Аталған 135 пәтерлі көпқабатты тұрғын үйдің құрылысын «Бином» жауапкершілігі шектеулі серіктестігі жүргізген. Баспаналы болғандардың арасында 27 жетім бала, 66 әлеуметтік жағынан аз қамтылған отбасы және 42 бюджеттік ұйым қызметкері бар. Айта кетейік, тараздық тұрғындарға пәтер кілттері 8 наурыз мерекесі қарсаңында табысталып отыр.
Жиынға Жамбыл облысының әкімі Бердібек Сапарбаев қатысып, тұрғындарға пәтер кілттерін табыстады.
«Мемлекет басшысының тапсырмасына сәйкес, жыл сайын облыстың жүздеген тұрғындары жаңа пәтерлерге ие болуда. Өткен жылы Тараз қаласының тұрғындарына екі мыңға жуық пәтер берілді. Ағымдағы жылы біз бұл көрсеткішті арттырып, сол арқылы кезекті қысқарта түсуді жоспарлап отырмыз. Осы 15-шағын ауданыныңдағы оң өзгерістерге өздеріңіз куәсіздер. Жақында мұнда тағы екі мектеп, балабақша, фельдшерлік пункт, полиция бөлімшелері ашылатын болады. 8 наурыз мерекесімен мен облыс басшылығы атынан барлық аналар мен аруларды құттықтаймын. Ана – отбасының жүрегі. Сондықтан біз оларды жан-жақты қолдап, жас ұрпақты соған үйретуіміз керек», деді Бердібек Сапарбаев.
Сондай-ақ, мереке қарсаңында баспаналы болған бірқатар тараздық тұрғындар да қуанышымен бөлісті. «Менің екі балам бар. Бүгін бізге екі бөлмелі пәтердің кілті табысталып, қуанышты сезімді бастан кешіп отырмыз. Бұл мереке осынау жағымды әсерімен біздің жадымызда ұзақ сақталатынына сенемін», деді жалғызбасты ана Амина Якубжанова. Ал, толық емес отбасы санаты бойынша кезекте тұрып, баспаналы болған Назира Әбдірайымова да өз тілегін жеткізді. «Қуанышымды сөзбен айтып жеткізу мүмкін емес. Мен барлық аналар атынан облыс басшылығына деген ризашылығымды жеткізгім келеді. Кез-келген адам жеке баспанасына қол жеткізудің қаншалықты маңызды екенін түсінеді және соны армандайды. Мен әр отбасына осындай бақытты сезінуін тілеймін», деді ол.
Айта кетейік, қазіргі таңда облыста тұрғын үй қорынан пәтер алу үшін кезекте 30 мыңнан астам адам тұр екен. Өткен жылдың қорытындысы бойынша 250 мың шаршы метрден астам тұрғын үй пайдалануға берілген.
Жамбыл облысы
