«Қазіргі кезде ішкі туризмге деген сұраныстың жоғары екендігін байқап отырмыз. Бұл өте жақсы үрдіс, бірақ жаңалықтардан көріп, оқып отырғанымыздай туризмнің дамуына байланысты жағымсыз жағдайларды естен шығармауымыз керек. Бұл қағидаттар табиғатты сақтау идеясын ғана емес, сондай-ақ Қазақстанға осы сала үшін ең маңызды ресурсты сақтай отырып, ұзақмерзімді эко-демалысты дамытуға мүмкіндік береді», деп атап өтті Денис Лукянчук.
Сала мамандары биылғы пандемия жағдайында ішкі туризмге сұраныстың артқанын айтуда. Бірақ елімізде белсенді демалыстың мәдениеті қалыптаспауы салдарынан демалушылар табиғатқа орасан зор зиян әкелуде. CAMPIT белсенді демалыс жөніндегі коммьюнитидің негізін қалаушы Денис Лукянчук саяхатшыларға белсенді демалыстың ережелерін түсіндіру керек дейді.
«Бүгінде белсенді демалысты ұйымдастыру үшін арнайы қосымшалары жүктелген ұялы телефон болса, жеткілікті. Таулар, көлдер, шөлдер, құмдар, жазғы және қысқы тау шаңғысы. Әркім өзіне ұнайтын демалысты таңдай алады. Оның үстіне инфрақұрылым да дамуда. 2ГИС-тің өзінен 68 тау жолын таба аламыз. Табиғат аясында демалу трендке айналғанын көріп отырмыз. Дамуға ынталандыру бар. Бірақ өзін қалай ұстау керек екендігін бәрі бірдей біле бермейді. Міне, осы ережелерді белсенді түрде насихаттау керек», деп түйіндеді белсенді.
Алматы өңірінің туристік кластері қауымдастығының мүшесі, «Жібек Жолы» ЖШС директоры Тимур Дүйсенғалиев Қазақстанның таулары белсенді демалысты дамыту үшін зор әлеуетке ие екенін айтады. Спикердің айтуынша, Дүниежүзілік туристік ұйым (UNWTO) тау аумақтарына деген қызығушылықты туризм нысаны ретінде растады. Статистикаға сәйкес, кейінгі жылдары экологиялық таза аймақтарда табиғатпен тілдесу үшін, урбанизация минималды әсер етілген жерлерге келушілер саны едәуір артқан.
«Біз БҰҰ Тұрақты Даму Мақсаттарын қолдаймыз және антропогендік жүктеудің өсу жағдайында таулы аймақтардың осалдығын түсінетін қоғамдық бірлестіктер мен ұйымдар ретінде Kazakh Alpine Club құрған болатынбыз. Сонымен қатар экологияны сақтау мен халықаралық стандарттарға сәйкес болу мақсатында туристердің қауіпсіздігін қамтамасыз ету үшін тиісті инфрақұрылыммен бірге белсенді демалу түрлерін дамытуды жоспарлап отырмыз. Тау Омбудсмені ретінде біз барлық мемлекеттік және басқа да ұйымдармен аккредиттеу, салалық және қоғамдық кеңестерге кіру арқылы таулы аймақтарды игеру жобаларын, соның ішінде Ұлттық табиғи саябақтарды, бастамашыларының меншік түріне қарамастан ашық, заңды түрде талқылау үшін ынтымақтастық орнатамыз», деді спикер.
Айта кетейік, қазақстандық клуб Халықаралық Альпі қоғамдастығының құндылықтары мен қағидаларын ұстанады. Алдағы уақытта шетелдік Аlpine Club-пен тәжірибе алмасу және туристерді тарту бойынша белсенді жұмыс істеу жоспарланған.
