Өткен жылғы Арыстағы жарылыс, биылғы коронавирус індетіне байланысты енгізілген төтенше жағдай, Мақтаарал ауданындағы су басу мәселесі, жаңбырдың шамадан тыс қатты жауғаны салдарынан бірнеше ауданда сел жүруі, Түркістан қаласындағы қонақүйдің өртенуі, осы жағдайлардың бәрінде облыс полицейлері халықтың қорғаны екендігін көрсете алды. Соңғы екі жылда ел Президенті Қасым-Жомарт Тоқаевтың Жарлығымен Түркістан облысында 1 полицейдің «Айбын» орденімен және 8 полиция қызметкерінің «Ерлігі үшін» медалімен марапатталуы сөзімізге дәлел, қиын шақта халық жанынан табылған жеке құрамның жетістігі десек қателеспеспіз. Облыс полицейлерінің табиғи және техногендік апаттардан бөлек, ерлік тұрғысындағы мақтауға тұрарлық іс-әрекеттері де көп. Мысалы, қазығұрттық полицейдің бүтін бір отбасының асыраушысын суицид жасамақшы болған жерінен аман алып қалуы, көпірден секірмекші болған келіншектің құтқарылуына қатысты оқиғаны айтуға болады. Түркістан облысы Полиция департаментінің бастығы, полиция генарал-майоры Қайрат Дәлбеков кез келген көмекке мұқтаж адамға қызметкерлері өз жанын тәуекел ете отырып, көмек қолын созатынына сенімді екенін айтады. «Менің талап ететінім де осы, полицей – халықтың қорғаушысы, жәрдемшісі, қамқоршысы бола білуі керек. Биыл облыста жыл басынан бергі бес айда жалпы тіркелген қылмыстың саны былтырғы дәл осы кезеңмен салыстырғанда 25,8 пайызға төмендеді. Тарқатып айтсам, қоғамдық орындарда жасалған қылмыстар, көшеде жасалған заңсыздықтар, бұрын сотты болғандармен жасалған құқық бұзушылықтар 40 пайызға дейін азайды. Ал тонау 50 пайызға төмендесе, бұзақылық 42,2 пайызға кеміді. Сонымен қатар қылмыстық істердің ашылуы артты. Мұның барлығы Полиция департаменті Жергілікті полиция қызметі басқармасының құрылымдарымен қоғамдық қауіпсіздікті қамтамасыз ету және құқықтық тәртіпті нығайту бағытында ұйымдастырылған алдын алу іс-шараларының нәтижелері», дейді генерал-майор.
Жасөспірімдер арасындағы қылмыс та едәуір азайған. Нақтырақ айтсақ, бес айдың қорытындысы бойынша өңірде кәмелетке толмағандар арасындағы қылмыс 11,9 пайызға, яғни 84-тен 74-ке төмендеп отыр. Бұл орайда Полиция департаментінің бірнеше оқу орындарымен меморандум жасауы септігін тигізіп отырғанын айта кетелік. Оқушылармен, студенттермен арнайы кездесулер өткізілген. Барлық қалалық, аудандық полиция басқармалары мен бөлімдерінде студенттер арасында кәсіби бағдар беру жұмыстары үйлестірілді. «Ашық есік» күндері өткізілді. Жастарды ішкі істер саласына жұмысқа шақыра отырып, ол үшін қажетті шаралар түсіндірілген. «Осындай кездесулерден кейін жастар арасында нақты шешім қабылдаған 52-сі қаңтар-ақпан айларында жарияланған бос лауазымдар конкурсына қатысты. Үміткерлердің 41-і барлық сынақтан сүрінбей конкурстық іріктеуден өтті. Соның 30-ы бос лауазымдарға тағайындалды. Ал 11 үміткер бүгінде департаменттің кадрлық резервінде тұр. Бұдан бөлек, Полиция департаментінің жолдамасымен Ішкі істер министрлігінің Алматы қаласындағы оқу орталығына бастапқы даярлық курстарына – 4, Ақтөбе оқу орталығына – 9, Қарағанды академиясына 9 тағылымданушы жіберілді», дейді Қайрат Дәлбеков.
Өңірде мал ұрлығы өзекті мәселе болып тұр. Қолға түсіп, тиісті жазасын алып жатқан ұрылар да аз емес. Мысалы, Түркістан және Кентау қалаларының аумағында құны 70 миллион теңгеден астам тұратын 150-ден көп жылқы мен сиыр ұрлауға қатысы бар, сол сияқты облыстың үш ауданында жайылымнан жылқы айдап әкету ұрлығымен айналысқан қылмыстық топ анықталды. Күдіктілердің 14 мал ұрлығы оқиғасына қатысы бары белгілі болды. Жәбірленушілерге келтірілген шығынның жалпы көлемі – 300 миллион теңгеге жуық. Ал Шардарада бірнеше жыл бойы заңсыз балық аулаумен айналысып келген ұйымдасқан қылмыстық топ ұсталды. Генерал-майор Қайрат Дәлбеков бұдан бөлек, пәтер ұрлығы, бұзақылық, ауыр және аса ауыр қылмыстарды ашу жұмыстарында да айтарлықтай нәтиже барын айтады. Полицейлер жыл басынан бері 52 қылмыскерді ұстаған. Олардың 10-ы ауыр және аса ауыр қылмыстары үшін іздестірілуде жүргендер.
Полицейлердің әлеуметтік мәселесі де назардан тыс қалмаған. Бүгінге дейін 39 қызметкерге облыс орталығындағы Отырар шағын ауданынан пәтер берілген. Таяуда тағы да бірнеше қызметкер жаңа пәтерлерге қоныстанатын болады. Ал келесі жылы Полиция департаментінің Жедел басқару орталығы ғимаратының құрылысы басталмақ.
Түркістан облысы
