Қоғам • 01 Қазан, 2020

Той тойға ұласып жатыр?!.

666 рет
көрсетілді
5 мин
оқу үшін

Жаһанды жайлаған коронавирус індеті талайдың тағдырына қауіп төндіріп, талайдың өмірін қиды. Соңғы бір ғасыр бедерінде болмаған ауыр сынақ Қазақ елін де айналып өткен жоқ. Бұл кезеңде мемлекет тарапынан тиісті шаралар қабылданып, жүйелі жұмыстар жүргізілді. Әлі де нақты жоспарлар бар.

Той тойға ұласып жатыр?!.

Президент Қасым-Жомарт Тоқаев «Жаңа жағдайдағы Қа­зақстан: іс-қимыл кезеңі» ат­ты Жолдауында Елімізде жер-жа­һанға зор қауіп төндірген пан­­демияға қарсы күрес әлі де жал­ғасуда.

Біз азаматтардың өмірін және денсаулығын қорғау үшін бар күш-жігерімізді біріктірдік», деген болатын. Әрине, бұл орайда адамның өмірі мен қауіпсіздігі басты орында болуы тиіс. Бірінші кезекте әр адам өзінің жеке өмірі үшін жауапты. Сондықтан да мейлінше оқ­шаулану бүгінгі күннің басты талабы. Елімізде карантин талаптары жеңілдетілгенмен, толығымен алынған жоқ. Санаға салмақ салатын, сабақ болатын жағдай­лар көп болды. Бірақ осындай мәселелерге қарамастан Тараз қаласында той жасау тыйылмай тұр. Шаһардың әр бұрышында орналасқан мейрамханаларда әсіресе демалыс күндері күндіз де, түнде де жиын-той өтіп жат­қан жағдайларды көруге болады.

«Біз қаладағы мейрамха­на­ларға карантин тәртібін сақ­тау бойынша арнайы рейд ұйым­дастырдық. Демалыс күндері жұмыс істеуге тыйым салынған нысандарды зер­делеу кезінде «Сәтті», «Бүр­кіт», «Ақсарай», «Сұлтан сарай», «За­равшан», «Севинч», «Ерға­ли» және «Ін­жу-Маржан» сынды бір­неше мейрамханада той-то­ма­лақ секілді жиындардың бол­ға­ны анықталды. Осы заңсыз­дық бойынша жергілікті полиция қыз­­меті қажетті материалдарды жи­­нақтап, әкімшілік шара та­ға­­йын­дау үшін облыстық тауар­лар мен қызметтердің сапасы мен қауіпсіздігін бақылау депар­та­ментіне жолдайтын болады», дейді Тараз қаласы әкімінің орын­басары Алмас Садубаев.

Жалпы, осы уақытқа дейін Та­раз қаласы бойынша бірқатар мей­рамханалардың иелеріне айып­пұл салынып, олардан 10 мил­лион тең­геге жуық қара­жат өнді­ріл­ген. Дегенмен қала әкім­дігі тара­пы­­нан қанша жерден тосқауыл қо­йыл­са да, заң бұзушылықтардың тоқтайтын түрі жоқ екен. Бұл ретте әкімнің орынбасары басты мәсе­ле той иелерінде емес, мейрамхана басшы­ларында екенін айтады. «Олар тапсырыс алмай, белгілі бір уақытқа дейін жұмыстарын тоқ­та­та тұрса, мына әлемді әбігерге са­лып отырған індеттің екінші тол­­қыны болмас та еді», дейді ол. Ал Та­раз қа­ла­лық жергілікті по­­ли­ция қыз­метінің бөлім бас­ты­ғы, поли­ция полковнигі Сә­бит Ма­мыт­бековтің айтуынша, мей­­­рам­ха­­на қожайындарына ка­ран­­тин ша­раларын бұзғаны үшін жауап­кершілік бар екені ескер­тіл­­ген. Бірақ нәтиже әлгіндей болып отыр.

Елімізде карантин талаптары енгізілген уақытта да Жам­был об­лы­сының аумағында той жасаған жағдайлар жиі кез­десті. Кезінде осы үшін той мен тойхана иелеріне де айыппұл салынған. Мәселен, Шу ауданында карантин кезінде-ақ қыз ұзату тойын жасаған мектеп директорының әрекеті әлеу­меттік желілерді шулатты. Одан бөлек, Тараз қаласында да той, беташар сияқты жиын­дарды өткізген жағ­дайлар болды. Тіпті Қордай ауданында жа­­наза кезінде де карантин та­лап­тары сақталмағандықтан, ал­ты бір­дей адамның қауіп­ті індетті жұқ­тырғаны анықтал­ды. Мұның бәрі де кей тұрғын­дар­дың мәселеге жүр­дім-бар­дым қарағанынан орын алған жағдайлар. Алайда, бұл орай­да мейрамхана иелерінің де өз­де­рінің айтатын базынасы бар. Олар тек мейрамханалар мен тойха­наларға ғана кінәні артып қою дұрыс емес деп есептейді. Сен­бі мен жексенбі күндерін есеп­темегенде қаладағы базарлар мен кішігірім дәмханаларда да са­нитарлық режімнің сақтал­май отыр­ғанын айтуда. Тойхана иеле­­рінің айтуынша, адамдар бір-бірі­мен осындай және басқа да көп­шілік орындарда жиі араласуда. Сон­дықтан да олардың пікірінше, бар­лық мәселені мей­рамханаға әкеліп тіреп қоюға болмайды.

«Жалпы, қала бойынша 14 нау­рыз бен 17 қыркүйек ара­лы­ғында ешбір мейрамхана жұмыс істеген жоқ. Тек 17 қыркүйектен ғана ка­рантиннің жеңілдетілуіне байланыс­ты рұқ­сат алып, ақы­рындап той-томалақты ұйым­дас­тырып жатырмыз. Бү­­гінде мейрамханамызда 50-ге жуық қыз-келіншек жұмыс істеп, отбасын асырап келеді. Біз сол 50 адам­ның айлығын әрең тауып беріп отырмыз. Оның үстіне несиеміз тағы бар», дейді Тараз қаласындағы «Гауһартас» мейрамханасының қожайыны Меруерт Лештаева. Кә­сіпкер банктен алған қарыздың уақыты шегерілсе деген де тілегін жет­кізді. Ол «Қыс мезгілінің қар­саңында тым болмаса мейрамхана жұмысшылары бала-шағаларына қыстық киімдерін алып беріп үл­гер­се», дейді.

Қазақ халқы отбасылық қуа­ныш­­ты ерекше бағалаған ел. Кез кел­ген адам атаулы күнді ағайын-туы­сын шақырып атап өткісі ке­ле­ді. Бірақ дәл бүгінгі жағдайда бұл мүмкін болмай тұр. Десе де, «Той дегенде қу бас та домалайды» дегендей, Таразда той жасау әлі тыйылмай тұр. Бұл мәселе­ні әкім­­дік кәсіпкерлерге сілтесе, олар өз­дерінің жағдайын айтып ақталуда.

 

Жамбыл облысы