Жалпы, педагогикалық университеттің күндізгі оқу бөлімдеріне 565 студент қабылданған. Университет проректоры Елена Игнатованың айтуынша, 28 желтоқсанда қабылданған Білім және ғылым министрлігінің №548 бұйрығына сәйкес, 1 ақпаннан бастап 1-курс студенттері дәстүрлі оқу форматына көшті.
Студенттерге арналған оқу барысы университетте аралас форматта ұйымдастырылады. Яғни дәрістер онлайн форматта, семинарлар, қолданбалы сипаттағы зертханалық және практикалық сабақтар дәстүрлі форматта өтеді. Сабақтар 40 минуттан екі ауысымда жүргізіледі, әр сабақ арасындағы үзіліс – 20 минут.
Сонымен қатар 1-курс студенттерімен екінші семестрде оқу барысын өткізу бойынша онлайн кездесулер өткізілмек. Негізгі мақсат – студенттерге қазіргі оқу барысының мән-жайы туралы толық ақпарат беру.
Ал 2, 3-курс студенттері «Дене шынықтыру және спорт» білім беру бағдарламасын есепке алмағанда, қашықтан оқуды жалғастырады. Оқу бітіретін 4-курс студенттерінің кәсіби және диплом алдындағы практикалары онлайн форматта болады.
Магистранттар мен докторанттардың ғылыми-тәжірибелік жұмысы мен теориялық білім алуы және қорытынды аттестаттаудан өткізілуі де қашықтан оқыту форматында жүзеге асырылады.
– Санитарлық-эпидемиялық нормаларды қатаң сақтау мақсатында университеттің арнайы бөлімдеріне ұсыныстар жасалды. Аудиториялардағы студенттердің толымдылығы 40 пайыздан аспайды. Қатарлас отыратын студенттер арасында екі метрлік әлеуметтік арақашықтық, ал зертханаларда бір студентке 5 шаршы метрлік арақашықтық қамтамасыз етілген. Кіреберіс фойеде, оқу залдарында, зертханалар мен санитарлық тораптарда санитайзерлер орнатылған, – дейді Е.Игнатова.
Барлық оқу бөлмелері мен әкімшілік кеңселерінде 150 стационарлық және 15 жылжымалы кварц шамдары бар. Ғимараттарды дезинфекциялау туралы келісімшарт жасалды. Кіреберісте студенттер мен оқытушылардың, қызметкерлердің дене қызуын өлшейді. Студенттер мен оқытушылар және университет қызметкерлеріне оқу барысы кезінде бетперде тағу міндеттелді.
Сондай-ақ жатақхана жұмысына ерекше көңіл бөлінбек. Карантиндік талаптар бойынша студенттерді 50 пайыз толымдылықпен бекітілген кестеге сәйкес жатақханаларға қабылдайды. Жатақханаға орналасу үшін студенттердің өтініштерін онлайн режімде қабылдау жүргізілді. 395 студент жатақханада тұруға сұраныс білдірген. Жатақханаға орналастыру 25-30 қаңтар аралығында өтті. Студенттерді бөлмелеріне орналастыру тәртібі санитарлық-эпидемиялық талаптарға сәйкес жүзеге асырылады. Жатақханаға кірерде студенттердің дене қызуы өлшенеді. Дәліздер мен кіреберісте санитайзерлер орнатылған. Әзірге ойын-сауық мәдени бұқаралық іс-шаралар өткізуге тыйым салынған.
Оқу орнындағы асханалар да қоғамдық тамақтандыру кәсіпорындарының жұмысын ұйымдастыру бойынша ұсыныстарды ескере отырып жұмыс істейді: әлеуметтік арақашықтықты сақтау, бетперде кию және ғимараттарды дезинфекциялау талабы қатаң сақталады.
Павлодар облысы
