Барлығы 92 көпқабатты үй және 40-тан астам бюджеттік мекеме жылусыз қалды. Бүгінде 20 мыңнан астам халқы бар қалада екі күннен соң, тек 11 ақпанда ғана жылумен қамту қайта қалпына келтірілген. Мамандардың айтуынша, техникалық ақау сапасыз отынды пайдалану салдарынан орын алған, сол себепті мазут шаруашылығы жүйесін толығымен тазартуға тура келіпті.
Жаңатас қаласының қазандығында орын алған төтенше жағдай бойынша Жамбыл облысының әкімі Бердібек Сапарбаев тиісті басшыларға тапсырма берген еді. «Үш күн бойы адамдар суық пәтерлерде тұруға және қызметтік кабинеттерде жұмыс істеуге мәжбүр болды. Бұл, ең алдымен, аудан басшылығының өзінің қызметтік міндеттеріне жауапсыз қарауынан орын алды. Аудан әкімі Бақытжан Жақсылықов қазандықта бір жарым айға жететін қажетті отын қоры бар екеніне сендірген еді. Нәтижесінде отын қоры жоқ екені белгілі болды. Сонымен қатар, мердігер жеткізген мазут та пайдалануға жарамсыз болып шықты. Бұл орайда түрлі сұрақтардың туындауы заңды. Неліктен әкімдік күмәнді мердігермен жеткізу шартын жасасқан? Сапасыз отынды жеткізуге қатысты неге дер кезінде тиісті шара қолға алынбаған? Бұл мәселені құзырлы органдар қарауы керек. Кінәлілерге қатысты қатаң шаралар қабылдайтын боламыз», деді ол. Бұл орайда, Бердібек Сапарбаев қадағалау органдары қызметкерлерінің қатысуымен жедел комиссия құруды тапсырды. Бұл комиссия нақты кінәлілерді анықтап, оларды жазалау бойынша ұсыныстар енгізуі керек. Сондай-ақ, мазут жабдығынан бас тарту және Жаңатас қазандығына газтурбиналық қондырғы орнату туралы да ұсыныс айтылуда. Егер сенімді инвестор табылса, ескірген жабдықтан құтылу және отын шығындарын азайту секілді екі мәселені бірден шешудің мүмкіндігі бар екен.
Жамбыл облысы
