Биыл Алматыда өткен әлем чемпионаты Қазақстанның ғана емес, төрткүл дүние боксының тарихында үлкен оқиға болғаны анық. Бұл дүбірлі бәсеке қазақстандық боксшылардың талайлардан бағы басым екенін, тіпті, төрден ойып тұрып алатын орны бар екенін айқын дәлелдеді. Қазақ елінде ерте заманнан-ақ жекпе-жек өнері өте жақсы дамыған. Күрес десе білегін сыбанып алыса кететін қазекем, жұдырықтасу өнерінен де алдына жан салмайды. Алматыда өткен әлем чемпионатында Қазақстан құрамасы 4 алтын, 2 күміс, 2 қола олжалап, тұңғыш рет бірінші орынға шықты. Бұл байрақты бәсекеге әлемнің 111 елінен 457 боксшы қатысты. Бокс – қазақтың ұлттық спортына айналғанына көп жылдар болса да, бір әлем біріншілігінде осыншама бас жүлде алынбаған еді.
Биыл Алматыда өткен әлем чемпионаты Қазақстанның ғана емес, төрткүл дүние боксының тарихында үлкен оқиға болғаны анық. Бұл дүбірлі бәсеке қазақстандық боксшылардың талайлардан бағы басым екенін, тіпті, төрден ойып тұрып алатын орны бар екенін айқын дәлелдеді. Қазақ елінде ерте заманнан-ақ жекпе-жек өнері өте жақсы дамыған. Күрес десе білегін сыбанып алыса кететін қазекем, жұдырықтасу өнерінен де алдына жан салмайды. Алматыда өткен әлем чемпионатында Қазақстан құрамасы 4 алтын, 2 күміс, 2 қола олжалап, тұңғыш рет бірінші орынға шықты. Бұл байрақты бәсекеге әлемнің 111 елінен 457 боксшы қатысты. Бокс – қазақтың ұлттық спортына айналғанына көп жылдар болса да, бір әлем біріншілігінде осыншама бас жүлде алынбаған еді.
Куба қабыландары кезінде 6-7 алтын жүлде алып, дүние жүзін бір дүрліктірсе, Қазақ елі де бокс тарихына өз атын ойып тұрып жазды. Егеменді ел болған жылдары олар барлық Олимпия ойындарында құрмет тұғырының жоғарғы баспалдағына шығып, үш рет әуесқой бокстан беделді олжа – Вэл Баркер Кубогына ие болды. Міне, осылайша қазақстандық бокс мектебі әлемдегі мықтылардың бірі екенін дәлелдеді. Ең бастысы, қазақ боксының дамуы дұрыс жолда екенін көрсетті. Сөз жоқ, еліміздің төрінде өткен бұл әлем чемпионаты тәуелсіз Қазақстанның әлемдік спорт алаңында қол жеткізген жетістіктерінің бірі.
Тағы бір айтарымыз – осынау жетістік, қуаныштың бәрі Қазақстан боксының жүйелі дамуына 80 жыл толуымен тұспа-тұс келді. Ел боксының тарихына көз жүгіртер болсақ, біздің елімізде ең алғаш рет 1933 жылы спорттың осы түрінен алғашқы секциялар ашыла бастаған еді. Міне, осылайша біздің елімізде бокс – спорттың ерекше танылған түрі. Және біз әлемдік аренада спорттың осы түрін дамытуға мүдделіміз.
Біржан Жақып, Мерей Ақшалов, Данияр Елеусінов, Жәнібек Әлімханұлы, Әділбек Ниязымбетов, Иван Дычко, Қайрат Ералиев пен Берік Әбдірахмановтың Алматы төрінде өткен әлем чемпионатындағы жеңістері елге үлкен күш, рух берді. Осы жеңістен кейін байрақты ағаларына еліктеп көптеген жасөспірімдеріміз бокс секцияларының есігін айқара ашқаны ақиқат. Әрине, Қазақстан боксы осындай абыройға бір жылда немесе аз уақыттың ішінде ие болған жоқ. Жоғарыда айтқанымыздай бұл 80 жылдан бері төгілген тердің жемісі. Бұл Елбасымыз Н.Назарбаевтың спортқа деген сүйіспеншілігі, осы салаға үлкен қолдау көрсетуінің арқасында қол жеткізген табыс. Жаттықтырушылар мықты боксшы тәрбиелеу үшін барын салды. Әйтсе де, спорттың осы түрінің өркендеуіне ҚР Бокс федерациясының президенті Тимур Құлыбаевтың қосқан үлесі өте зор. Тимур Асқарұлы федерацияға президент болып келгелі жаттықтырушылардың алаңсыз жұмыс істеуіне барлық жағдай жасалды. Өз кезегінде жаттықтырушылар да үлкен жауапкершілікті сезініп, намысты қолдан бермеді. Бірліктің арқасында жүйелі де ғылыми түрде жүргізілген жұмыс оң нәтижесін берді. Алла қолдап, Қазақ елі боксшыларының байрақты бәсекелерден жүлдесіз оралған кезі болған емес. Кешегі жеңіс алдағы, яғни 2016 жылы өтетін Олимпия ойындарындағы тұғырдың ең биік сатысына жасалған алғашқы нық қадам деп айтуға әбден болады.
Мырзағали АЙТЖАНОВ,
бокстан Қазақстан ұлттық құрама командасының бас бапкері,
Қазақстан Республикасына еңбек
сіңірген жаттықтырушысы.
ШЫМКЕНТ.
