Жоғарғы сынып оқушылары Дильназ Жемісбек пен Виктор Кохно және Аружан Мамырова мен Амина Қайратқызы құрастырған роботтар жақында өткен халықаралық байқауға қатысып, бас жүлде алды. «Kazakhstan International Robotics Competition» атты байқауды Алматы қалалық білім басқармасы мен Ш.Уәлиханов атындағы жекеменшік мектебі ұйымдастырған екен. Жасөспірімдер арасындағы жасанды интелекке қызығушылық пен тың идея иелерін анықтауға арналған жобаға Ресей, Жапония, Түркия, Өзбекстан, Тәжікстан және Қазақстан командалары қатысқан болатын. Онлайн өткен жарыста әр елдің озық мектептерінен түрлі жобалар ұсынылыпты. Халықаралық дәрежедегі мамандарға талдықорғандық балалардың қиялы мен ақыл-ойынан туған құрылғы ұнап, Гран –Приге лайық деп танылған-ды. Олардың ұсынған жобасы» Қоқысты сұрыптау роботы» деп аталады екен. Екі робаттың міндетіне қоқысты теріп қана қоймай, оларды сұрыптап, бөліп жинау кіреді екен. Қарапайым заттардан құралған роботтар бағдарламаға жүктелген тапсырманы мүлтіксіз орындапты.
- Жер шары тұрғындары жыл сайын 2 миллиард тоннадан астам қоқыс шығарады екен. Оның ішінде тұрмыстық қатты қалдық көп. Бірақ оны өңдеу жағы әлі дұрыс жолға қойылмай келеді. Біз мектепте «Неге барлық қоқыстар қайта өңделмейді?» деген сұраққа жауап іздейміз. Яғни, көптеген елдерде қоқыстарға сұрыптау жасалмайды екен. Соның кесірінен қоршаған орта ластанып, экология бұзылуда. Бұл мәселе Қазақстанда да күрделі. Сондықтан, біз қоқыс сұрыптау ісіне жасанды интелектіні қосып, қоршаған ортаға зиянсыз жұмыс процесін жасағымыз келеді. Алғашқы роботтарымыздың көңілден шыққанына қуаныштымыз, - дейді Назарбаев зияткерлік мектебінің 8-сынып оқушысы Аружан Мамырова.
Оқушылар жасаған робот жол бойымен өздігінен қозғалып әрі айналадағы қоқыстың барлығын теріп, жинауға қабілетті дейді. Олар және қоқысты құрамы бойынша ажыратып, алғашқы сұрыптауды жасайды. Роботтың бағдарламасы нейрондық желілерге негізделіпті. Орнатылған әр бөлшекті 3D принтері арқылы оқушылардың өздері басып шығарған екен.
Алматы облысы
