Аймақтар • 08 Шілде, 2020

Қарағанды қоқыстан қашан тазарады?

590 рет
көрсетілді
7 мин
оқу үшін

Қарағанды облысында күл-қоқыс мәселесі бүгінге дейін шешімін таппай келеді. Басқасын айтпағанның өзінде, кеншілер астанасында да тұрмыстық қалдықтар дер кезінде жиналмай, қаланың орталық көшелеріндегі аулаларда қоқыс дегеніңіз тау болып үйіліп жатады. Сол себепті де тұрғындардың осы мәселеге қатысты арыз-шағымы күннен-күнге көбейіп келеді.

Қарағанды қоқыстан қашан тазарады?

Осының бәрін облыс басшылығы да біледі, бірақ жұмыстың жөні, істің қиюы әзірге таптырмай тұрған сыңайлы. Сол себепті болар, таяуда өңір басшысы Жеңіс Қасымбек коммуналдық қызметтердің жұмысын қатаң сынға алып, тиісті басшылардан бұл салада тәртіп орнатуды талап етті.

Жалпы, ғарыштан зондтау арқылы қарағанда, облыс аумағында стихиялы түрде пайда болған 800-ге тарта қоқыс ошағының бар екені анықталған. Облыстық табиғи ресурс­тар және табиғат пайдалануды реттеу басқармасының басшысы Әсет Тазабеков бұл қоқыс орындарының басым бөлігінің жойылғанын айтады. Десе де, жағдай әлі де күрделі қалпында қалып отыр. Мәселен, Қарағанды мен Теміртау қалаларында, сондай-ақ бірқатар ауданда бей-берекет пайда болған қоқыс орындары былыққаның үстіне былығып жатыр.

Облыс әкімі жиналыс сайын кешкісін жаяу жүріп, аулаларды аралайтынын айтады. Дер кезінде қоқыс полигонына апарылмаған тұрмыстық қалдықтан аяқ алып жүргісіз екенін қаншама рет сын тезіне салса да, тұралаған жағдайдың оңалатын түрі көрінбейді. Осы жолы болған онлайн режіміндегі жиын барысында да Ж.Қасымбек қоқыс тазалау саласындағы жұмыстың қожырап кеткенін қынжыла жеткізді.

– Тұрғындар ең бірінші кезекте тазалыққа назар аударады. Бұл – өте өзекті мәселе. Қарағандыда қоқысты жинау жұмыстарына деген жұрттың наразылығы күшейіп тұр. Мен өзім жаяу жүріп, аулаларды аралаймын. Коммуналдық қызметтер жұмысының өте нашар жүргізілетінін көріп жүрмін. Қала әкімдігі тарапынан бақылау жоқ, – деді ол.

Ж.Қасымбек бұл салада тәртіп орнатуға бел шеше кіріскендей. Алдағы уақытта айтылған сыннан қандай қорытынды шығарылатынын тікелей өзі бақылайтынын айтып, осы іске жауапты тұлғалар мен коммуналдық қызмет өкілдеріне қатаң ескерту жасады.

Әлеуметтік желіде облыс әкімінің бұл мәселеге ерекше назар аударғанын қуана құптаған жазбалардың пайда болғанын айта кеткен ләзім. Соны­мен қатар аталған тақырыпқа басқа қырынан қарап, пікір білдірген желі қол­данушылары да баршылық. Мәсе­лен, солардың бірі мынадай жазба қалдырды: «Коммуналдық қызметкерлер жұмысты жақсы істеуі үшін олардың техникасын жаңартып, жақсы еңбекақымен қамтамасыз ету керек. Олардың жұмысы ауыр. Ескі, кір-қожалақ машиналармен жүреді». Ал енді бір тұрғын өңір басшысының өзін сынға алыпты: «Проблеманы жеке бақылауыма аламын депті... Ал жауапты тұлғаларды алдына шақырып алып, нақты мерзім беріп, қасақылық жасаушыларға қатысты нақты шаралар қолданып көріп пе? Әлде қоқыс аралап, ғарыштан түсірілген суреттерді әрі қарай қарап отыра бере ме? Ғарыштық проблема!!!»...

Туризмнің ордасына айналады деген Балқаштың маңайы да күл-қоқыстан көз ашпай-ақ қойды. Қаланы айтпағанның өзінде, жағажайлар мен көрші елді мекендерді қоқыс­тан тазарту кәдімгідей үлкен проб­ле­­ма­­ға айналған. Дегенмен, сең қоз­­ға­­лып, бұл салада баяу болса да іс-әрекеттің нышаны байқала бас­тады. Мысалы, қазіргі уақытта қала маңындағы Техснаб кентіндегі тау болып үйілген қоқысты тысқа шы­ға­ру қолға алынған. Бұған дейін мұн­да­ғы тұрғындар қоқыс шығаруға ке­лі­сімшарт болмағандықтан, тұр­мыс­тық қалдықтарды әр жерге тастай берген екен.

Балқаш қалалық тұрғын үй-ком­муналдық шаруашылық бөлімінің сек­тор меңгерушісі Асылмұрат Түсіпов кенттегі бірнеше жылдан бері 400 текше метр аумақта жатқан қалдықтың тысқа шығарылғанын айтады.

– Біз рұқсат етілмеген жерлердегі қоқыстарды жоюмен айналысамыз. Жеке сектор тұрғындарымен қатты тұрмыстық қалдықтарды шығаруға келісімшарттар жасасу үшін түсіндіру жұмыстарын жүргізетін боламыз. Бұған қоса, қоқыс төгетін орындарға бейнекамералар орнатамыз, содан кейін қоқысты ретсіз төгетіндерге айып­пұл салына бастайды, – дейді ол.

Бұл жерде жергілікті атқарушы билік пен коммуналдық қызмет өкілдерінің тұрғындарға өкпелейтін жөні бар. Олардың көбі салақтық танытып, үйінен шыққан күл-қоқысты көрінген жерге төге салуды әдетке айналдырып алған екен.

– Қоқыс шығару туралы өтінішпен бізге ешкім келген жоқ. Әзірге ешқандай келісім жоқ. Бұл үшін Техснаб кентінің тұрғындары бізге келіп, келісімшарт ресімдеулері керек. Бізде техника жеткілікті, – дейді «Балқаш Универсал» ЖШС-нің учас­ке бастығы Манат Ділдашев.

Бүгінде кенттегі әр үй үшін ай сайынғы тариф орнатылып, экономист мамандар нақты есептеулер жүргізу үстінде. Осындай оң қадамдардан кейін санасына саңылау енген кент тұрғындары да бұл бастамаға қолдау білдіре бастапты.

«Біз төлеуге дайынбыз, – дейді олар. – Кентіміздің көптеген тұр­ғын­ы да мұнымен келіседі. Бұрын біз қал­дық­тарды қайда тастайтынымызды білмейтінбіз».

Коммуналдық қызметтің өкіл­де­рі алдағы уақытта Техснаб кентін ғана емес, ЖБИ шағын ауданын, Шұ­бартүбек және Жұмысшы елді мекендерін, саяжайлар мен жаға­жай­лар­ды да күл-қоқыстан тазартуды жос­пар­лап отыр. Бұдан бөлек, «Балқаш Универсал» кәсіпорны Балқаш қала­сы­ның контейнерлік алаңдарын ретке келтірумен айналыспақ. Бұл жұмыс аяқталған соң, 190-ға жуық қоқыс жәшіктері алаңдармен бірге сенімді басқаруға беріледі.

Қарағанды мен Балқаш қана емес, облыстың басқа қала-аудан­да­рында да күл-қоқыс мәсе­ле­сі күн тәртібінде өткір күйінде тұр. Ал алыстағы ауыл­дар­дағы жағ­дай тіпті де сорақы ке­йіп­те. Елді мекендер маңында стихиялы түр­де пайда болған қоқыс орын­да­ры тез арада жойылмаса, олар­дың сол маңдағы санитарлық-эпи­де­мия­лық ахуалға тигізер залалы зор бол­мақ. Пандемия деген пәлекет қам­шы үйіріп тұрған қазіргі кезде мұның өзі жығылғанға жұдырық болуы әбден мүмкін.

 

Қарағанды облысы

 

Соңғы жаңалықтар

Су үнемдейтін қондырғы

Технология • Кеше