Медицина • 12 Қазан, 2020

Індетке шалдыққан емхана қызметкерлеріне өтемақы төленбеген

536 рет
көрсетілді
3 мин
оқу үшін

Қауіпті індетке қарсы күресетін дәрігерлерге үстемеақы төлеу – әзір күн тәртібінен түспейтін мәселе. Мемлекет басшысы өткен аптада дәл осы мәселеге ерекше тоқталып, Үкімет пен әкімдерге ескерту жасаған еді. Алайда Президенттің өзі айтқандай, жергілікті жерде үстемеақы мен сақтандыру төлемдерін төлеуде бюрократиялық кедергі әлі жойылған жоқ. Соның бір дәлелі Атыраудағы №1 емханада кездесіп отыр.

Індетке шалдыққан емхана қызметкерлеріне өтемақы төленбеген

Аталған емхана 65 мың тұр­ғынға қызмет көрсетеді. Мұн­да 300-ге жуық медицина қызметкері жұмыс істейді. Алай­да бұл емханада коронавирус инфекциясын жұқтырған медициналық қызметкерлерге төленетін өтемақыға қол жеткізе алмағандар бар. Мәселен, емханада тіркеуші болып жұмыс істейтін көпбалалы ана Мария Қонарова алғашқылардың қатарында коронавирус инфекциясын жұқтырған.

– Коронавирусқа қарсы тап­сыр­ған тест оң нәтиже көрсетіп, оған қоса пневмония диагнозы қойылды. Ауруханада емделіп шықтым, – дейді М.Қонарова. – Әріптестерімнің арасында емделген соң жұмысқа қайта шыққандары бар. Біз өтемақы алуға екі рет құжат тапсырдық. Бірақ екеуінде де өтемақы төлен­ген жоқ. Оның себебін де түсін­дір­мей, бас тартылды. Неге?

Емхананың рентгенологы Аза­мат Әділбекұлы пандемияның бірінші толқынында дене қызуы 390С-қа көтерілсе де жұмыс орнын тастап кетпеген. Оны алмастыратын екінші рентгенолог ауырып, жұмысқа шықпай қалған.

– Компьютерлік томография нәтижесімен пневмония болсақ та, қызметімізді атқара беруге тура келді. КТ-ға өз әріптестерімді де түсірдім. Олардың көбінде пневмония болғанын дәлелдей аламын, – дейді Азамат Әділбекұлы.

Медбике Балжан Төлеге­но­ва­ның да қауіпті індетпен ауыр­ғанын дәлелдейтін компью­тер­лік томографиядан алған анық­тамасы бар. Бірақ неге еке­ні белгісіз, оған да әлі күнге өтемақы төленбей отыр. Блок-бекет­те жұмыс істеп, кәсібіне адалдығынан таймаған медбике Президент тапсырмасының орындалмағанына налиды.

Адал еңбегі еленбеген медицина қызметкерлерімен об­лыс­­тық денсаулық сақтау бас­қар­масы басшысының мін­де­тін уақытша атқарушы Асхан Бай­дуә­лиев кездесу өткізді. Алай­да ол өтемақы­ның комиссия шеші­мімен ғана төле­нетінін түсінді­ру­мен ғана шек­телді.

– Президенттің тапсырмасына сәйкес, Денсаулық сақтау минист­рлігі мен Еңбек және ха­лық­­­ты әлеуметтік қорғау ми­нис­т­р­лігінің қызмет барысында коронавирус жұқтырған меди­циналық қызметкерлерге эпи­демиялық тексеру нәти­жесін­де өтемақы төлеу туралы бірлескен бұйрығы бар. Соған сай ке­летін дәрігерлерге өтемақы төленеді. Қазір Атырау облысында коронавирус инфекциясы мен вирустық пневмония жұқтырдық деп жәрдемақы алу үшін 955 медицина қызметкері құжат тапсырды. Олар­дың құжаттарын коронавирус індетімен күресте қызмет еткен медицина қызмет­кер­ле­ріне үстемеақы мен өтемақыны төлеу жөніндегі комиссиясы тұ­­рақ­­т­ы түрде қарауда, – дейді Асхан Байдуәлиев. – Осы кезге дейін комиссия 9 отырыс өткізді. Құжат­тардың 474-і мақұлданып, 481-і кері қайтарылды. Бірақ жа­қында аталған бұйрыққа бір­қатар өзгеріс енгізілуіне байланысты дәрігерлердің құжаттарын комиссияға қайта беріп, қазір қаралып жатыр.

Бұл емхананың бұдан өзге де түйткілі бар екен. Басқарма басшы­сының міндетін уақытша атқарушының айтуынша, №1 Атырау қалалық емхананың есепшотынан 70 млн теңге ұрланып кетіпті. Ұрының есепшоттан ірі көлемдегі қаржыны электронды түрде қолды еткені анықталып отыр. Қазір құқық қорғау органдары тиісті тергеу-анықтау жұмыстарын жүргізіп жатыр.

 

Атырау облысы

 

Соңғы жаңалықтар