Білім • 02 Қазан, 2020

Шәкірт жүрегіндегі ұстаз

2130 рет
көрсетілді
4 мин
оқу үшін

Кім-кімге де мамандық таңдау оңай емес. Мамандық таңдауға кездейсоқ ұшырасқан жандардың да ықпалы тиіп жатады. Алайда толғауы тоқсан тіршілікте өмірге қанат қақтырған ұстазды ұмытуға бола ма? Өйткені ұстаз – ең ұлық мамандық иесі. Махамбет ауданында тұратын ардагер Сұлташ Қуанышев әлі күнге ұстаздарын қимастықпен еске алады.

Шәкірт жүрегіндегі ұстаз

«Бізге мектепте математика пәнінен Қайдар Хамзин деген ағай сабақ беріп еді. Сол ағай біз мектеп бітірер жылы төрт оқушыны «Тау-кен институ­тына оқуға барыңдар» деп маман­дық таңдауға дайындай баста­ды. Арасында мен де бар едім. Құжаттарымызды оқу орнына поштамен жіберді. 1951 жылы қолымызға аттестат алып, Алматыға қарай жолға шықтық. Сол кезде пойыз ұзақ жүретін. Күн батуға таяғанда пойызымыз вокзалға тоқтады. Ауылдан алысқа ұзап шықпаған кезіміз. Оның үстіне бұрын келмеген, көрмеген қалада қайда барарымызды білмей, аңтарылып қалдық. Қолымызда чемоданымыз бар, көше аралап жүрген едік. Қарсы жолыққан жігіт ағасы бізден жөн сұрады», деп еске алады Сұлташ Қуанышев.

Қазақ жерінің батыс қиырын­да ержеткен төрт түлек Тау-кен институтына оқуға түсуге кел­генін айтыпты. Алайда сол сәтте олардың тұрақтар жері жоқ еді.

«Айналайындар, алыстан келіп­сіңдер. Бұлай көшеде жүр­меңдер. Тентектер тонап кетуі мүмкін. Қазір сендерді жа­тақ­ха­наға орналастыра­мын. Тау-кен инстутынан құ­жат­тарыңды өзім алдырамын, ҚазПИ-ге оқуға түсің­дер. Мектеп­ке өздерің секілді жас­тар керек», депті бейтаныс адам.

Алматыға алыс ауылдан білім шырағын іздеп келген жастарға жанашырлық танытқан Абай атындағы Қазақ педагогикалық инс­титутының директоры Асқар Зака­рин екен. Үлкеннің алдынан кесіп өтпейтін, ақылын жер­ге тас­тамайтын ауылдың түлек­тері осылайша ҚазПИ-дің сту­денті атанд­ы. Соның бірі Сұл­таш Қуа­нышев 1955 жылы инсти­тут­тың физика факультетін бітіріп шықты.

«Асқар ағайдың сол жана­шыр­лығын әлі күнге ұмыта ал­май­мын. Өйткені ол бізді ұстаз болуға, шәкірт тәрбиелеуге бау­лыды. Өзінің тәжірибесімен бөлісетін еді. Мейірімді болуға үндейтін. Институт бітіріп, дип­лом алғанда жолдама басқа өңірге берілді. Тағы да Асқар Закариннің көмегі тиді. Сол кезде ол Оқу министрі еді», дейді Сұлташ Қуанышев.

Мұғалімдік еңбек жолын Дос­сордағы орта мектепте бас­таған жас мұғалім 1961 жылы Махамбет ауылына оралды. Мұнда мектепте математика пәні­нен дәріс берді. Шәкірт­терінің талпынысын қолдап, мейірім шуағына бөледі. Соның жемісі болар, оның дәрісін тыңдаған, математика сынды қиын пәннің қыр-сырына қаныққан шәкірттері ұс­та­зын ұмытқан емес. Оны жыл сайын кәсіби мерекесімен құт­тық­тайтын, ай аралатып хабарласып тұратын шәкірті көп. Солардың қатарында белгілі мемлекет қайраткері Иманғали Тасмағамбетов те бар.

«Әр оқушы – бір әлем. Сон­дық­­тан ұстаздар оқушылар­ды баурай білуі керек. Сонда шәкірт­тердің бойында бұғып жатқан қабі­леті ашылады. Сабақ­қа ынтасы да, үлгерімі де артады. Өзім дәріс берген шәкірттерімнің осалы болған жоқ. Бәрі де алғыр­лығы­мен, зеректігімен танылды. Сабақ­ты үздік оқыды. Қоғамдық жұмыс­тарға белсене араласты. Солар­дың арасынан елге танымал аза­маттар шықты», дейді «Қазақ КСР ағарту ісінің үздігі» төсбел­гі­сінің иегері атанған ардагер ұстаз.

Кейіпкеріміз ұстаздық жұ­мыс­пен шектелген жоқ. Кезінде аудандық партия коми­тетінің саяси ағарту, үгіт-насихат бөлі­мін басқарды. Ал еліміз тәуел­сіздігін алып, әкімдік институты енгізілген тұста Махамбет ауыл­дық округінің әкімі лауазы­мын атқарды. Қазір ардагер ұстаздың жолын қызы Гүлмира жалғастырып келеді.

 

Атырау облысы,

Махамбет ауданы

Соңғы жаңалықтар

Аймақ ажарланып қалды

«Таза Қазақстан» • Бүгін, 08:50

Мал өсірсең, қой өсір...

Шаруашылық • Бүгін, 08:48

Заң уақыт сұранысына сай

Қоғам • Бүгін, 08:45