Сербиялық теннисші турнирдің төртінші айналымында испаниялық Пауло Каррена-Бустамен ойнап жатқан. Бірінші сеттің он бірінші геймінде Джокович қарсыласына брейк беріп қойды. Содан ашуланған Новак допты артқа қарамай ұрып жіберіп, абайсызда төрешіге дәл тигізді. Доп төрешінің кеңірдегіне тиген екен. Ол демала алмай қалды. Сөйтіп абайсызда төрешіге бірден дәрігерлер келіп көмектесті.
Кортта бірден жиналған турнирдің супервайзерлері Новак Джоковичті турнирден шеттету туралы шешім шығарды. Негізі бұл тым қатал шешім сияқты. Себебі Джокович төрешіден бірден кешірім сұрап, зардап шегушіге орнынан тұруға көмектесті.
Турнирдің ережесіне қарайтын болсақ, мұндай жағдай, яғни спортшының агрессияға жол беруі бірінші рет болғанда ескерту беру керек. Екінші рет – бір ұпайға жазалануы қажет. Үшінші рет бір геймге, ал төртінші рет теннисші ереже бұзса, шеттетілуі керек еді. Дегенмен ұйымдастырушылар бұл ережелерге қараған да жоқ.
Турнирдің тағы қосымша ережелері де бар. Ұйымдастырушылар осыны алға тартты. Бұл ереже бойынша кейбір жағдайларда супервайзер өздігінен де шешім қабылдай алады. Джоковичке келгенде супервайзер осыны алға тартып, теннисшіні шеттетуді дұрыс деп санады.
Енді Джоковичтің бұл турнирде жинаған барлық ұпайы есептелмейді. Оның үстіне ол айыппұл төлейді.
Теннис тарихына көз жүгіртетін болсақ, мұндай жағдай бірнеше рет тіркелген. 1995 жылы Тим Хенмен деген теннисші «Уимблдон» турнирінде жұптық сайыс кезінде доппен болбойды «нокаутқа» түсіргені үшін шеттетілген. Ал 2000 жылы Штефан Кубек «Ролан Гаррос» турнирінде осындай әрекеті үшін жазаланды.
Негізі АҚШ-тың ашық біріншілігінде өткен аптада осындай жағдай тіркелді. Бельгиялық Аляж Бедене деген теннисші допты шығарып жіберемін деп, ойынды түсіріп жатқан оператордың тұмсығына тигізген. Бірақ ол ешқандай зардап шекпеді. Ал ұйымдастырушылар теннисшіге ешқандай жаза қолданбады.
Джоковичтің өзі бұл жағдайға қатысты пікір білдірмеді. Ол Билли Джин Кинг атындағы Ұлттық теннис орталығынан кетіп қалды. Айтпақшы, бұл қылығы үшін сербиялық теннисші тағы айыппұл төлейді. Матчтан кейін негізі ол баспасөз жиынына қатысып, бұл жағдайды түсіндіріп беруі керек еді.
Бұл – бірінші нөмірлі теннисшінің 2020 жылғы бірінші жеңілісі. Жалпы, Джокович 26 ойынды қатарынан жеңіп келе жатқан. Соңғы рет ол 2019 жылы дәл осы US Open турнирінде жеңілген. Былтыр да ол 1/8 финалдан аса алмады. Ол кезде швейцариялық Станислав Вавринкадан ұтылған болатын.
Каррена-Бутса болса ширек финалда канадалық Денис Шапавалов деген теннисшімен кездеседі. Бұл испан теннисшісінің US Open додасындағы ең жоғары жетістігі.
Орайы түскенде айта кетейік, АҚШ-тың ашық біріншілігінер Михаил Кукушкин, Александр Бублик, Зарина Диас, Елена Рыбакина және Юлия Путинцева секілді отандастарымыз барды. Бублик пен Диас бірінші айналымда сүрінді. Ал Рыбакина екінші айналымнан, Кукушкин үшінші айналымнан аса алмады.
Қазір аталған додада Путинцева ғана қалды. Әлемдік рейтингте 35-сатыда тұрған 25 жастағы отандасымыз ширек финалға шықты. Әрине, көрсеткіш жаман емес. Оның үстіне бұл – АҚШ-тың ашық біріншілігіндегі қазақстандық теннисшілер арасындағы үздік көрсеткіш. Дегенмен Юлияның жартылай финалға шығатын мүмкіндігі жоғары. Ол ширек финалда рейтингте 41-орында тұрған америкалық Дженнифер Брейдимен кездеседі. Америкалық арумен Путинцева бұған дейін екі рет кездесіп, екі рет жеңіске жеткен.