Қоғам • 12 Қаңтар, 2021

Жаңа кодекстің ерекшеліктері

19 рет көрсетілді

Жануарларға қатыгездік көрсеткендердің 2 жылға дейін бостандығы шектелуі мүмкін. Бұл туралы Президент жанындағы Орталық коммуникациялар қызметінде өткен баспасөз жиынында Экология, геология және табиғи ресурстар министрі Мағзұм Мырзағалиев айтты.

«Адамдар тарапынан жануар­лар­ға қатыгездік не үшін жасалатыны түсініксіз. Бұл ақтауға келмейді. Күн сайын әлеуметтік желі­лерде ақылға сыймайтын әре­кеттер жарияланып жатады. Аққуды тұншықтырып, итба­лық­ты ұрып, итті қорлап жат­қанын көрдік. Бұған ұқсас фактілер көп. Сондықтан жазаны күшейту қа­жет», деді М.Мырзағалиев.

Бұл ретте министрлік Қыл­мыс­­тық кодекстегі 316-шы, яғни «Жан­уар­ларға қатыгездік жасау» бабы бойынша жазаны күшейтуді ұсынды.

«Айыппұл ұлғаяды және бас бостандығын шектеу жазасы енгізілуі мүмкін. Заң жобасы тая­у­да Мәжіліске жолданды. Бұ­ған қоса депутаттар және жан­уар­ларды қорғаушылармен бірге Жануарларды қорғау туралы заң жобасы әзірленді. Оның жүзеге асырылуы жан­уар­ларға мей­рім­ділікпен, жауап­кер­шілікпен қарауды қамта­ма­сыз етеді. Түрлі санаттағы жан­уар­лар­ға қарау бойынша жалпы және арнайы талаптар бекітіледі. Сонымен бірге жануарларға жасалған кез келген қатыгездік әрекетке қатысты жауапкершілік ілеспе заң­да қарастырылған», деді министр.

Жаңа құжатта жабайы, үй, қыз­меттік және ауыл шаруа­шы­лы­ғы жануарларына жасалатын қатыгездіктің алдын алу шаралары толық қамтылған. Сол секілді жануарларға ветеринарлық кө­мек, тиісті күтім жасау, ойын-сауықтық мақсатта пайдалану ережелері бекітіліп, қатыгездікті насихаттауға тыйым салынған.

Ведомство басшысы жаңа Экологиялық кодекс қабылданған соң еліміздегі қоршаған ортаға қатысты ахуалдың қалай өзге­ре­ті­нін айтты.

«Экологиялық кодекс Эконо­ми­калық ынтымақтастық және даму ұйымының қағидаттарына сай келеді. Бұл құжатты қабыл­дар алдында екі жыл бойы экологтермен, сарапшылармен, қоғам өкілдері және бизнес-қауым­дас­тық­пен тығыз жұмыс істедік. Кодекс 40-50%-ға өзгерді», деді министр.

Қабылданған құжатқа сәйкес экологияға зиян келтірген заңды немесе жеке тұлға қоршаған орта­ны бастапқы күйіне келтіруге мін­детті. Атмосфералық ауа, су мен топырақтың ластануы проблемасын шешу үшін өндіріске Озық қолжетімді тех­нологиялар қағидаты енгізі­ле­ді.

«Бірінші кезеңде мұнай-газ, тау-кен металлургиясы, химия және электр энергетика­сы салаларына қатысты 50 ірі кәсіпорынды Озық қолжетімді технологияларға ауыстыру жоспарланған. Осы 50 кәсіпорынға жалпы ластанудың 80%-ы тиесілі. Еуропа елдері осы тетікті енгізу арқылы 15 жыл ішінде шығарындыны 94%-ға төмендетті. Оны енгізген кәсіпорын эмиссия төлемдерінен бо­са­тылады. Егер енгізбесе, эмис­сия төлемдері еселене түсе­ді», деді ведомство басшысы.

Экологиялық кодексте қоғам өкіл­дерінің қоршаған ортаға әсерді бағалаудың барлық кезең­де­ріне қатысуына ерекше мән бе­рілген. Сондай-ақ жергілікті атқарушы органдарға түсетін экологиялық төлемдердің 100%-ын табиғатты қорғау шараларына бөлуге міндетті екендігі көрсетілді. Тұрмыстық қалдық мәселесін шешу үшін Waste to energy технологиясы арқылы қоқысты энергетикалық мақсатта кәдеге жарату көзделмек. Заңсыз қоқыс полигондарын жою мақ­са­тында қалдық шығаратын кө­лік­терге GPS қондырғыларын міндетті түрде орнату мәселесі қарастырылған.

 

Соңғы жаңалықтар

Ұқсас жаңалықтар