Тартынатын, аянатын кез емес

Қоғам • 15 Шілде, 2020

Тартынатын, аянатын кез емес

23 рет көрсетілді

Мемлекет басшысы Қасым-Жомарт Тоқаев 13 шілдені Ұлттық аза тұту күні деп жариялап, фармацевтика саласында орын алған кемшіліктерді жою мен алдағы уақытта шұғыл қолға алынуы тиіс бірқатар іс-шараларды атап көрсеткен еді.

Қарашаш ТОҚСАНБАЙ

Үнсіз жауды жеңудің қарекетіне көшкен халықтың барлық үміт-сенімі – жаман індеттің күшін жойып, жолын кесетін дәрі-дәрмекте. Соған қарамастан әлемді жайлаған індет белең алып, дертке шалдыққандар саны өңірлерде әлі де өсуде. Кісі өлімі көбейіп, небір белгілі тұлғаларды ортамыздан жұлып алып кетуде. Мамандар коронавирустың мұншалық ауа жайылып кетуі сақтандыру ережелерінің орындалмауы мен тиісті дәрі-дәрмекпен жеткілікті қамтамасыз етілмеудің салдары деген пікірді алға тартуда. Жаһанның тынысын тұншықтырып тұрған жаман дерттен көз жұмған отандастарымызды еске алып, аза тұтып жатқан қаралы қауым өткен күндердің ащы сабағынан нақты нәтиже шығаруды, дәріханалар мен ауруханаларды тиісті дәрі-дәрмекпен жеткілікті қамтамасыз етуді талап етуде. Олардың дені әлеуметтік желі арқылы таралуда. Мысалы, қарағандылық қаламгер Кәмел Жүністегі: «Президент Қ.Тоқаев дұрыс айтады. Соғыс жағдайындамыз.

Кешегі совхоз аталған, бүгінде басы қалқиып тұрған ауылдардың «жөтелмейтіні» жоқ. Жас та, жасамыс та ауырған жағдай. Кей ауылдарда дәрі түгілі, температура өлшейтін градусник те жоқ.

Бар дәріні тығып тастап, әйтпесе жиырма құнына сатып, ажал үстінде байып қалуды ойлағандар өлексені аңсаған құзғындар сияқты. Олар елді аямаған. Ендеше, оларды да аямай жазалау қажет. Оларды жұмыстан ғана шығарып отыру аз, бар дүниесін тәркілеп, соттау қажет. Сотталғанын халық көруі қажет. Соттың өзі «военный положениедегідей» созбаққа салынбауы тиіс...» деп жазды фейсбуктегі парақшасында.

Күннің маңызды және өзекті жаңалықтарын «Егемен Қазақстан» телеграм каналынан оқыңыз