“ДИДАР” КИНОФЕСТИВАЛІ

алдағы Азиада ойындары мен еліміздің ЕҚЫҰ-ға төрағалық етуіне арналмақ Биыл бесінші рет болатын “Дидар” – Алматы студенттер кино­фестивалі “Жаңа онжыл­дық – Қазақстан жастарының жаңа серпілісі” деген ұранмен өткелі отыр. Аталмыш кино­фестиваль алдағы VІІ қысқы Азия ойындарын жастар ара­сында насихаттап әрі еліміздің ЕЫҚҰ-ға төрағалық ету құр­метіне құрылмақ. Алғаш рет аталмыш кино­фестиваль Алматы жастары арасында өткізілген болатын. Араға жыл салып республикалық деңгейге көтерілді. Халықаралық деңгейге көтерілуге әлеуеті бар кинодода бес жыл ішінде бір­қатар талантты жастарымыздың тырнақалды туындыларының тұсауын кесіп, үлкен экранға жолдама беруден жаңылмай келе жатыр. Кинофестивальдің мақ­саты да айқын, ол – өз заман­дастарын туған елді құрметтеуге шақыра­тын және ұлттық үрдіс пен мәдениетті терең насихаттай алатын дарынды жастарды табу. Киноөндірісі саласында Алматы жастар кинофестивалі­нің атқарып отырған тірлігі толайым болмаса да жас сурет­керлердің қабілетін шыңдауға, жігерлендіруге ықпалы бар екенін өнертанушылар мойын­дайды. Оның үстіне “Дидар” фестивалінің Алматы қалалық әкімдігінен де бөлек, алты бірдей ұйымдастырушысы бар. Олар – Алматы қаласы жастар саясаты жөніндегі басқармасы, “Дидар” продюсерлік орталығы” қоғам­дық қоры, Алматы жастар сая­сатын дамыту мемлекеттік қоры, Т.Жүргенов атындағы Қазақ ұлттық өнер академиясы. Ресми қолдаушылары Мәдениет ми­нистрлігі мен “Нұр Отан” ХДП “Жас Отан” жастар қанаты. Жеті бірдей мақсатқа құрыл­ған кинофестиваль аясында студент­тер фильмдерінің, шығар­машы­лық ұжымдар қатысқан фильмдер мен музыкалық клип­тер байқауы өтеді. Сол сияқты “Қазақстандық жастар киносы: әлемдік кино­нарықта алатын орны” тақыры­бына дөңгелек үстел, шеберлік дәрістер өтпек. Байқау барысынан бөлек, ақ­парат­тық фильмдердің көрсеті­лім­дерін жасау көзделіп отыр. Байқауға 2008-2010 жылдар ара­лығында қазақ және орыс тіл­дерінде “Менің Қазақ­станым!” ұраны аясында түсіріл­ген көр­кем­сурет­ті, деректі, анимация­лық фильм­дер мен музыкалық бейнеклип­тер қабылданбақ. Айнаш ЕСАЛИ. АЛМАТЫ.