Облыс аумағында 156 гидротехникалық құрылғылар орналасқан. Оның ішінде республикалық меншікте 36, коммуналдық меншікте 110 нысан бар.
Сонымен қатар, облыстың елді мекендері мен шаруашылық нысандары үшін қауіп төндіруі ықтимал 14 су қоймасы бар екен. Олардың қатарына «Теріс-Ащыбұлақ», «Тасөткел», «Қақпатас», «Ақкөл», «Ынталы», «Қарақоңыз» су қоймалары және Қырғыз Республикасының аумағында орналасқан «Киров» су қоймасы және тағы да басқа нысандар кіреді. «Бұл су қоймалары бөгеттерінің бұзылуы болған жағдайда 234 мыңнан астам тұрғыны бар 72 елдімекенді су басу қаупі туындайды. Сонымен қатар, су тасқыны мен еріген қар суларымен су басуы ықтимал болатын 38 елді мекен анықталды. Соңғы 5 жыл ішінде су тасқынымен және жерасты суының көтерілуімен байланысты 7 оқиға орын алған. Оның салдарынан Қордай, Жамбыл, Т.Рысқұлов аудандарында 104 тұрғын үйдің ауласы, 25 тұрғын үйдің ғимараты су астында қалған және Жамбыл ауданынан өтетін республикалық маңызы бар автокөлік жолының 515 шақырымында жолды су шайып кету қаупі төнген», дейді Ермек Момбаев.
Бүгінде су тасқыны қатерін азайту мақсатында «Су тасқыны қатерлерінің алдын алу және жою жөніндегі 2017-2020 жылдарға арналған шаралар кешені» жол картасында облыстың елді мекендерін су тасқынынан және еріген қар суларынан қорғау үшін 26 учаскеде жағалауды қорғау жұмыстарын жүргізу жоспарланыпты. Ал, 2017-2020 жылдары жергілікті бюджеттен бөлінген 192,2 миллион теңгеге 25 нысан бойынша жұмыстар толығымен аяқталған. Сонымен қатар, Мойынқұм, Сарысу, Т.Рысқұлов, Жуалы, Қордай сияқты бірқатар аудандарда орналасқан өзендер мен су қоймаларына жөндеу, тереңдету жұмыстары жүргізілген. Сол сияқты, Тараз қаласындағы тұрғын үйлерді, аулаларды және көшелерді су басу оқиғаларын болдырмау мақсатында «Қапал», «Қарасу-1», «Қарасу-2», «Сеңкібай», «Үшбұлақ», «Түйте», «Базарбай» каналдарының арналары тазартылып, «Шалғай Қарасу» және «Тайвань» алқабындағы каналдары тазаланған. «Су тасқынына қарсы іс-шаралар жоспары аясында 142 шақырым дренаж және суару каналдары, 185 шақырым арық желісі, темір және автомобиль жолдарында 145 көпір және 789 су өткізу құрылғылары тазартылып, 5 гидротехникалық құрылыстар мен 19 реттеуші құрылғыларға жөндеу жүргізілді», дейді департамент бастығы. Сондай-ақ, ол Шу-Талас бассейндік инспекциясы мен «Қазсушар» РМК филиалы «Тасөткел» және «Теріс-Ащыбұлақ» су қоймаларынан су ағызу мониторингін жүргізуде екенін, Шу-Талас бассейндік инспекциясымен бірлесіп Қырғыз Республикасының Су шаруашылығы және мелиорация департаментімен өзара іс-қимыл жүргізілуде екенін жеткізді.
Айта кетейік, су тасқыны салдарын жою үшін жұмылдырылатын күштер мен құралдар топтамасының құрамында 631 адам, 53 бірлік техника бар. Сондай-ақ, 10 жүзу құралдары мен 41 мотопомпа жасақталған.
Жамбыл облысы
