машинасын сатып алып берді. Ал университет қабырғасында оқып жүргенімде курс­тастарыма көйлек-көншек­те­рім­ді өзім тігіп алдым деп айтуға намыстанатынмын. Себебі ол кезде киімді тігіп киюден гөрі дүкеннен сатып алу сәнді еді. Бірақ кейін матасын алып ойыңдағы киімді тігіп кию әлдеқайда арзан әрі жарасымды болатынына көз жеткіздім. Осылайша менің тігіншілік өнерім кәсіпке айнала бастады, – дейді ол.

Индира әзірге тігін цехын Шетпе кентіндегі өз ауласынан ашып, жұмыс істеп отыр. Тігін шеберханасында ісмерлер жастық, көрпе, көрпенің тысы сияқты тұрмысқа қажетті заттарға тапсырыс қабылдайды. Жаңадан ашылған тігін цехы үшін бұл үлкен жетістік.

– Бұл жердегі алғашқы клиент­те­рім көрші келіншектер болды. Одан бір-бірінен естіген таныстарымыз, олардың достары дегендей, тапсырыс берушілер саны арта берді. Қол жайып қарап отырмай, іске кіріскен жанның еңбегі еш кетпейтінін айтар едім. Бүгінде шағын кәсіп ашушыларға мемлекет тарапынан қолдау ерекше, – дейді Индира.

Табанды еңбекқорлығының арқа­сында ол былтыр «Zhas­project» атты жастарға арналған бірегей бағдарламаның грантын ұтып алған. «Еңбек» нәтижелі жұмыспен қамтуды және жаппай кәсіпкерлікті дамыту бағдар­ла­масы туралы естіп, Ауыл шаруа­шы­лығын қаржылай қолдау қо­ры­ның қолдауымен 3 млн 500 мың теңге несие ресімдепті. Жас кәсіпкер мемлекеттік көмектің арқасында кәсібін одан әрі кеңей­тіп, елдің игілігі жолында жұмыс істеуді мақсат тұтып отыр.

– Адал еңбекпен, сүйікті кәсіппен айналысу кез келген әйелдің, оның ішінде үй шаруасындағы келіншектердің де қолынан келеді. Өйткені біздің де әулетіміз үлкен, 3 баламыз бар. Жолдасым да әр ісіме барынша қолдау көрсетіп келеді. Тек кәсіпті зор ынта-ықыласпен, махаббатпен қолға алса болғаны. Енді шеберлік сағаттары мен сыныптарын өткізуді жоспарлап отырмын. Алда қайырымдылық мақсатында көпбалалы аналар мен мектеп оқушыларына тегін оқуға мүмкіндік береміз, – дейді Индира.

Шағын несиелердің нәтиже­сін­де республиканың түкпір-түк­пі­ріне де Индира Бекенаева сынды өзінің кәсібін ашқан, арманына қол жеткізген адамдар жетерлік, аталған бағдарлама аясында талай адамға көмек көрсетіліп те келеді. Мәселен, Ауыл шаруашылығын қаржылай қолдау қоры 2017-2021 жылдарға арналған «Еңбек» нәтижелі жұмыспен қамтуды және жаппай кәсіпкерлікті дамыту бағдарламасының екінші бағытын іске асыруда. Осы жылдарда бағдарлама аясында Қор жалпы сомасы 160 млрд теңге болатын 53 мыңнан астам шағын несие берді. Осының нәтижесінде 53 мыңнан астам ауыл тұрғыны жұмыспен қамтылды. Ал биыл Маңғыстау облысына 841,7 млн теңге қаржы бөлініп, несиелеу жұмыстары жалғасып жатыр. Шамамен 220 адамға несие беру жоспарланған.

Қор өзінің несие өнімдері ар­қылы ауыл тұрғындары мен ауыл шаруашылығы тауарын өн­­­ді­­ру­шілердің жобаларын түр­­­­­лі мақсатты бағыттар бо­йынша қаржыландырып ке­ле­­ді. Нақты айтар болсақ, мал шар­уа­шылығын, өсімдік шаруа­шы­лығын, ауыл кәсіпкерлігін дамыту және ауыл шаруашылығы өнімдерін қайта өңдеу мен сақтау жобалары бар. Нәтижелі жұмыспен қамту бағдарламасы бо­йынша түрлі мақсаттағы не­сиенің жылдық сыйақы мөл­ше­рі 6 %-ды құрайды.

Несиенің сомасы, жеңілдік мерзімі несие өніміне байланыс­ты әртүрлі болады. Сондай-ақ Қордың несиелеу шартында аграрийлер қызметінің ерекшелігі, оның ішінде ауыл шаруашылығы жұмыстарының маусымдылығы мен циклділігі ескерілген.

Бағдарламаға ауыл шаруа­шы­­лы­ғымен және ауыл шаруа­шы­лығына жатпайтын кәсіп түр­лерімен айналысқысы келе­тін­дер және кәсібін кеңейтуді жоспарлаған азаматтар қатыса алады. Несие алушыларға қойы­ла­тын бірқатар талаптар бар. Атап айтқанда, кәсібін енді бас­тайтын азаматтың кәсіпкерлік негіздерін оқығаны туралы сертификаты болуы тиіс. Несие тарихы жақсы болғаны абзал. Кепілге қоятын мүлкі болуы шарт. Бұдан бөлек, бюджеттік және қаржы ұйымдарының алдында мерзімі өткен берешегі болмауы керек.

Мемлекет басшысы Қасым-Жомарт Кемелұлы Тоқаевтың 2020 жылғы 31 наурыздағы мәлімдемесінде кәсіпкерлік секторды қолдауға бағытталған бірқатар міндеттер белгіленген болатын. Президент онда ауқым­ды және сапалы жұмыспен қамту, агроөнеркәсіптік кешенді үз­дік­сіз қамтамасыз ету, шағын және орта бизнесті несиелеуді арт­тыру қажеттілігін ерекше атап өткен болатын. Осы ор­ай­да Ауыл шаруашылығын қар­жы­­лай қолдау қоры «Еңбек» нәти­же­лі жұмыспен қамтуды және жаппай кәсіпкерлікті дамыту бағ­дарламасы аясында кәсіп­кер­лер­ге жеңілдетілген шағын несие беру үшін биыл 36 млрд тең­ге қаржы бөліп отыр. Биыл да мыңдаған адам жұмыспен қамтылып, жаңа кәсіпкерлік нысандар ашылады.