Әуелі «НПО Зерде» ЖШС, «Ақ ниет» ЖШС, «Аптека №5», Аtamiras.s ЖШС көтерме қоймаларын аралаған қала әкімі жоспарланған дәрілік заттарды жеткізу және жинақтау бойынша резервтік қорлармен қамтамасыз етілуіне көз жеткізді. Өткен жылы коронавируспен күреске қолданылатын дәрілерге бюджеттен 180 млн теңге бөлінді. Биыл тағы 659 млн теңге көлемінде тұрақтандыру қорына қаржы бөлінбек. Осы жұмыстар нәтижесінде дәріханалардағы дәрі бағасы 15-30 пайыз төмендеген болатын.
Бүгінгі таңда Шымкентте дәрі-дәрмек қоры жеткілікті. Дәріханалар мен емханаларда 4 млн 144 мың дана дәрілік заттар бар. Оның ішінде ыстық түсіретін, антибиотиктер, глюканаттар секілді вирусқа қарсы қолданылатын дәрі-дәрмек түрі кездеседі. Бағалары 25 теңгеден басталады. Медициналық ұйымдарда 900 млн теңгеге дәрі-дәрмек қоры, 46 941 ЖҚҚ жиынтықтары, 2 млн медициналық бетперде, 1 014 600 медициналық қолғап дайындалды.
Кезекті тексеру барысында М.Әйтенов күніне 20 мың бетперде шығаратын Bіzhon ЖШС-і мекемесіне барды. Мұндағы бетперделер үш қабатты, бір рет қолданылады. 2020 жылы жалпы сомасы 78 400 000 теңгені құрайтын 2 240 000 дана медициналық бір реттік бетперде өндірген.
Ал «Экофарм» ЖШС мекемесінде көп реттік және бір реттік медициналық киімдер тігіледі. Өндіріс орны тәулігіне 2 мың дана медициналық қорғаныс киімін тігуге қауқарлы. Өткен жылы сомасы 4 520 985 404 теңгеге 648 876 дана медициналық бұйымдар шығарды. Оның ішінде обаға қарсы киімдер, көп рет қолданылатын дәке таңғыштар бар.
Аралау соңында қала әкімі «Айкөмек 109» орталығында қаладағы фармкомпаниялардың және тиісті сала басшыларының қатысуымен онлайн көшпелі жиналыс өткізді. Онда фармацевтикалық мекеме өкілдерінің мәселелерін тыңдап, ортақ шешімдер қабылданды.
«Өткен жылғы қателікті қайта болдырмау үшін дәріханалар мен қала тұрғындарына барынша түсіндірме жұмыстарын жүргізу керек. Вирусқа қарсы дәрі-дәрмектер дәрігер нұсқаулығымен ғана сатылуы керек. Пандемия ушыққан сәтте тұрғындар арасында дәрілерді көптеп сатып алып, үйінде сақтап, мерзімі мен сақталу шарттарын сақтамаған, өзін емдеймін деп теріс әсер алған жайлар да болды. Үй жағдайында өзін емдеу, алыпсатарлық секілді мәселелер туындамауы тиіс. Коронавируспен ауырған науқастар ауруханаларда тегін ем қабылдайды. Заңсыздықтар орын алар болса басшылар қатаң жауапкершілікке тартылады», деді Мұрат Дүйсенбекұлы.
Шаһар басшысы денсаулық сақтау саласына жауапты мамандармен бірге қаладағы бірқатар аурухананы аралады. «Асар» шағын ауданында орналасқан қалалық клиникалық балалар ауруханасына барған тексеру тобы ондағы ем-дом жұмысымен танысты. Аталған медициналық мекеме эпидемиялық жағдай ушықса, 18 жасқа дейінгі балаларды қабылдауға дайын. Бұл үшін ауруханада 60 төсектік орынға дайындалған жұқпалы аурулар бөлімшесі ашылды. Инфекцияға шалдыққан балаларды емдеу үшін ауруханада медицина мамандары жеткілікті. Сондай-ақ емдеу мекемесі заманауи техникалық құрылғылармен жабдықталған.
Жұқпалы ауруға шалдыққан балаларды ауруханада қабылдау үшін арнайы жоспар дайындалған. Мұндай науқас балалар бөлек бокстарда қабылданып, емдеу шаралары тиісті тәртіппен жүргізіледі. Айта кетерлігі, «Асар» шағын ауданындағы балалар ауруханасында былтыр көпбейінді провизорлық орталық ашылған болатын. Мұнда инфекцияға шалдыққан 100-ден аса бала дертінен сауығып шықты.
Сондай-ақ қала әкімі «Нұрсат» шағын ауданындағы перинаталдық орталықты аралады. Мұнда коронавируске шалдыққан жүкті әйелдер қабылданады. Бұл үшін орталықта 30 орынға лайықталған провизорлық бөлімше ашылды. Ауру өршіген жағдайда мұндағы дәрігерлер инфекцияға шалдыққан жүкті әйелдерді қабылдап, медициналық көмек көрсететін болады. Орталықтағы провизорлық бөлімше 100 пайыз оттегі нүктесі мен ИВЛ аппараттарымен жабдықталған. Коронавируске шалдыққан жүкті әйелдерді емдеу үшін орталықтағы 200-ден аса медицина маманы арнайы оқытудан өтіп, біліктілігін арттырды. Орталықтағы қабылдау бөлімінің мамандары эпидемияға байланысты науқастарды таза және лас аймақтар бойынша қабылдап, арнайы тәртіппен медициналық көмек көрсетеді.
Қала әкімі өткен жылдағы қателіктерді болдырмау үшін барынша дайындықты күшейте түсу керектігі жөнінде сала басшысына тапсырма берді.
«Медицина саласы – қателікті кешірмейтін, адам өмірімен тікелей байланысты сала. Сондықтан ауруханалар мен емханалардағы әрбір жағдай қатаң бақылауға алынсын», деді қала әкімі.
Жергілікті билік дәріханалардағы баға тұрақтылығын бақылауға шаһар тұрғындарын да шақырды. Егер алыпсатарлықтың немесе дәрі-дәрмекті шекті бағадан асырған жайттың куәгері болған жағдайда дереу «109» байланыс нөміріне хабарласуға үндеді.
ШЫМКЕНТ
