Отбасы – кез келген жанның өзін қорғауда сезінетін бақыт мекені. Сондықтан шаңырақ құрғанда жастардың білім, тәжірибе, кеңестер мен қолдаудың жеткілікті болуы берік отбасы құруға алып келеді. ҚР Ұлттық экономика министрлігінің статистика мәліметтері бойынша Қазақстанда соңғы 10 жылда 1,5 млн жұп үйленсе, дәл осы кезеңде жарты миллионнан астам адам ажырасқан екен. Ажырасу саны жыл сайын артпаса, азаймақ емес. Ал, Аристотель айтқандай қоғам ол отбасы қауымдастықтарынан құралатынын ескерсек, елдегі отбасылардың негізі берік қалануы – мемлекеттік деңгейдегі ауқымды мәселе.
Осы орайда, отбасыны сауатты құрып, әйелдер мен балалардың қауіпсіздігін қамтамасыз етуге арқау болған бүгінгі іс-шара қоғаманың өзекті мәселесін ортаға салды. Жиында алғаш болып сөз сөйлеген Баян Айтбековна қаладағы тағдыр талқысына түскен отбасылар мен балалар мәселесі бақылауда екенін айтты. Соңғы 6 ай аралығында "ONEGE" республикалық жобасы аясында қаламыздағы қиын жағдайға тап болған 25 отбасыға көмек көрсетіліп, 125 кеңес беру жұмыстары жасалған. "Аталған шаралардың мақсаты – қиындыққа душар болған отбасыларға тығырықтан шығар жол көрсетіп, балаларға қауіпсіз жағдай жасау", – деді қалалық әйелдер Кеңесінің төрайымы.
Қазіргі таңда қаламызда тұрмыстық зорлық-зомбылыққа тап болатын әйелдер саны да сейілер емес. Аранулы әлеуметтік қызметтер көрсететін "Самғау сенім" КММ-нің әлеуметтік консультанты Гульчехра Моминованың айтуынша тұрмыстық зорлық-зомбылыққа тап болған арулармен нағыз мамандар, әсіресе бұрын соңды осындай жағдайды өз басынан өткізген әйелдер жұмыс жасау керек. Себебі, орталыққа жүгінентін жандар жағдайды бірден ашып айтпайды, оның үстіне олардың көп бөлігі жас қыз-келіншектер. Тұрмыстық зорлық-зомбылық құрбандарымен әңгімелескенде де арнайы ержелерді сақтау керек. Жүрек түкпіріндегі мұң-мұқтажын түгел ақтару үшін зорлық-зомбылық құрбанына оны қолдап түсінетін жандардың бар екенін сездіру қажет. Сонда ғана мәселе оң шешімін таппақ.
Сонымен қатар тұрғылықты жерінен айырылған жандарға "Самғау сенім" орталығының арнайы баспанасы жұмыс жасайды. Ол жерде қиын жағдайға тап болған азаматтар 6 айға дейін тегін тұрақтай алады.
Аталмыш мәселе аясында іс-шаралар алдағы уақытта да жалғаспақ. "Сингапурлық методика" негізінде жас аналардың біліктілік деңгейін көтеру және 9-12 жас аралығындағы бүлдіршіндердің кәсіпкерлік, менеджмент бағыттары бойынша білім беру жобасының жоспарымен Гүлнара Усенова бөлісті.
Ал, Баян Айтбековна 5-6 қараша күндері әлеуметтік сала жұмысшыларымен отбасылық құндылықтарға байланысты семинар-тренинг өтетінін хабарлады. Семинарға қатысушыларға арнайы сертификаттар табысталады.
Жиын соңында қатысушыларға отбасылық сауаттылықты арттыратын оқулықтар табысталып, сұрақ-жауап бөліміне кезек берілді.
Айта кетейік, бәрімізге белгілі 25 қараша – халқаралық зорлық-зомбылықпен күрес күні. Осыған орай жыл сайынғы республикалық "Зорлық-зомбылыққа қарсы 16 күн" акциясы биыл да жалғасын таппақ. Бұл іс-шараның басты мақсаты жастарға әйелдер мен қыздарға қатысты зорлық- зомбылық, кемсітушілік және гендерлік ескі нанымдарға қарсылық білдіру. Осы орайда, өмірлік қиын кезең кез-келгенімізде болуы мүмкін жағдай. Сол себепті қоғамның бұл дертімен ұлт болып күресуіміз аса жауапты міндет екенін еске саламыз.
