Өзара түсіністік туралы меморандумға қол қойды

Экономика • 08 Шілде, 2020

Өзара түсіністік туралы меморандумға қол қойды

8 рет көрсетілді

«Самұрық-Қазына» АҚ активтерді жекешелендіру бойынша кешенді жұмыстарды кезең-кезеңімен ойдағыдай жүзеге асыруда. Осы ретте «Самұрық-Қазына» ҰӘҚ» АҚ Басқарма төрағасы Ахметжан Есімов пен «Астана» халықаралық қаржы орталығының басқарушысы Қайрат Келімбетов өзара түсіністік туралы меморандумға қол қойды.

Думан АНАШ

Аталған құжатқа сәйкес тараптар АХҚО биржасында Қор компаниялары акцияларының листингі мәселелері бойынша тығыз ынтымақтасуға және кеңес беруге ниет білдіріп отыр.

– Жекешелендіру бағдарламасын орындауды аяқтау «Самұрық-Қазына» қоры үшін басты міндеттердің бірі болып табылады және қор АХҚО-ның дамуына аса мүдделі. «Қазатомөнеркәсіп» ғаламдық депозитарлық қолхаттарын орналастыру тәжірибесі оның келешекте биржалық алаң ретінде перспективасын көрсетті, – деп атап өтті қор басқармасының төрағасы Ахметжан Есімов.

Ынтымақтастық барысында қордың компаниялар тобы жасаған шарттар бойынша дауларды шешу институты ретінде АХҚО халықаралық төрелік орталығы мен сот ескертпелерін енгізу арқылы АХҚО юрисдикциясын белсенді қолдану көзделеді. Сонымен қатар қор мен «Астана» халықаралық қаржы орталығы АХҚО-ның Экспат орталығы және үздіксіз кәсіби даму бюросының мүмкіндіктерін пайдалануға және қаржылық технологиялар, Big Data және АХҚО-ның финтех-инновацияны реттеуші саласында ынтымақтастық орнатуға ниет білдірді.

– Біздің платформаның мүмкіндіктері мен қызметі жеделдетілген цифрландыру арқылы сұраныс табады. Бұл краудфандингке де, цифрлы платформалар арқылы сан түрлі көмек алу, цифрлы банктер, үздіксіз білім алу тренді, яғни дәстүрлі университеттердің толықтай онлайн платформасын меңгеруіне тиесілі. Біз қорға біздің алаңымызды және ресурстарымызды қолдануда барынша көмек көрсетуге дайынбыз, – деді АХҚО басқарушысы Қайрат Келімбетов.

Қор мен АХҚО Жекешелендірудің 2016-2020 жылдарға арналған кешенді жоспары аясында табысты ынтымақтастықта бірқатар жобаны іске асырып келеді. Мәселен, «Самұрық-Қазына» ҰӘҚ» АҚ Қазатомөнеркәсіптің бұрын орналастырылған акцияларына қолайлы сұранысты пайдалана отырып, «Қазатомөнеркәсіп» компаниясының акциялары мен жаһандық депозитарлық қолхаттарын қосымша орналастыру процесін аяқтады. Оларды Лондон қор биржасында (LSE) және Астана халықаралық қаржы орталығының биржасында (AIХ) орналастыру қорытындысы бойынша компания акцияларына инвесторлар тарапынан сұраныс ұсыныстан 2,9 есе асып түсті.

Осылайша, компания акцияларының 6,28%-ы 211 млн АҚШ доллары немесе 85 млрд теңгеге сатылды. Халықаралық инвесторлар активтерге үлкен қызығушылық танытуының арқасында AIX-та орналасқан «Қазатомөнеркәсіптің» 4,3 млн глобалды депозитарлық қолхаттарының ішінен шетелдік институционалды инвесторлар 2,5 млн GDR сатып алды.