Мәселен, Талдықорған қаласында қоғамдық көлік қатынасы арнайы кесте бойынша жүре бастады. Сондай-ақ адам көп шоғырланатын сауда-саттық, мәдени мекемелер мен спорт нысандарының қызметіне де шектеулер енгізілді. Мекемелердегі қызметкерлер санын мейлінше азайту мақсатында қашықтан жұмыс істеу режімі қайта қолданылуда.
Жалпы, Алматы облысында жеке қорғану құралдарының 3 айлық қоры, дәрілік заттардың 2 айлық қоры бар екен. Ал пандемиямен күреске жергілікті бюджеттен 13 млрд теңге қарастырылған болса, оның 8,1 млрд теңгесі екінші толқынға дайындық үшін бөлінген.
– Облыстың денсаулық сақтау мекемелерінде жеке қорғану құралдарының 3 айлық қоры, атап айтқанда 6,2 млн бетперде, 2,5 млн дана қолғап, 74,6 мың бір рет қолданылатын қорғаныш костюмдерінің жиынтығы бар. Ал дәрілік заттардың 2 айлық қоры қалыптастырылған, нақтылап айтсақ, стационарларда 1,4 млрд теңгеге 204 түрлі дәрі, амбулаторияларда 101 млн теңгеге 5 түрлі дәрі қоры бар, – дейді облыс әкімінің орынбасары Батыржан Байжұманов.
Сондай-ақ тұрақтандыру қорына қосымша 800 млн теңге бөлініп, жалпы қаржы көлемі 1,3 млрд теңгені құрады. Оның ішінде 500 млн теңгеге дәрілік заттардың 30 түрін сатып алуға «INKAR» ЖШС бірыңғай дистрибьютерімен келісімшарт жасалған. Мұнан бөлек, «СҚ Фармация» арқылы дәріханалар үшін 33 түрлі дәріге 63 млн теңгелік өтінім берілген, қосымша 1 млн дана бетперде сатып алынды. Осы ретте халықтың әлеуметтік осал топтары да назардан тыс қалмайды. Мұқтаж адамдар үшін жергілікті бюджет есебінен 92 млн теңгеге вирусқа қарсы препараттардың 4 түрі сатып алынған екен.
Айтпақшы, Алматы облысы жеке қорғану құралдары өндірісін жолға қойған бірегей өңір. Аймақтағы «Долче», «СП «Абди Ибрахим Глобал Фарм», «Келун-Казфарм» компаниялары отандық нарыққа дәрі-дәрмек қана емес, медициналық препараттар да шығарып жатыр. Жыл басынан бері медициналық маска тігуге 5 тігін кәсіпорны бейімделді. Бір ғана Талдықорған қаласында маска тігетін үш қабатты цех жұмыс істейді.
Жалпы, өңірдегі өндірістер тәулігіне барлығы 250 мың данадан астам бетперде шығарады. Ал облыс дәріханаларында сатылатын масканың бөлшек саудадағы орташа бағасы 40 теңге шамасында.
Алматы облысы
