Елімізде жақында аталып өткен медицина қызметкерлерінің кәсіби мерекесіне орай Батыс Қазақстан облыстық жұқпалы аурулар ауруханасының бөлім меңгерушісі Бибігүл Айтбаева – «Парасат» орденімен, облыстық көпбейінді аурухананың дәрігері Марат Балшамбаев – «Құрмет» орденімен, облыстық жұқпалы аурулар ауруханасының реаниматолог-дәрігері Салауат Ағдауов, облыстық кардиологиялық орталықтың дәрігері Данияр Әренов, облыстық жұқпалы аурулар ауруханасының аға медбикесі Әлия Маужанова – «Ерен еңбегі үшін» медалімен, облыстық көпбейінді аурухана медбикесі Әсима Гасина – «Шапағат» медалімен, облыстық кардиологиялық орталық медбикесі Венера Мырзағалиева – Қазақстан Республикасының Құрмет грамотасымен марапатталған болатын. Олардың бәрі де – осы коронавируспен күресте тікелей оттың ортасында жүрген мамандар.
– Қазір бүкіл әлемде қатерлі індетке қарсы көзге көрінбейтін алапат соғыс жүріп жатыр. Бұл майданның алғы шебінде дәрігерлер жүргені заңдылық. Соңғы кезде қайтыс болған әріптестерімнің бәрін де жеке танушы едім. Олар өз ісінің білікті маманы болатын, өмірінің соңына дейін антына адал болып, өзге науқастарды құтқару үшін өз басын қауіпке тікті. Өте өкінішті, әрине. Олардың жарқын бейнесі біздің жүрегімізде мәңгі сақталады, – дейді облыстық денсаулық сақтау басқармасының басшысы Болатбек Қаюпов.
Коронавируспен ауырған батысқазақстандық медицина қызметкерлерінің бәрі де вирусты науқастан жұқтырғаны анықталған. Яғни олардың бәрі де кәсіби қызметінде жүріп қатерлі вируспен бетпе-бет келген.
Мысалы, Батыс Қазақстан облыстық перинаталдық орталық директоры Николай Дмитриенко өзіне төніп тұрған қауіпке қарамастан шалғайдан келген жүкті әйелге медициналық жәрдем көрсеткен. Ол әйелдің коронавирус жұқтырып келгендігі белгілі еді. Сәби мен ананың тірі қалуы үшін барын салған Николай Борисұлы бірнеше күннен кейін пневмониядан асқынған трамбоз салдарынан қайтыс болды.
Ал Юрий Есенғалиұлы Саримов Бәйтерек аудандық №2 ауруханасында хирург болып істейтін. Ауған соғысында әскери борышын өтеген жауынгердің кейінгі өмірі денсаулық сақтау саласында өткен. Ол да дәрігерлік қызметіне орай індет жұқтырған пациентпен қарым-қатынас жасауға мәжбүр болған. Бәйтерек ауданы Ресей Федерациясымен шекарада тұрғанын, алғашқы кезде індет жұқтырушылардың 90 пайызы осы шекарадан келгенін ескерсек, бәйтеректік дәрігерлердің вирус жұқтыру ықтималдылығы өте жоғары деді.
Облыстық денсаулық сақтау басқармасының басшысы Болатбек Амангелдіұлының айтуынша, Орал қалалық №1 емхананың рентген-лаборанты Венера Ихсанқызы Құтхожина мен Орал қалалық №6 емхананың педиатр-дәрігері Батима Жолмұхамбетқызы Бисенғалиева да кәсіби міндетін атқару үстінде қаза тапқан асыл жандар.
Рас, қаза тапқан батысқазақстандық дәрігерлер ресми статистика бойынша сovid-19 індетімен күресу жолында еңбек етіп жүріп қайтыс болған медицина қызметкерлерінің тізіміне кірмейді екен. Өйткені олар тікелей провизорлық немесе инфекциялық стационарда қызмет еткен жоқ. Дегенмен олардың кәсіби қызметі барысында covid-19 вирусын жұқтырған науқастармен бетпе-бет келіп, қарым-қатынаста болғаны шындық. Дәрігер ретінде, маман ретінде олар өз әрекетінің қандай қауіпті екенін анық білді, сонда да тәуекел етіп, өз міндетіне, антына ақырына дейін адалдық танытты. Міне, сондықтан да оларды әріптестері де, қарапайым халық та батыр санайды.
Батыс Қазақстан облысы
