«Қазмедиа» орталығында Қазақстан Республикасы Президенті жанындағы Орталық коммуникациялар қызметі арқауында «Әдебиет порталы» Интернет-ресурсының тұсаукесер рәсімі өтті.
«Қазмедиа» орталығында Қазақстан Республикасы Президенті жанындағы Орталық коммуникациялар қызметі арқауында «Әдебиет порталы» Интернет-ресурсының тұсаукесер рәсімі өтті.
Порталды Мәдениет және ақпарат министрлігінің және Президент жанындағы орталық коммуникациялар қызметінің қолдауымен «Қазконтент» акционерлік қоғамы әзірлеген. Жиында «Қазконтент» акционерлік қоғамы басқарма басшысының орынбасары Нартай Әшім заман талабына сәйкес туған әдебиетіміздің де интернет жүйесінен өз орнын алатын сәттің жеткенін баяндады. Веб-порталдың негізгі мақсаты – жас ақын-жазушыларға ақпараттық қолдау көрсетіп, қазақ әдебиетін интернет әлемінде жүйелі түрде насихаттау екенін, мұнда қазақ және әлем әдебиетінің үлкен электронды қоры жинақталғанын жеткізді. «Әдебиетшілер мұндағы кітаптарға онлайн түрінде сын-пікірлерін қалдыра алады. Портал энциклопедиялық қызмет атқарады. Бұл жерде әр авторға жеке бет арналған және олардың шығармашылығына қатысты барлық деректер топтастырылған. Әр автор өз шығармашылығын ұдайы дамыту мақсатында әдеби блог жүргізе алады. Порталда жас авторлар үшін арнайы «Жас авторлар мінбері» айдары және «Ашық мінбер» блогы да ескерілген», – деді ол.
«Әдебиет порталы» – тек онлайн кітапхана ғана емес, кәсіби ақын-жазушылар мен жас авторлар үшін де бірегей коммуникациялық әдеби алаң. Мұнда «Аударма», «Мазмұн», «Хат», «Иллюстрация» және «Поэзия әлемі» жобалары бар. Жобалардың шеңберінде оқырман қазақ тіліне аударылған әлем әдебиетімен, әлем тілдеріне аударылған отандық шығармалармен, әдебиеттің көрнекті өкілдерінің құнды хаттарымен таныса алады.
Порталдың тұсаукесер рәсіміне ақын, Парламент Сенатының депутаты, Қазақстан Жазушылар одағының төрағасы Нұрлан Оразалин қатысты. Ол соңғы онжылдықта интернет, сайт, портал ұғымдарының қоғамдық өмірге дендеп енгенін, бұл орайда қазақ әдебиеті үшін де үлкен бір порталдың ашылуы қажеттілік екенін алға тартты. «Әдебиет қай дәуірде де халықтан бөлек өмір сүрмейді. Сондықтан әдеби шығармалар әрқашан да оқырмандарын күтетіні заңды. Бұл орайда әдебиетті насихаттап, оқырмандардың қатарын көбейту үшін портал ашып жатқан жігіттерге ризашылығымды айтамын. Отандастарымыздың кітап оқуға деген құлшынысы төмен емес. Кітап оқудың жаңа дәуірі басталған тұста оның еселенері сөзсіз», деді Н.Оразалин.
Қазіргі уақытта порталда 1411-ден аса кітап, 1184 автордың жеке парақшасы және «Жас авторлар мінбері» айдарында республикаға таныла бастаған 27 автор орналасқан. Порталдағы кітаптар онлайн түрінде Pdf және ePub арнайы оқу жүйесі пішімінде жарияланады.
Айгүл СЕЙІЛОВА,
«Егемен Қазақстан».
