Аңызға сенгіш халықтың ұрпағы ретінде көнекөздер осынау құт мекеннің қадір-қасиетін ұрпақтар санасына ұялатып келеді.
Жаһанданумен жаға ұстасқан бүгінде бұл рухани майдан бұрынғысынан да қыза түсуде. Ұлттың ұпайын түгендер тұста тағылымды тарихы бар Қазығұрттың қадір-қасиетін кейінгі толқынның көңіл көкжиегіне қондыру үшін бірқатар ауқымды жұмыс қолға алынуда.
Сол ершімді еңбектің ішінде оңтүстік журналистикасының ардагері Байдулла Қонысбек ағамыз төрағалық ететін «Киелі Қазығұрт» қоғамдық қорының тындырымды тірлігін ерекше атап өтуге болады.
2000 жылдан бері киелі Қазығұрт тауының тарихи маңызын жан-жақты насихаттау мақсатында құрылған қоғамдық қор бүгінге дейін көптеген іс-шара атқарды.
Тарихқа тағзым жасалған сол шаралардың бірінде, нақтырағы 2007 жылы «Киелі Қазығұрт» қоғамдық қорының ұйымдастыруымен Қазығұрт тауының ұшар басына биіктігі 7 метр, табан ауданы 4х4 метр болатын «Қазығұрт – Алтын қазық» атты ескерткіш қойылған еді. Ескерткіштің төбесіндегі диаметрі 1 метр болатын айнашар бүгінде Шымкент қаласынан жарқырап көрініп тұрады.
Осы ескерткіштің символикалық белгісі, яғни «Қазығұрт – Алтын қазық» арнайы белгісі 2012 жылдан бастап түрлі салаларда елеулі жетістікке жеткен, ел татулығы мен бірлігінің нығаюына айтарлықтай үлес қосқан, сонымен қатар өзінің игі істерімен көпшілікке үлгі болып жүрген мемлекетшіл һәм елжанды тұлғаларға беріліп келеді.
Жыл сайын дәстүрлі түрде табысталатын бұл марапатқа биыл өлкенің өркендеуіне еңбек сіңірген 4 азамат лайық деп танылыпты.
Міне, сол игі шараны өткізу үшін таңмен таласа тал бесік – Қазығұртты бетке алған бір топ зиялы қауым әуелі Төлеби ауданындағы Ғайып Ерен Қырық Шілтен әулиеге, онан әрі Ақбура әулие кесенесіне зиярат етіп, Қазығұрттың етегіне бір сәт дамылдады.
«Жебе» баспа үйінің директоры Жарқынбек Төлтебаев Қазығұрттың көпшілік біле бермейтін құпияларымен бөлісіп, туристерге қолайлы орта қалыптастыруды мақсат тұтқан жобалармен таныстырды.
Бір әттегенайы, экс әкім Жансейіт Түймебаевтың тұсында қолға алынған «Наурыз Қазығұрттан басталады» шарасы, Қазығұрт тауын туризм орталығына айналдыру жобасы жалғасын таппай отыр. Жергілікті билік өкілдерінің айтуынша, бірінші әлемді жаулаған індет, екіншіден бюджеттік қолбайлау келелі іске кедергі келтіріпті.
Қазақстанның киелі жерлер тізіміне енген әулиелі орындарға жасалған сапардың соңы облыстық «Оңтүстік Қазақстан» газетінде жалғасын тапты. Қордың төрағасы Байдулла Қонысбек өткен шараның мән-маңызына тоқталып, салтанатты марапаттау рәсімін ашып берді.
«Киелі Қазығұрт» – елді ынтымақ-бірлікке, достыққа шақыратын қордың бірі. Өйткені «Киелі Қазығұрт» деген атауының өзі үлкен жауапкершілік пен ауқымды міндет жүктейді. Құрылғанына 20 жылдан астам уақыт болды. Сол жылдардың ішінде алға қойған мақсаты – Нұх пайғамбардың кемесі Қазығұртқа тоқтағанын, сөйтіп күллі адамзаттың тіршілігі осы жерден өсіп-өніп, тараған деген ақиқаты басым аңызды жалпақ әлемге жариялау. Қолымыздан келгенше соны насихаттап келеміз. Бұл туралы бірнеше деректі фильм, мультфильм түсірдік. Кітаптар шығардық. Бүгінгі табысталар марапат, марапатталушы азаматтар арқылы біз Қазығұрт атауының беделін онан бері биіктете береміз», дейді қордың төрағасы Байдулла Қонысбек.
«Киелі Қазығұрт» қоғамдық қорының ұйытқы болуымен дәстүрлі түрде өткізілетін «Қазығұрт – Алтын қазық» марапаты биыл 4 азаматқа тапсырылды. Олар – республикалық «Egemen Qazaqstan» газетінің басқарма төрағасы, Халықаралық Түркі академиясының президенті Дархан Қыдырәлі, Оңтүстік Қазақстан облысының, Қазығұрт, Төлеби аудандарының Құрметті азаматы Исмат Тұрсынқұлұлы, Оңтүстік Қазақстан облысы, Шымкент қаласының құрметті азаматы Әбдіғани Ташқараев, Түркістан облысы, Шымкент қаласы әкімінің бұрынғы орынбасары Ербол Садыр.
Алқалы жиында марапат иегерлерінің қай-қайсысы да өз саласында ел игілігі үшін еңбек еткен елеулі тұлғалар екендігі тілге тиек етілді. Әрі барша марапатталушыларды «Киелі Қазығұрт» атауына қызмет етуге, насихаттауға шақырды.
Белгілі жазушы, халықаралық «Алаш» әдеби сыйлығының лауреаты Мархабат Байғұт Тұңғыш Президентіміз Нұрсұлтан Назарбаевтың «Рухани жаңғыру: болашаққа бағдар» атты мақаласындағы мәселелер осы қоғамдық қордың жұмысымен ұштасып жатқанын айтты.
«Елбасының мақаласында «Туған жер» бағдарламасы туралы керемет айтылған. «Қазақстанның қасиетті орындарын көркейту үшін жергілікті әкімдіктер мен қоғамдық ұйымдар не істеу керек?» деген мәселені нақты көрсетіп берген. Сол «Туған жер» жобасының аясында «Киелі Қазығұрт» қоры да үлкен жұмыс атқарып келеді. «Қазығұрт – Алтын қазық» белгісі киелі жерлерді насихаттау үшін түрлі саладағы қоғам және мемлекет қайраткерлеріне беріліп келе жатыр», деді қарымды қаламгер.
Шара соңында осыған дейін аталған сыйлықтың 30-ға тарта азаматқа тапсырылғанын, олардың қатарында ел үшін аянбай тер төккен тұлғалар баршылық екендігі айтылды. Мәселен, «Асқар Мырзахметов, Сауытбек Абдрахманов, Бекет Тұрғараев сынды ел ағаларының марапатқа ие болғандығы аталған сыйлықтың беделін биіктете түсті», дейді шара ұйымдастырушылары.
Өз кезегінде кеудесіне медаль таққан алқаулы азаматтар сөз алып, қор төрағасы мен мүшелеріне өз алғыстарын білдірді.
Келелі жиында аңызға арқау болған Қазығұрт тауын Ұлы Жібек жолы бойындағы туристік бағыттың бір тармағына айналдыру үшін мемлекеттен қолдау сұрайтын хат дайындалатын болды. Сондай-ақ Қазығұрт асуында қаңқасы тұрған алып кеменің макетін жаңарту үшін кәсіпкер азаматтарды қор жұмысына белсене атсалысуға шақырды.
Қазығұрт – Шымкент
