Денсаулық сақтау басқармасының мәліметіне қарағанда, медициналық мекемелерде коронавирус инфекциясына қарсы препараттардың жеткілікті қоры жасақталған. Жеке қорғаныш құралдары апта сайын үздіксіз жеткізіледі. Ал қауіпті індетке шалдығып, ем алып жатқан науқастар үшін амикацин, азитромицин, натрий гепарині, дексаметазон, дексамедетомидин секілді басқа да антибиотиктердің бірнеше түрі бар. Алайда мониторингтік топтың мүшелері №3 Атырау қалалық емханасындағы жағдайдың басқаша екенін анықтады. Өйткені, олар емханаға кіреберісінен-ақ медициналық бетперденің болмағанына көз жеткізген. Ал жауапты қызметкер бетперденің қазір ғана таусылып қалғанын айтқан. Қаладағы 4 900 тұрғынға қызмет көрсететін емхананың қорындағы кейбір дәрі-дәрмектің саны жеткіліксіз болып шыққан.
– Мамандардың айтуынша, мәселен «Ксарелто» таблеткасы мен «Дексаметазонның» шамамен екі айға жеткілікті мөлшері 5 мың дана болуы қажет. Мұндағы қоймада аталған дәрілердің тек 10 дана қорабы бар. Аталған емхананың директоры Айман Өтегенова өзге дәрі-дәрмектер бірінші қабаттағы дәріханада барын мәлім етті. Бірақ, мониторингтік топ мүшелері бұл жауапқа қанағаттанбай, қоймадағы қажетті дәрі-дәрмектің қорын әлі де толықтыру қажеттігіне назар аударды, – деп хабарлады өңірлік департаменттің баспасөз қызметі.
Қоғамдық бақылаушылар тобы «СҚ-Фармация» мекемесінің Атырау облысындағы қоймасынан дәрі-дәрмекті де, жеке қорғаныш құралдарын да таба алмады. Бір таңданыс тудыратын мәселе – Атырау облысына берілуі тиіс екі айлық дәрі-дәрмектер Ақтөбе облысында сақталатыны. Неге бұлай? Мұның себебін аталған мекеме өкілдері түсіндіре алмайды.
Осындай олқылық облыстық кардиологиялық орталықта да кездесіп отыр. Өйткені мұнда да коронавирус инфекциясын жұқтырған науқастарды емдеуге қолданылатын дәрі-дәрмектің екі айлық қоры қоймаға жеткізілмеген. Орталық директоры Марат Қонысовтың пікірінше, қауіпті індетті жұқтырған науқастарды кардиологиялық ауруларға арналған дәрі-дәрмекпен емдеуге болады екен.
Өңірдегі медициналық ұйымдардың қоймасында сақталған дәрілік заттардың екі айлық қорына қатысты облыстық денсаулық сақтау басқармасының ұстанымы қандай? Шынымен де ахуал дәл осылай қалыптасып отыр ма? Емханалар дәрі-дәрмекпен толық қамтылды ма? Әлде... Басқарманың баспасөз қызметі таратқан ақпаратқа сүйенсек, Денсаулық сақтау министрлігінің №666 бұйрығы бар. Онда коронавирус инфекциясын емдеу үшін амбулаториялық дәрі-дәрмектермен қамтамасыз ету көзделген. Соған сәйкес, осы жылдың 20 шілдесінде емдеу тізіміне үш антикоагулянт пен екі қызу түсіретін дәрілік препарат енгізіліпті. Қазір облысқа аталған препараттардың 194 460 данасы әкелінген. Яғни бұл дәрілік заттардың барлығы бастапқы медициналық санитарлық ұйымдардың қоймаларында сақтаулы тұр.
– Ал Атырау қалалық №3 емханаға қатысты айтар болсақ, 53 380 дана дәрілік зат қорда тұр. Пандемияның бірінші толқынында аталған емхана тіркелушілерінің 1 пайызы ғана коронавирус инфекциясына шалдыққан. Осы көрсеткішті ескерсек, №3 емхананың қоймасында қазір тіркелушілердің 7 пайызына жететіндей дәрілік заттар бар. Емханаға келген топ емханадағы күнделікті дәріні ғана қараған, – дейді облыстық денсаулық сақтау басқармасының медициналық көмекті ұйымдастыру және лицензиялау бөлімінің басшысы Нина Оспанова.
Оның айтуынша, мониторингтік топ негізгі қоймаға барған кезде «СҚ-Фармация» ЖШС өкілі операциялық қоймаға дәрілік заттар тек медициналық ұйымдардың сұранысына сәйкес әкелінетінін алға тартқан. Батыс өңірі үшін дәрілік заттар Ақтөбе қаласындағы қоймада сақталады. Атырау облысындағы филиалдың сұранысына сай дәрілер әр аптаның сәрсенбісінде әкелінеді. Мониторингтік топ қоймадағы дәріні облыстағы медициналық ұйымдарға таратып, қойманың босаған кезіне тап келген-міс.
– Қордағы дәрі мәселесі көтерілгенде Денсаулық сақтау министрлігі және «СҚ-Фармация» ЖШС басшылығымен хабарласып, Атырау облысына тиесілі дәрілік заттарды өңірдегі қоймаға әкеліп қою туралы сөйлескен едік. Бірақ, олар Атырау облысындағы емханалар мен қоймада қажетті дәрілік заттардың жеткілікті екенін алға тартып отыр. Мәселен, 21 қазанда «СҚ-Фармация» ЖШС қоймасына 35,6 млн теңгенің 80 түрлі дәрісі әкелінді, – дейді Нина Оспанова.
Облыстық денсаулық сақтау басқармасының мәліметіне сүйенсек, облыс әкімінің тапсырмасымен, сондай-ақ демеушілік қолдаумен «Іңкәр» ЖШС арқылы 251 млн теңгенің дәрілік заттары алыныпты. Бұлар Атырау қаласының Геолог кентіндегі емхананың қоймасында сақтауға қойылыпты. Сонымен бірге «Атырау» әлеуметтік кәсіпкерлік корпорациясы» АҚ арқылы 500 млн теңгеге дәрілік заттардың төмендемейтін тұрақтандыру қоры жасақталды. Қазір бөлшек саудамен айналысатын дәріханалар үшін екі-үш айлық дәрілік заттардың қоры «Іңкәр» ЖШС қоймасында сақтаулы екен.
Атырау облысы
