Коронавирусқа қарсы ерікті түрде вакцина салу науқанына алғашқылардың бірі болып қала әкімі Мұрат Әйтенов қатысты. Шаһар басшысы Шымкент қалалық №3 емханада екпе алдында дәрігерге тексеріліп, қарсы көрсеткіштер анықталмаған соң, ерікті түрде екпе ектірді.
«Спутник V» вакцинасының 1 мың дозасы қалалық қан орталығындағы мұздатқыш камераларда уақытша сақтау үшін орналастырылып, дүйсенбі таңғы сағат 06:00-де 4 емханаға жеткізілді. Егу үшін қаладағы емханалардың базасында 4 вакцинация кабинеті ұйымдастырылып, вакциналарды сақтауға арналған мұздатқыштар орнатылған.
Ерікті түрде вакцина егу үшін медицина қызметкерінің тізімі қалыптастырылған. Сонымен қатар медицина қызметкерлері үшін вакциналау бойынша семинар-тренингтер өткізіліп, қажетті медицина қызметкерілерінің барлығы оқытудан өтті. Вакциналауға профилактикалық егуге қарсы көрсеткіштері жоқ адамдар жіберіледі. Вакциналау алдында дәрігерлер тұрғындарды міндетті түрде тексеруден өткізеді. Бүгінгі таңда қалада төрт емхана базасында екпе егілуде. Қалалық №6 емхана сол төрт базаның бірі.
Бірінші кезекте емхананың 6 медициналық қызметкері ерікті түрде коронавирусқа қарсы вакцина алды. Емхананың бас дәрігері Айгүл Қылышбаеваның хабарлауынша, пунктке таң азанымен «Спутник V» вакцинасының 250 дозасы жеткізілген. Алғашқы күні бұл базадан қаладағы 4 денсаулық сақтау мекемесінен 50-ге тарта медицина қызметкері вакцина алады деп жоспарланған.
«Алдымен денсаулығымды тексертіп алдым. Дене қызуым, қан қысымым барлығы қалыпты жағдайда болып, рұқсат етілді. Жарты сағат СОVID-19-ға қарсы екпе егуден кейінгі күту залында мамандардың бақылауында болдым. Қазіргі жағдайым жақсы. «Ауырып ем іздегенше, ауырмаудың жолын ізде» деген. Қазіргі таңда коронавирустан сақтанудың бірден-бір жолы – осы екпе болып тұр. Осы кезге дейін дертке қарсы өзге де вакциналарды үзбей алып жүрдім. Сол үшін аса қорқынышты болған жоқ. Өзімді, отбасымды, айналамдағы адамдарды сақтаудың, қорғаудың жолы осы болғандықтан азаматтық міндетімді орындадым, – деді алғаш болып індетке қарсы екпе ектірген бас дәрігер Айгүл Қылышбаева.
Бүгінгі таңда қалада төрт емхана базасында екпе егілуде. Сол базаның бірі – қалалық №6 емхана. Алғашқы кезекте емхананың 6 медициналық қызметкері ерікті түрде коронавирусқа қарсы вакцина алды. Қалалық №6 емхана базасы вакциналауға алдын ала дайындалып, қажетті құрал-жабдықтармен жабдықталған. Екпе алатын медициналық қызметкерлер бірінші дәрігерлік тексеруден өтіп, өз келісімін жазбаша қалдырады. Сосын екпе жүргізіліп, арнайы күту залында жарты сағат дәрігерлердің бақылауында болады. Айта кетерлігі, медицина мамандары вакциналау – коронавирустың одан әрі таралуына жол бермей, қатаң локдаун енгізбеудің жалғыз баламасы деген ойды ортаға салады.
ШЫМКЕНТ
